AYUB 4 - KITTA KAREBA MADECENG

ASSIPABBICARANG MAMMULANGNGE 4:1–14:22 Elifas

^1-2 Nainappa mabbicara Elifas, adanna: “Ayub, massessekalékoga rékko mabbicaraka? Dé' utahangngi mammekko lebbi maitta.

³ Maégani tau pura mupangajari, sibawa mennang iya malemmaé purani mupéwatangi.

⁴ Ada-adammu iya mabbéré sumange, paoto'i tau iya tabbuttué, malemma sibawa matekko.

⁵ Iyakiya makkekkuwangngé alémuna nakenna sussa; tassélekko, sibawa pettu paddennuwang.

⁶ Dé'ga mumatinulu lao ri Allataala; dé'ga na atuwommu dé'gaga ricéccéyangngi? Rékko makkuwaitu, sitinajai mateppe'ko sibawa dé' mupettu paddennuwang.

⁷ Pikkiri'i, engkaga naengka tau iya dé'é napasala nakennai acilakang sibawa abala?

⁸ Uwisseng polé ri pakkitangngé makkedaé tau iya rakkalaé dare maja, sibawa mampo biné abala selaku biné tanengeng, méngngalai matu acilakang sibawa asussang!

⁹ Pada-pada anginrajaé, makkuwaniro caina Allataala paccappui mennang angkanna lennye!

¹⁰ Marangngi sibawa gora-gorai tau majaé, pada-pada singaé mennang marang-marang. Iyakiya Allataala pammekkoi mennang enrengngé polo-poloi isinna.

¹¹ Matéi mennang pada-pada singaé akurangeng inanré, angkanna massara-sarang ana'-ana'na tessiyomporeng.

¹² Engka naengka nalettu ri iyya séuwa biritta, pada-pada bici-bici alusu'é ri laleng daucculikku.

¹³ Tagganggui tinroku sibawa ripaddésu ri aléna, pada-pada mannippi majaé ri wenni makalemmengngé.

¹⁴ Tasséleng tona sibawa ténré nataro tau; sininna tubukku taggottang, ténré-ténré.

¹⁵ Nakennai anging alusu rupakku, natettonna bulu-bulukku.

¹⁶ Séuwa tettong ri yoloku; utangngai, iyakiya makalallaing ri aléku. Nauwéngkalinga oni sadda reppa'i asino-sinongngé,

¹⁷ ‘Weddigga tolinoé teppasala ri yolona Allataala? Weddigga dé' cellana ri mataé Pabbinruna?

¹⁸ Mala ata-atanna Allataala ri surugaé, dé' Natepperiwi. Mala ri malaéka-malaéka'-Na Nalolongengngi asalangngé sibawa acellangngé.

¹⁹ Apalagi mahlu' polé ri tana litaé, mahlu' awu iya weddingngé ripecca pada-pada cecco'é!

²⁰ Iyaro mahlu'é tuwoi ri éléé, namatéi kariya-riya ri arawéngngé, na untu' mannennungeng dé'na nariyéngngeranna.

²¹ Nateddénna sininna iya nappunnangiyé; maténi temmallolongeng akkaleng.’