AYUB 22 - KITTA KAREBA MADECENG

ASSIPABBICARANG MATELLUE 22:1–27:23 Elifas

^1-2 Namakkedana Elifas, “Ri yelle'na rupa tauwé, dé' muwi séddi makkéguna lao ri Allataala. Tau iya macca senna'é, banna makkégunai untu' aléna muto.

³ Engkaga akkéguna untu' Allataala, rékko mupogau'i élo-Na? Engkaga saro ri Aléna, rékko sukkui atuwommu?

⁴ Tenniya nasaba taumu lao ri Allataala, nariteppuko sibawa riyangga pasala,

⁵ sangadinna nasaba maéga senna dosamu, sibawa maja senna'na tindakammu sibawa kédo-kédomu.

⁶ Rékko dé' naulléi silessuremmu mpajai inrenna, murampasa'i sininna pakéyanna.

⁷ Tau iya posoé dé' mupaénungngi, iya malupué dé' mupéddarai inanré.

⁸ Mupakéi jabatangngé sibawa akuwasangngé untu' sittaiwi sininna tanaé.

⁹ Tenniya bawang dé' mutulungngi sining jandaé, iyakiya ana' béué mutenre towi.

¹⁰ Rimakkuwannanaro ri seddému makkekkuwangngé pennoni jebba, sibawa tennasenna-senna atimmu nasalipuriwi tau.

¹¹ Pédé mapettang essoé, dé' mulléi makkita; tallemme'ko nappo lémpe iya maseroé.

¹² Tenniyaga Allataala monroiwi langi iya kaminang matanré, sibawa makkita liyawa, risining wéttowing iya matanré senna'é?

¹³ Iyakiya makkutanako, ‘Aga naisseng Aléna? Engkai ri munrinna ellungngé na dé' naulléi madélékiki.’

¹⁴ Muwasengngi makkedaé pakkitan-Na ritongkoi ri ellungngé sibawa makkedaé banna joppai ri pakkasésénna langié sibawa linoé?

¹⁵ Tette'koga maélo lalo ri laleng iya napilé sining tau majaé?

¹⁶ Risitta'i mennang ri wettu dé'napa nalettu wettu amaténna, sibawa riyalireng ri lémpe iya paappo'é.

¹⁷ Mennanna ritu iya baranié sampéyangngi Iya Pommakuwasaé, sibawa masengngi dé' Naulléi pogau' agi-agi lao ri mennang.

¹⁸ Padahal Allataala pura pancajiwi mennang sugi! Dé' tongeng upahangngi pikkiranna tau madorakaé!

¹⁹ Tau iya makessingngé, macawai penno arennung, rékko naitai tau majaé lolongeng pahukkungeng.

²⁰ Sininna appunnangenna tau majaé ancuru sisenni, sibawa nanréi api gangka cappu aga iya monroé mupa.

²¹ Nah, Ayub, sidaméno sibawa Puwangnge, kuwammengngi mulolongeng atennangeng. Rékko mupogau'i iyaro, pasti lolongekko asarong.

²² Tarimani aga napagguruwakko Puwangnge; taro manengngi iyaro ri laleng atimmu.

²³ Lisuno ri Puwangnge sibawa ati mariyawa jaé ri bolana sitinajani mupappésau.

²⁴ Buwanni ulawemmu iya kaminang tuléngngé; aggenrungenni lao ri borina salo iya dé'é nakkuwaéna.

²⁵ Leppessanni Iya Pommakuwasaé mancaji ulawemmu, sibawa péra'mu iya mangke senna'é.

²⁶ Naweddikko tuli mateppe lao ri Allataala, sibawa missengngi makkedaé Aléna assalenna asennangemmu.

²⁷ Rékko massempajakko, Nabaliko matu, naweddingngi murupai sininna jancimmu.

²⁸ Tuli mallolongengngi matu usahamu, sibawa tajangngé tappai matu atuwommu.

²⁹ Tau iya matempoé ripakariyawai ri Puwangnge, iyakiya iya mariyawa atié ripassalama'i.

³⁰ Natulukko matu Allataala rékko dé' mupasala, sibawa rékko mupogau'i élo-Na.”