Biblia Todo Logo
အွန်လိုင်း သမ္မာကျမ်းစာ

- ကြော်ငြာတွေ -

AYUB 12 - KITTA KAREBA MADECENG


Ayub

1-2 Nappébali Ayub, “Mémeng, iko wakkélékiwi rupa tauwé. Rékko matéko, maté towi pangissengengngé.

3 Iyya tolinoto iya engkaé akkalenna; sininna iya mupowadaéro upahanni. Nainappani, niga dé' naisseng manengngi iyaro? Jaji, aja' muwasengngi mupacaurika!

4 Ricawa-cawaika ri sellaoé sibawa sahaba'é, padahal iyya'é tongeng sibawa dé' sala-salanna. Riyolo nabaliwi Allataala sempajakku, rékko mangobbika méllau ribantu.

5 Mupakatunai tau macilakaé, na atuwommu amangngi; tau iya mawé'é sempé muunrui.

6 Iyakiya atuwonna parampo'é dé' nariyancang; tau iya baraniyé méwai Allataala, tuwoi amang. Padahal déwata iya nattuwangngé mennang, banna awatangeng riyalé bawang.

7 Akkutanano lao ri manu'-manu'é sibawa olokolo laingngé nanawérékko matu mennang pappagguruwang.

8 Ellauno pappakatajang ri mahlu'é ri linoé sibawa ri tasi'é, namutarima matu pappakatajang.

9 Niga ri yelle'na manenro dé' namaingekiwi, makkedaé pappancajinna mennang iyanaritu aléna Allataala?

10 Naatoro'i atuwonna sininna mahlu' iya engkaé; makuwasai lao ri nyawana tungke' tolinoé.

11 Pada-pada lilaku napoji kanyaméi inanré iya manyamengngé, makkuwaniro daucculikku napoji méngkalinga ada-ada.

12-13 Karébanna, engkai pangissengengngé ri tau iya malampé umuru'é, iyakiya pangissengeng sibawa awatangengngé engkai ri Allataala bawang. Karébanna pappéjeppué engkai ri tau macowa senna'é, iyakiya pappéjeppué sibawa akuwasangngé engka towi ri Allataala!

14 Aga Nabongkara dé' naulléi patettongngi paimeng niga Natawang dé' naulléi leppe paimeng.

15 Natéppo'i uwai, namarakko sibawa makabuttu maneng; Naleppessangngi massolo, napaappo lémpe'é!

16 Iyaro Allataala mawatangngi, masse sibawa tassebbo! Topabengnguwangngé sibawa ribengnguwangngé engkai ri yawa akuwasan-Na.

17 Nareddu'i pangissengenna sining panguwasa pamaréntaé, sibawa sining pamimpingngé Napancajiwi addicawang.

18 Napasempé'i arungngé sibawa Natawangngi mennang;

19 Napakariyawai imang-ngimangngé sibawa sining tomariyoloé.

20 Napammekkoi tau iya maccaé mabbicara, Nareddu'i pangissengenna sining tomatowaé.

21 Napakasirii tau iya mariyoloé; Naalai akuwasanna mennang iya makuwasaé.

22 Natajangiwi onrong-ngonrong iya mapettangngé; Natappai wajo-wajo malotong-lotongngé.

23 Naébbui bangsa-bangsaé mabbija-bija sibawa madécéng, nainappa Napaccappu mennang gangka ancuru.

24 Napancajiwi sining pamimpingngé alippuwang, angkanna sollé mennang temmakkéakkatta.

25 Maggarambangngi mennang ri laleng pettangngé, sibawa tassulus-sulung samanna tau mabo' énungeng.

ကြှနျုပျတို့နောကျလိုကျပါ:



ကြော်ငြာတွေ