AYUB 5 - KITTA KAREBA MADECENG

¹ Angobbino, éh Ayub, engkaga pappébali? Malaéka nigana muwéllauwi bantuwang?

² Banna tau madonggoé bawang iya maté nasaba mapeddi atiwi.

³ Engka naengka uwitai tau madonggoé; atuwonna paitai masse senna. Iyakiya tennassenna-senna bawang utanroiwi onrong naonroiyé.

⁴ Na ana'-ana'na dé' naengka nalolongeng allinrungeng; dé' gaga maélo méwaiwi mennang ri pengadilangngé.

⁵ Aga naéngngala mennang ri dare'na, cappu naanré tau iya lobbangngé babuwana. Mala gandong ri tengnga alekale'é, cappu naanré tau malupué. Appunnangenna sibawa asugirenna mennang mancaji incénai tau iya madekkaé ri waramparangngé.

⁶ Dé' naompo polé ri linoé jaé; dé' naompo polé ri tanaé asussangngé.

⁷ Dé'! Sangadinna aléna muto tolinoé iya papoléngengngéngngi acilakang aléna, pada-pada api tabbessi'é mompoi polé ri apié muto.

⁸ Rékko iyya ri laleng keadaammu, ri Allataalaka maélo mangobbi. Ri Alénaka maélo mappisseng, enrengngé mabbéréyangngi parakaraku.

⁹ Dé' padanna winru-winruna Allataala; dé' taulléi pahangngi. Sining anu makalallaing iya Naébbué, tenribilang sibawa dé'gaga cappuna.

¹⁰ Napanonnoi bosié ri yasé'na tanaé, angkanna dare'é sibawa padangngé marica nabolo.

¹¹ Aléna Allataala iya pakatanrééngngi tau mariyawaé, sibawa pésennangiwi tau masussaé.

^12-13 Dé' Napasiduppai rancanana tau maja akkalengngé, napalai jebba sibawa Natikkengngi tau maccaé, angkanna sininna usahana mennang dé' najaji, sibawa ribelléi ri akkalenna muto mennang.

¹⁴ Ri essoé nakennai mennang pettang, maggarambang pada-pada ri wennié.

¹⁵ Iyakiya Allataala passalama'i: tau kasiyasié polé ri amaténgngé, tau mariyawaé polé ri tenre'éngngi.

¹⁶ Engkana amménasang makkekkuwangngé lao ri tau iya dé'é nappunnai. Na tau majaé mammekkoi sisebbu basa, nasaba Allataala pura pammekkoi témunna.

¹⁷ Maupe'ko rékko naéwako ada Allataala! Aja' mukacélé rékko nacellako.

¹⁸ Saba' Allataala papeddiri, alénato paurai. Sibawa liman-Na iya paunrué, iya muto mappajjappa paimeng.

¹⁹ Rékko mangancangngi bahayaé, tuli napassalama'ko.

²⁰ Rékko poléi akkadérengngé, dé' mumaté matu alupureng. Rékko majjallo'i musué, amakko polé ri amaténgngé.

²¹ Rijagaiko polé ri pétenna'é sibawa mappakiri-kirié; muwoloi abalaé temmétau.

²² Rékko takkennai apéddarangngé sibawa alupurengngé, sabbara'ko matu sibawa mala macawa. Dé' namétau pappéneddimmu sibawa bata-bata, moloiwi olokolo masekkangngé sibawa mabecco'é.

²³ Dare iya murakkalaé dé' nakkébatu matu; olokolo liyaé dé' naluruiko matu.

²⁴ Amakko matu monro ri kémamu; sibawa rékko muparéssai sining bimbala'mu, salama manengngi, dé'gaga akurangenna.

²⁵ Ana' eppomu tenribilang matu, singngégai mennang wellaé ri padangngé.

²⁶ Pada-pada gandong maridié, riyéngngalai ri wettunna, tuwo tokko matu madising narapi macowa.

²⁷ Ayub, iya manennaro purani riparéssa. Iyaro ada-adaé tongeng, jaji tarima bawanni.”