ASSURENG 7 - KITTA KAREBA MADECENG

¹ Makkedai Puwangnge lao ri Musa, “Maélo-Ka pancajiko pada-pada Allataala ri yolona arungngé, na silessuremmu Harun mabbicarai matu lao ri aléna selaku nabimmu.

² Palettukengngi Harun sininna iya Uparéntangngékko. Suroi Harun powadangngi arungngé makkedaé harusu'i napalalo tau Israélié salaiwi wanuwa Maséré.

³ Iyakiya maélo-Ka pancajiwi arungngé matedde ati. Dé' nabati-batiko matu, namuni papolé-Ka maéga abala ri Maséré.

⁴ Rimakkuwannanaro Uhukkungngi matu Maséré sibawa pahukkungeng iya matane'é, nainappa Utiwi sininna bangsa Israélié, umma'-Ku, massu polé ri wanuwaéro.

⁵ Nanaissenni matu tau Maséré'é makkedaé Iyya'naé Puwang, wettuk-Ku hukkungngi mennang sibawa tiwii Israélié massu polé ri wanuwanna mennang.”

⁶ Napogau'ni Musa sibawa Harun aga iya napparéntangngé Puwangnge.

⁷ Umuru'na Musa 80 taung na Harun 83 taung wettunna mennang mangolo ri arung Maséré.

Tekkenna Harun

⁸ Makkedani Puwangnge lao ri Musa sibawa Harun,

⁹ “Rékko naéllauko arungngé mébbu anu makalallaing selaku butti, suroi Harun malai tekkenna nanappéyangngi ri tanaé ri yolona arungngé. Iyaro tekkengngé tappinrai matu mancaji ula.”

¹⁰ Nanalaona Musa sibawa Harun mangolo ri arungngé nanapogau'i mennang aga iya napparéntangngé Allataala. Nappéyanni Harun tekkenna ri tanaé ri yolona arungngé sibawa sining pegawénna, natappinrana iyaro tekkengngé mancaji ula.

¹¹ Rimakkuwannanaro naobbi toni arungngé sining tau maccaé sibawa ahli-ahli passéhéré'na, nanapogau' toni makkuwaéro sibawa pangissengeng mappalennye'-lennye'na mennang.

¹² Nappéyanni tekkenna mennang ri tanaé natappinrana iyaro sining tekkengngé mancaji ula. Iyakiya tekkenna Harun naemme'i tekkenna mennang.

¹³ Namuni makkuwaro, tette'i arungngé matedde ati sibawa dé' namaélo bati-batiwi ada-adanna Musa sibawa Harun, pada-pada iya pura napowadaé Puwangnge.

Nakennana abala Maséré Mancaji darana uwai

¹⁴ Nainappa makkeda Puwangnge lao ri Musa, “Iyaro arungngé matedde ati senna; dé' namaélo palaloi bangsa Israélié lao.

¹⁵ Rimakkuwannanaro laono musitangngi maélé, wettunna nonno ri Salo Nil. Tiwii tekkeng iya weddingngé mancaji ularo sibawa tajengngi apolénna ri wiring saloé.

¹⁶ Powadangngi iyaro arungngé: Puwang, Allataalana tau Ibranié, suroka untu' palettu'i ri Puwakku kuwammengngi napalaloi umma'-Na lao untu' massompa ri Aléna ri padang kessi'é. Iyakiya lettu makkekkuwangngé dé' namaélo méngkalingai Puwakku.

¹⁷ Rimakkuwannanaro makkeda makkuwaiyé Puwangnge, ‘Polé ri aga iya Upogau'é matti, muwissengngi matu makkedaé Iyya'na Puwang.’ Uwunrui matu uwaina saloé sibawa tekkengngéwé, natappinra matu uwai mancaji dara.

¹⁸ Matéi matu sining balé, sibawa iyaé saloé makebbongngi matu, angkanna dé' nawedding naénung uwaina bangsa Maséré'é.”

¹⁹ Nakkeda Puwangnge lao ri Musa, “Suroi Harun malai tekkenna nanatanréyangngi ri yasé'na sininna saloé, sépe'-sépe'é sibawa sining kolangngé ri Maséré. Mancaji darai matu uwaina, sibawa ri sininna wanuwaé engka matu dara, mala ri laleng sining tong ajué sibawa sining bémpa batué.”

²⁰ Napogau'ni Musa sibawa Harun aga iya napparéntangngé Puwangnge. Ri yolona arungngé sibawa sining pegawénna, nakkani Harun tekkenna nanaunrui uwaina Salo Nil, natappinrana uwaina mancaji dara.

²¹ Maténi sining balé ri laleng saloéro, sibawa makebbong senna'ni baunna, angkanna dé' nawedding naénung tau Maséré'é iyaro uwai. Ri sininna tana Maséré engka dara.

²² Iyakiya sininna ahli passéhéré'na Maséré napogau' towi makkuwaéro sibawa pangissengeng mappalennye'-lennye'na mennang, angkanna tette'i arungngé matedde ati. Pada-pada iya puraé napowada Puwangnge, dé' namaélo arungngé méngkalingai Musa sibawa Harun.

²³ Mala lisui ri saorajaé tennabati-bati iyaro kajajiyangngé muwi céddé.

²⁴ Kali manenni kalebbong sininna tau Maséré'é ri wiring saloé untu' sappa uwai rinung, nasaba iyaro uwaina saloé dé' nawedding riyénung.

²⁵ Labe'ni pitungngesso purana Puwangnge natanroi Salo Nil.