AYUB 3 - KITTA KAREBA MADECENG

Addarékénna Ayub lao ri Allataala

¹ Nainappa mappammula Ayub mabbicara sibawa tanroiwi esso ajajiyanna, adanna,

^2-3 “Oh Allataala, tanroiwi esso ajajiyakku, sibawa wenni mappammulaku ritampu ri indo'ku!

⁴ Oh Allataala, pancajiwi iyaro essoé mapettang, leddai polé ri paréngngeram-Mu angkanna lennye; aja' Muleppessangngi paimeng natappa cahaya macakka.

⁵ Pancajiwi iyaro essoé malotong keppu, mapettang kape, massalawu mabbajampajang; sampoi sibawa ellung nenniya saliwu, cinaungiwi polé ri tappa mata essoé.

⁶ Sitinajai iyaro wennié ripatteddéng polé ri abbilangeng taungngé sibawa ulengngé; aja'na narisénge paimeng, aja' tona naribilang.

⁷ Leppessangngi iyaro wennié penno apettangeng dé'gaga assipammasé-maséng, dé'gaga arennung.

⁸ Eh sanroé sibawa paturuéngngi Léwiatan, pakennaini iyaro essoé sibawa tanro nenniya pahukkungeng;

⁹ aja' narapii mattappa wéttowing alaué, aja' muleppessangngi tappa éléé masiya'! Leppessangngi iyaro wennié siya-siya mattajeng apolénna essoé sibawa paddennuwang iya barué.

¹⁰ Tattanroi wenni cilakaé wettukku rijajiyang ri indo, sibawa rileppessang tanggungngi anrasa-rasangngé.

¹¹ Magi dé' umaté ri laleng parémmananna indo', iyaré'ga leppu nyawaku wettukku rijajiyang?

¹² Magi narikaddaoka ri indo'ku sibawa nariwa, enrengngé napasusu ri susunna?

¹³ Akkalarapanna iyaro wettué ulisu, matinrona nenniya mappésau sibawa tennang,

¹⁴ pada-pada sining arungngé sibawa panguwasaé ri wettu riyolo, iya patettongngé paimeng saoraja ri wettu riyolo senna.

¹⁵ Matinroka pada-pada ana' arungngé, iya lisekiyéngngi bolana sibawa péra' ulaweng.

¹⁶ Magi dé' ujaji temmakkényawa kuwammengngi namemme tinroku sibawa takkalupa?

¹⁷ Kuwaro, ri laleng kuburu'é, tau majaé dé' napogau'i majaé, sibawa koli iya cappuénna awatangenna weddingngi naleppessang aposonna.

¹⁸ Makkuwatoro tawangengngé massauni pappéneddinna, leppe polé ri paggera'na sining pajagaé.

¹⁹ Kuwaro sininna tauwé pada: iya tarompoé sibawa dé'é. Sibawa sining ataé leppe'i paccappurenna.

²⁰ Magi narileppessang tolinoé matteru tuwo manrasa-rasa? Magi tajangngé nariyabbéréyang lao ri iya masussaé?

²¹ Lebbi napojiwi mennang kuburu'é naiya waramparangngé, tajengngi amaténgngé, iyakiya teppudu-pudu lettu.

²² Nappai wedding ripéneddingi asennangengngé rékko matéi mennang sibawa rikuburu.

²³ Wettu mangolona mennang risalipuriwi ri Allataala, rikeppungngi mennang polé tulili.

²⁴ Passullé manré maddarékéka, dé' appésaunna maddararing.

²⁵ Sininna iya ubata-bataiyé kennaka, sininna iya uwétauriyé mappo'ka.

²⁶ Untu' aléku dé'gaga atennangekku manrasa-rasaka temmakképaggangkang.”