AYUB 26 - KITTA KAREBA MADECENG

Ayub

^1-2 Iyakiya makkedai Ayub, “Temmaka accamu mabbéré pattulung lao ri iyya tau malemmaé sibawa posoé!

³ Temmakka kessinna iyaro pangajaé sibawa pappagguruwangngé iya puraé muwabbéréyang lao ri iyya, tau madonggoé!

⁴ Lao rinigai iyaro ada-adammu tattuju? Niga mpérékko wéré untu' mabbicara pada-padaéro?”

Bildad

⁵ Nappébali Bildad, “Ténréi sining tauwé ri linona amaténgngé; uwai sibawa iya monroiyéngngi ténréi.

⁶ Ri yolona Allataala, tattimpa'i linona tau maté, dé' natattongko angkanna paitai ri Aléna.

⁷ Allataala pallebba'i langié ri yasé'na tasi'é, sibawa gattungngi linoé ri onrong lobbangngé.

⁸ Nalisekiwi ellungngé sibawa uwai tarébek-kébeng, iyakiya iyaro ellungngé dé' nasapé nasaba tane'na.

⁹ Nasubbui tappa-Na ri kéteng tépué ri munrinna ellung iya puraé Napallebba.

¹⁰ Nagambara'i lébuna ri tompo'na tasi'é untu' passarangngi tajangngé polé ri pettangngé.

¹¹ Rékko maggera'i sibawa sadda maddaremmeng, ténré alliri-alliri pattula'na langié.

¹² Napatunru tasi'é nasaba akuwasan-Na sibawa naajara' towi Rahab nasaba amaccan-Na.

¹³ Naseringngi langié sibawa nappase'-Na angkanna macakka senna; liman-Na mpunoi naga iya céddé'énna lari.

¹⁴ Iyakiya iya manennaro banna tanrang akuwasan-Na; banna bici-bici iya lettu'é ri daucculitta. Temmaka céddé'na pappahatta passalenna Allataala sibawa aseronna akuwasan-Na!”