AYUB 10 - KITTA KAREBA MADECENG

¹ Cauna sibawa maciddi'na sibawa atuwokku, nautiri'i apairenna nyawaku.

² Oh Allataala, aja' Mupassalaka; pakatajanni magi Muéwaka.

³ Aga sarona Mutenre makkuwaiyé, sibawa mabbéréyangngi wassélé ébbu-Mu muto? Aga sarona rékko Musokongngi pallolongenna sibawa rancanana sining tau majaé?

⁴ Pakkitam-Mu dé' napada pakkitanna tolinoé

⁵ sibawa umuru'-Mu dé' nasipponco umuru'na.

⁶ Rékko makkuwaitu, magi Mucuccungngi sininna dosaku? magi Mulellungngi tungke' asalakku?

⁷ Sitongenna Muwisseng sibawa maingé, makkédaé dé' upasala, iyakiya tongeng. Muwisseng makkedaé muwi séddi tau dé'to namampu passalama'ka polé ri limam-Mu.

⁸ Iyya'é riwinruka ri limam-Mu, masa makkekkuwangngé maélo-Ko paccappuka?

⁹ Engngerangngi makkedaé polé ri tana litaé Mupancajika! Masa Muwébbuka lisu mancaji awu?

¹⁰ Mupakkulléi ambo'ku pancajika sibawa Mupawekke'ka ri laleng parémmananna indo'.

¹¹ Mubentu'i tubukku sibawa buku-buku nenniya ure; Muwéréngngi juku bukukku sibawa oli pabbebbe.

¹² Muwérékka atuwong; Muwamaséika, Mujagaiwi nyawaku sibawa pappiyara-Mu.

¹³ Iyakiya makkekkuwangngé uwisseng makkedaé sikuwaéro ittana, mammekko-mekko-Ko pura rancanai acilakakku.

¹⁴ Mujagaika rékko pogau'ka asalang kuwammengngi weddingngi Musampéyang mabbéré paddampeng.

¹⁵ Rékko pogau'ka dosa, macilaka tongeng totoku! Iyakiya rékko dé' cellana pangkaukekku, tette'ka riyangga pogau' dosa! Dé' ubarani makkai ulukku, saba' marasa messé sibawa ripakatuna.

¹⁶ Rékko lolongekka wassélé, namuni dé' nasiyaga, Mulellukka pada-pada singaé. Sibawa Muwappaitangngi paimeng akuwasam-Mu, banna untu' péttaurika.

¹⁷ Tuli pangolo-Ko sabbi méwaka; sibawa pédé battowai cai-Mu lao ri iyya. Mupangarai pasukang-pasukang barué untu' gasaka sibawa musuka.

¹⁸ Magi Muleppessakka jaji ri linoé? Lebbi kessingngi bawang matéka bawang ri wettu dé'na naitai tolinoé!

¹⁹ Na samanna dé' naengkaka rijajiyang, saba' polé ri parémmanangngé matteru rikuburu.

²⁰ Ah, dé'na namaittana umaté matu, naleppessanni alé-aléku, kuwammengngi uwulléi péneddingiwi wettukku iya monroé mupaé.

²¹ Dé'na namaittana ulao sibawa dé' nalisu, mattuju ri wanuwa iya mapettangngé sibawa makalemmeng senna'é,

²² wanuwa iya mapettangngé, penno wajo-wajo sibawa akacaungeng, kégi cakkaé sinrupai sibawa pettangngé.”