AYUB 16 - KITTA KAREBA MADECENG

Ayub

^1-2 Iyakiya mappébaliwi Ayub, “Biyasani uwéngkalinga pallolongeng makkuwaéro; passaléwomu banna passissa.

³ Uppannapa iyaro omong kosongngé mupappésau? Aga pakérék-kérékko untu' mappébali?

⁴ Akkalarapanna ikoé iyya, na iyya iko, wedding tokka mabbicara pada-pada iyaro. Ulémpekiko sibawa ada-ada; upaccilic-cilingngi matu ulukku.

⁵ Upakkasse'i matu atimmu sibawa maddupa-rupang tangnga; ada-adakku mabbéréi matu passaléwo.

⁶ Rékko mabbicaraka, dé' nasoro anrasa-rasakku; rékko mammekkoka, aga tona akkégunana?

⁷ Allataala, mébbuka poso; sininna kaluwargaku purani napaccappu.

⁸ Naéwaka sibawa natikkekka. Makkekkuwangngé makojo marakkoni tubukku, na lao ri maéga tau iyanaro buttinna makkedaé puraka madosa.

⁹ Najjamerru Allataala sapé'-sapé'i tubukku; naitaka sibawa nabenci senna.

¹⁰ Naéllé'ka sining tauwé sibawa bawa tattimpa malowang; nakatulukka sibawa naleppa'i rupakku.

¹¹ Nabbéyakka Allataala lao ri tau madorakaé; Napasempé'ka ri limanna tau madorakaé.

¹² Atuwokku ri yolona amang sibawa saléwangeng, iyakiya nagasaka Allataala sibawa tennasenna-senna. Natikkengngi cekkokku sibawa Naggenrungekka; Napancajika acculé-culénna untu' mallati.

¹³ Temmarasa messé matterui napanaka, angkanna tassiya lise babuwaku.

¹⁴ Maggasai pada-pada séddié pejuwang, sibawa loka makkolik-koling.

¹⁵ Pakéka karung tanrang amesséng, sibawa tudang ri laleng awué nasaba ricauka.

¹⁶ Macella rupakku nasaba terika; boro amporo matakku sibawa magawu.

¹⁷ Iyakiya dé' upogau' ateddekeng; manessani malemmpu sempajakku lao ri Puwangnge.

¹⁸ Eh lino, aja' musubbui jaé lao ri aléku; aja' mupammekkoi kelli'ku méllau adélékeng.

¹⁹ Uwisseng makkedaé Pangéwangekku engkai ri surugai; mabbéréi asabbiyang makkedaé dé' umadosa.

²⁰ Naéllékéllé'ka sellao-sellaoku sibawa nacawa-cawai; mangoloka ri Allataala méllau bantuwang uterito.

²¹ Tennapodo aléna Allataala méwaika ri yolo-Na, pada-pada séddié tau iya macenningngé méwaiwi sahaba'na.

²² Taut-taukku iya monroé dé'na namaégana; dé'na namaittana ulao nadé'na ulisu matu paimeng.