AWATINGENG 5 - KITTA KAREBA MADECENG

Sempajang méllau paressé babuwa

¹ Engngerangngi, oh Puwang, aga kajajiyangngé ri idi. Tiroki, sibawa itani atunatta.

² Sempé'ni waramparang manata ri limanna tau laingngé, sining bolata naonroini tau laingngé.

³ Purani riyuno ambo'ta ri balié; makkekkuwangngé jandani indo'ta, sibawa béuki.

⁴ Uwai rinungngé sibawa aju tunungngé harusu'ki melliwi.

⁵ Pada-pada olokolo'é, ripassa majjama matane, posoki, iyakiya dé' nawérékki wettu mappésau.

⁶ Laoki maréllau-éllau ri Maséré, méllauki inanré ri Asyur.

⁷ Madosai toriyolota, dé'ni gaga makkekkuwangngé; iyakiya harusu'ki manrasa-rasa, nasaba dosa-dosana mennang.

⁸ Naparéntaki sining tau iya dé'é nalebbi naiya ataé; dé'gaga makuwasa paleppe'ki polé ri mennang.

⁹ Ri saliweng kota, mallamparengngi pabbunoé; riyancangngi nyawata wettutta sappa inanré.

¹⁰ Manrasa-rasaki alupureng, angkanna mabbara olita pada-pada addellangengngé.

¹¹ Rigau' majariwi sining makkunrai Siongngé. Napéjariwi sining ana'daraé ri désa-désana Yéhuda.

¹² Ritikkengngi sining pamimpitta sibawa rigattung, sining tomacowata dé'na naripoji.

¹³ Napassai mappallaung sining kallolota ri allélurengngé, ana'-ana' worowané ritenre'i ri éssang ajunna angkanna marenne.

¹⁴ Sining tomatowaé dé'na naddeppungeng ri pintu gerbang kotaé, dé'na napaéngkalingana musi'é ri yelle'na kalloloé.

¹⁵ Ateddéngenni asennangeng; tappinrani séré-séré mancaji abbaratang.

¹⁶ Dé'ni gaga abangkaketta, macilakaki nasaba madosaki.

^17-18 Masino-sinoni Bulu Sion sibawa risalai; mallampareng asu ale'é kuwaro. Rimakkuwannanaro ancuru'ni atitta, teriki narapi massalawu pakkitatta.

¹⁹ Iyakiya Iko, oh Puwang, tette'ki makuwasa, mapparénta-Ko mannennungeng.

²⁰ Masa Musalaiki makkuwaro ittana? Makkulléga Muwallupaiki sillampé wettué?

²¹ Oh Puwang, tiwiki lisu ri alé-Mu; maéloki lisu ri alé-Mu! Palisuni keadaatta pada-pada riyolo.

²² Iyaré'ga purani Muwabbéyang siseng? Dé'ga paggangkanna cai-Mu lao ri idi?