AYUB 30 - KITTA KAREBA MADECENG

¹ Iyakiya makkekkuwangngé riyéllé'ka ri tau iya lebbi maloloé. Riyolo uwitai ambo'na mennang matuna senna untu' monrowangngi bimbala'ku silaong asu pakkampié.

² Untu' aléku dé' nakkéguna mennang nasaba acappurenni awatangeng.

³ Malupui mennang sibawa manrasa-rasa senna, angkanna manré ure marakko ri padang kessi iya masino-sinoé.

⁴ Bébbui mennang alekale ri padang kessié nainappa nanré muwi daunna iyaré'ga ure'na.

⁵ Rirukkai mennang sibawa kelli pada-pada tau rukkaé panga.

⁶ Monroi mennang ri laleng gowa-gowaé; kalebbong-kalebbong ri pepping bulué mancaji bolana.

⁷ Mowam-mowangngi mennang ri ale'é pada-pada olokolo'é, makkonrong ri yawana alekale'é ri ale'é.

⁸ Dé' mennang nakkéaseng sibawa dé' nakkéangke, sining tau iya puraé rilellung polé ri wanuwanna.

⁹ Makkekkuwangngé poléni mennang sibawa nacawa-cawaika; untu' mennang, iyya'é banna addicawakka.

¹⁰ Naita matunaka mennang sibawa maja, mala namméccui mennang rupakku.

¹¹ Nasaba naébbuka Allataala malemma dé' pakkullénna, napallessui mennang ajjallokenna.

¹² Nagasaka iyaro garembolangngé polé ri yolo, sibawa narancanai mennang asempékekku.

¹³ Napoloi mennang lalekku untu' paccappuka; dé'gaga séddi palawa-lawaiwi wettunna maggasa.

¹⁴ Pada-pada lémpe'é naleppoi mennang témbo attahanangekku; ramé-raméi mennang polé tenre'i tubukku.

¹⁵ Nasalipuriwi aléku aserongngé; padai iri angingngé, labe angke'na aléku; padai ellung laloé, teddéngngi asennangekku.

¹⁶ Makkekkuwangngé mawé'na maté; dé'gaga aringengeng untu' anrasa-rasakku.

¹⁷ Mangéttu maneng bukukku ri wennié; peddi iya tattoddo-toddo'é dé' namaélo mappésau.

¹⁸ Nacekké'ka Allataala ri ellong wajukku angkanna pakaiyakku tallombéng-lombéng ri tubukku.

¹⁹ Naggeppuwakka ri laleng bungkaé, mancajika pada-pada warowoé bawang!

²⁰ Mangobbika lao ri Iko, oh Allataala, dé' Mumappébali; rékko madosaka, dé' Mupajampangi.

²¹ Kédo mabecco'-Ko lao ri iyya, Mutenre'ka sibawa sininna awatangem-Mu.

²² Muleppessangngi angingngé lutturekka; ri laleng anginrajaé Mupakaléwa-lewa'i aléku.

²³ Uwisseng, Mutiwika ri laleng linona amaténgngé, onronna sininna iya tuwoé ripaddeppungeng.

²⁴ Magi Muluruiwi tau iya macilakaé, iya dé'é naulléi pogau'i muwi aga sangadinna méllau rikasiyangi?

²⁵ Dé'ga uteri silaong tau iya asussangngé, sibawa mamaséiwi tau iya akurangengngé?

²⁶ Uwamménasaiwi asennangengngé sibawa tajangngé, iyakiya asukkarakengngé sibawa apettangengngé polé.

²⁷ Risapé'ka ri saraé sibawa amesséngngé; polé ri essoé lao ri essoé pédé maéga uwanrasa-rasai.

²⁸ Ri laleng pettangngé, temmaccahaya, mallamparekka; tettokka ri yolona tau maégaé, méllau pattulung.

²⁹ Messé saddakku penno kasiyang pada-pada terinna asu ale'é sibawa manu'-manu' untaé.

³⁰ Mancaji malotongngi oliku; mangu tubukku nasaba semmeng.

³¹ Riyolo uwéngkalingai musi' marennué, makkekkuwangngé banna mpating simata.