AYUB 21 - KITTA KAREBA MADECENG

Ayub

^1-2 Nappébali Ayub, “Engkalingai aga iya upowadaé matu; banna iyaro uwéllau selaku passaléwo.

³ Palaloka massullé mabbicara, purairo weddissiko mappakatuna!

⁴ Tenniya nasibawang tolinoé massasaka, jaji dé' namaga rékko makurang sabbara'ka.

⁵ Itaka, namuhérang matu, takkamennye'ko sibawa mammekko bawamu.

⁶ Rékko upikkiri'i keadaakkué ténréka nasaba mappakatau-tauna.

⁷ Magi nariwéréng umuru malampé tau majaé ri Allataala, sibawa waramparanna mennang matteru tattamba?

⁸ Tuwoi mennang cuku' ittana angkanna naitai ana' eppona mennang mancaji battowa.

⁹ Ruma tanggana mennang amangngi nasaléwangeng; dé' napapoléi Allataala abalaé ri yasé'na.

¹⁰ Mabbija-bijai olokolo'na mennang, sibawa dé' asukkarakenna, mémmana.

¹¹ Ana'-ana'na tau majaé makkaluppekengngi sibawa marennu, pada-pada bimbala lolo iya mariyo-riyoé.

¹² Naccowéri oni rabana, suling sibawa kacapi, marowa mennang makkélong sibawa séré-séré.

¹³ Esso-essona napaccappui mennang ri laleng asennangengngé, sibawa matéi mennang penno adaméngeng.

¹⁴ Padahal purai mennang makkeda lao ri Allataala, ‘Abélaiki sibawa laono! Dé' tapaduliwi sibawa dé' tamacinna pahangngi akkatta sibawa élomu untu' atuwotta.’

¹⁵ Pikkiri'na mennang, ‘Tumaningiwi Allataala dé' gaga akkégunana, sibawa massempajang lao ri Aléna dé' gaga appalanna.

¹⁶ Tenniyaga nasaba awatangetta bawang, siduppai sininna akkattata?’ Iyakiya dé' sises-siseng usitujuiwi nasibawang laleng pikkirang sibawa pallolongeng makkuwaéro.

¹⁷ Engkaga naengka naripeddéi pajjennangenna tau majaé, nanakennai mennang abala sibawa acilakang? Engkaga naengka namacai Allataala lao ri mennang, angkanna Nahukkungngi mennang?

¹⁸ Engkaga naengka mennang pada-pada daramé sibawa awué iya nairié anginraja sibawa anging labe?

¹⁹ Makkedako, ‘Nahukkungngi Allataala ana'é nasaba dosa ambo'na.’ Iyakiya adakku: Tau madosaé ritu iya harusu'é nahukkung Allataala, kuwammengngi namainge makkedaé nasaba dosana mennang, nanakkiringengngi Allataala pahukkungen-Na.

²⁰ Leppessangngi tau madosaé tanggungngi dosana muto, leppessangngi napéneddingi caina Allataala Iya Pommatanré.

²¹ Rékko cappuni wettunna tolinoé ri linoé, napaduli mupaga naullé masennang kaluwargana ri linoé?

²² Naulléga tolinoé paggurui Allataala, na aléna Allataala madélékiwi mahlu'é ri surugaé?

^23-24 Engka tau saléwangeng gangka tuwona; matéi sibawa manyameng sibawa masagéna. Tennangngi amaténna sibawa pappénedding masennang, na tubunna penno mupi awatangeng.

²⁵ Iyakiya engkato iya maté penno apaireng, dé' naengka napéneddingiwi asennangengngé.

²⁶ Iyakiya ri kuburu'é, pada-padai mennang léwu; rikatulung ri ule'é sibawa latié.

²⁷ Mémeng uwisseng aga iya mupikkiri'é sibawa sininna ja iya murancangngé.

²⁸ Pakkutanamu, ‘Kégai bolana panguwasaé iya pogau'é pangkaukeng madoraka?’

²⁹ Dé'paga mutanaiwi tau iya maléwe'é lao? Dé'ga mumateppe ri karéba iya nalaporo'é mennang?

³⁰ Adanna mennang, ‘Ri esso mabbéréna Allataala pahukkungeng, sining tomajaé ripassalama'i matu.’

³¹ Dé' gaga iya méwaéngngi kédo-kédona; dé' gaga iya wale'éngngi jana.

³² Ritiwii ri kuburu'é, sibawa riputtama ri kalebbongngé; rijagai tampunna sibawa rijampangi.

³³ Massebbu tauwé tinrosiwi ujuna; masommo towi tanaé témpungiwi.

³⁴ Jaji, iyaro passaléwomu kosong sibawa sininna pappébalimmu bellé!”