AYUB 41 - KITTA KAREBA MADECENG

¹ Mulléga tikkengngi buwaja Léwiatan, banna sibawa séddi méng balé? Mulléga massiyorengngi lilana sibawa tulu passiyo?

² Mulléga pasang tulu ri inge'na iyaré'ga sakka bessi ri langona?

³ Naulléga méllauwi ri iko untu' ripaleppe? iyaré'ga barunding sibawa iko, méllauwi paressé babuwamu?

⁴ Weddigga mébbu assituruseng sibawa iko, sibawa majjanci tuli maélo tumaningiko?

⁵ Mulléga siyoi pada-pada manu'-manu' ripiyaraé, iya pésennangiyéngngi ata-ata makkunraié?

⁶ Weddigga ridangkangeng risining pakkajaé sibawa riyabbagé-bagéyang ri yelle'na sining padangkangngé?

⁷ Mulléga toddo'i bingkulanna sibawa bessi tellué matanna iyaré'ga rawu'i sibawa bessi iya bettuéngngi ulunna?

⁸ Géssai siseng bawang, sibawa dé'na mumaélo pakkolingngi; iyaro allagangngé dé' muwallupaiwi matu mannennungeng.

⁹ Tungke' tau iya mitaéngngi Léwiatan, mancaji malemmai matu nainappa mabuwang marenne.

¹⁰ Masekkangngi rékko ripaoto'i polé ri tinrona; dé' muwi séddi tau barani tettong ri yolona.

¹¹ Niga barani luruiwi tennakenna lo? Ri linoéwé dé' gaga mulléi pogau'i.

¹² Laono mai Ucuritakko passalenna watakkaléna Léwiatan, passalenna awatangenna sibawa bentu'na magelloé.

¹³ Dé' muwi séddi tau mulléi sapé'i waju saliwenna iyaré'ga bettui waju musu iya napaké.

¹⁴ Niga mulléi timpa'i pannyoro'na iya mawatangngé, mallise isi-isi iya mappakatau-taué?

¹⁵ Pada-pada séré massusungngé, lekke'na maddeppé mare, pada-pada batué tedde'na.

¹⁶ Sitenre-tenre tassiyo mare, angkanna muwi angingngé dé'to naulléi muttama maccelle.

¹⁷ Iyaro séréé makkuwamani asse'na siyanré angkanna temmakkullé ripassarang

¹⁸ Rékko tarassiwi Léwiatan, tabbessi cahayaé; mallala matanna samanna ompona mata essoé.

¹⁹ Tassiyampo luwa apié polé ri bawana; tassiyamporeng bunga apié lao tulili.

²⁰ Maddumpu rumpué polé ri laleng inge'na, pada-pada rumpu aju tunungngé ri yawana oringngé.

²¹ Napalluwa baraé nappase'na; massu luwa apié polé ri bawana.

²² Cekkonna makkuwamani watanna, angkanna métau maneng ri yolona.

²³ Dé'gaga onrong malemma ri bingkulanna; dé' namakkullé mareppa nasaba sittedde baja'é.

²⁴ Atinna sittedde batué, dé' naissengngi kaléwa-léwa'é masse sibawa matedde pada-pada batu allélurengngé.

²⁵ Rékko tokkongngi, muwi tau kaminang mawatangngé ateddéngeng towi abaraningenna, naébbui dé' pakkullénna nasaba métau senna'i.

²⁶ Dé'gaga peddang mulléi loi; bessi, pana iyaré'ga duru' dé' naulléi peddiriwi.

²⁷ Nasemmi bessié pada-pada alusu'na wellaé sibawa tembagaé pada-pada péca'na aju keddi-keddingngé.

²⁸ Dé' gaga pana mulléi paddésu'i; batu iya rigenrungengngéngngi samanna daramémi bawang.

²⁹ Godangngé naangga padami silampaé wella rakko; macawami rékko rirawu'i bessi ri tauwé.

³⁰ Sessi'é ri babuwana pada-padai reppa pinceng iya macacaé cappa'na. Padai pakkakkasa paddése nakaéi bungkaé sibawa napuwé'i.

³¹ Nagarui tasi'é angkanna sinrupa uwai rédé; pada-pada panci attanakeng minnya iya mabbusa-busaé.

³² Salaiwi batéla ajé iya maccahayaé, napinrai tasi'é mancaji busa iya maputé tappana.

³³ Ri yasé'na linoé dé' gaga tandinganna; mahlu' iya dé'é naissengngi métau, alénana ritu!

³⁴ Muwi olokolo iya kaminang magelloé naitato matuna; ri yelle'na sining olokolo masekkangngé, aléna ritu arung.”