AYUB 1 - KITTA KAREBA MADECENG

Ricobainna Ayub ri Ibillisi'

¹ Ri tana Us monroi séddi tau worowané riyasengngé Ayub. Nasompai Allataala sibawa matinulu na lao ri Aléna. Séddiwi tau iya makessing atié sibawa dé' napogau' ja muwi céddé.

² Mappunnaiwi pitu ana' worowané sibawa tellu ana' makkunrai.

³ Ri lainnaéro mappunnaiwi maéga ata, 7.000 kajunna bimbala, 3.000 kajunna unta, 1.000 kajunna saping, sibawa 500 kajunna kaleddé. Riponcoki adaé, aléna iyanaritu tau kaminang sugi ri yelle'na pabbanuwaé ri daéra Alau.

⁴ Iya pitu ana' worowanéna Ayub mappunnai abiyasang untu' pakangka pésta ri bolona tungke'-tungke' secara makkaléléng. Ri péstaéro iya tellu ana' makkunrainna Ayub riundang towi, nainappa mennang manré ménung maneng sisama.

⁵ Purana tungke' pésta, tuli moto'i Ayub maélé nanakkasuwiyangeng akkarobangeng untu' tungke'-tungke' ana'na kuwammengngi nariyaddampengeng ri Puwangnge. Saba' mappikkiri'i Ayub, weddissa jaji ana'-ana'naro madosani sibawa napakatunai Allataala tennattungkai.

⁶ Riséuwaé esso mangoloni mahlu'-mahlu' surugaé ri Puwangnge, na Ibillisi' engka towi ri yelle'na mennang.

⁷ Makkutanani Puwangnge ri aléna, “Polé kégako?” Nappébali Ibillisi', “Silalona atatta sollé lao tulili sibawa jalajja'i sininna linoé.”

⁸ Namakkutana Puwangnge, “Puraniga mupénessai atak-Ku Ayub? Ri sininna linoé dé'gaga tau iya makkuwaé matinuluna sibawa makessing atinna pada-pada aléna. Nasompa-Ka sibawa dé' sises-siseng napogau'i majaé.”

⁹ Iyakiya mappébaliwi Ibillisi', “Tentuni nasompa-Ko Ayub nasaba tarimai pamale.

¹⁰ Tuli Mulinrungiwi aléna, kaluwargana sibawa sininna asugirenna. Mubarakkakiwi jama-jamanna sibawa Muwéréngngi maéga olokolo, genne untu' pennoiwi sininna wanuwaé.

¹¹ Iyakiya akkalarapanna sininna asugirennaro Muwalai, pasti matterui tanroi-Ko!”

¹² Namakkeda Puwangnge lao ri Ibillisi', “Makessinni, pogau'ni agi-agi lao ri sininna asugirenna Ayub, assaleng aja' mupeddiriwi!” Nalaona Ibillisi' polé ri yolona Puwangnge.

Ripaccappuna ana'-ana'na sibawa asugirenna Ayub

¹³ Siyagangngaré wettu ri munrinna mattengngangngi ana'-ana'na Ayub mappésta ri bolana kakana iya macowaé.

^14-15 Tappa engka muna séddi suro polé lari-lari lao ri bolana Ayub sibawa laporo'i, “Puwang, poléi tau Syébaé gasaki wettunna sining sapingngé mattengngang rakkalai dare'é na sining kaleddé'é mattengngangngi mabbella ri seddéna. Narampasa'ni mennang iyaro sining olokolo'é, sibawa mpunoi ata-atanna Puwang iya engkaé kuwaro. Banna atatta bawang leppe angkanna weddingngi laporo'i ri Puwang.”

¹⁶ Wettunna mabbicara mupa, poléni ata maduwaé makkeda, “Sining bimbala'na Puwang sibawa sining pakkampié nakennai letté angkanna maté maneng. Banna atatta bawang leppe angkanna weddingngi laporo'i ri Puwang.”

¹⁷ Dé'pa napaja mabbicara, wettunna ata matellué polé mabbirittangngi, “Tellu pasukang parrampo Kasdim pura rampasa'i sining untana Puwang sibawa mpunoi ata-atanna Puwang. Banna atatta bawang leppe angkanna weddingngi laporo'i ri Puwang.”

¹⁸ Wettunna mabbicara mupi, poléni ata laingngé tiwi karéba, “Ana'-ana'na Puwang mattengngangngi mappésta ribolana ana'na Puwang macowaé.

¹⁹ Tappa polé muni anginrajaé mangiri polé ri padang kessi'é nanakennai bolaéro angkanna maruttung sibawa mpuno manengngi ana'na Puwang. Banna atatta ritu leppe angkanna weddingngi laporo'i ri Puwang.”

²⁰ Natettonna Ayub nanasapé'i pakéyanna tanrang masara. Nacukkuru'ni gemme'na, nainappa suju'

²¹ sibawa makkeda, “Rijajiyakka temmappunnai agi-agi, na matéka matti temmappunnaito agi-agi. Puwangnge pura mabbéréyangngi na Puwangnge muto pura malai. Ripojiwi asen-Na!”

²² Jaji, namuni nakenna Ayub sininna abalaéro, dé' napogau' dosa sibawa dé' napassalai Allataala.