AYUB 23 - KITTA KAREBA MADECENG

Ayub

^1-2 Iyakiya mappébaliwi Ayub, “Maronta'ka sibawa maddaréké lao ri Allataala; dé' uwulléi tahangngi addarékéngngé.

³ Ebara'na uwissengngi kékai onrong Naonroiyé, kuwammengngi weddikka lao sibawa siruntu Aléna.

⁴ Na ri Aléna upangolo iyaé parakaraku, polé ri témukku tassiyai ada-ada pangéwaé.

⁵ Macinnaka missengngi aga Napowada matu, sibawa pékkugiwi mabbéré pappébali.

⁶ Aga napalancara'iga matu akuwasan-Na lao ri iyya? Dé'! Pasti dé' naéngkalingai matu ada-adakku.

⁷ Dé' upasala sibawa mulléi méwaiwi aléku ri yolo-Na, naripannesaka matu leppe untu' mannennungeng.

^8-9 Usappai Allataala ri alau, yajang, yattang, manorang, iyakiya kégi-kégi dé'i gaga Allataala; sibawa dé' uwulléi runtu'i.

¹⁰ Iyakiya Naissengngi sininna lalekku makkuwatoro tungke' jongkaku. Rékko riojika pada-pada ulawengngé, pabuttiwi matu makkedaé mapaccingngi atikku.

¹¹ Mapatoka lao ri Aléna sibawa matinulu, dé' naengka uléssé polé ri laleng iya Napattentué.

¹² Sining paréntana Allataala tuli uturusiwi, élo-Na uwaccowéri, sibawa tenniya cinnaku muto.

¹³ Iyaro Allataala dé' natappinra; dé'gaga iya mullééngngi méwai. Napogau'i aga iya Naéloriyé.

¹⁴ Napajoppai matu rancana-Na untu' aléku, sibawa maéga mupa rancana-Na ri lainnaéro.

¹⁵ Nasaba métaui ri Aléna, ténréka; pédé upikkiri manengngiro, pédé métauka.

^16-17 Iya Pommakuwasaé mancuru'i sininna abaraningekku. Métauka nasaba Allataala, na tenniya nasaba pettang kape, namuni iyaro pettangngé mattulilingika, sibawa sampoi rupakku.