ASSURENG 6 - KITTA KAREBA MADECENG

Riyobbina Musa ri Allataala

¹ Mabbicarani Allataala lao ri Musa, “Iyya'na Puwang.

² Mappaitak-Ka alé lao ri Abraham, Ishak sibawa Yakub selaku Allataala Iya Pommakuwasaé, iyakiya dé' Uwappaissengeng alé lao ri mennang sibawa aseng ‘Puwang’.

³ Pakangka tok-Ka assijancing sibawa mennang. Majjanci-Ka mabbéréyangngi matu wanuwa Kanaan lao ri mennang, wanuwa onronna mennang riyolo tuwo selaku tau laing.

⁴ Uwéngkalingani addarékénna tau Israélié iya ripowataé ri bangsa Maséré'é, na-Uwéngngeranni iyaro jancik-Ku.

⁵ Jaji appallebbangenni lao ri bangsa Israélié makkedaé makkeda-Ka lao ri mennang: Iyya'na Puwang; Upaleppe'ko matu polé ri angatangenna bangsa Maséré'é. Uwappaitangngi matu akuwasak-Ku iya maseroé untu' passalama'ko sibawa pateppaiwi pahukkungeng matane bangsa Maséré'é.

⁶ Upancajiko matu umma'-Ku, na Iyya mancaji Allataalamu. Namuwissengngi matu makkedaé Iyya'naé Puwang, Allataalamu, iya paleppe'ékko polé ri angatangengngé ri Maséré.

⁷ Utiwiko matu ri wanuwa iya Uwajjanciyangngé sibawa tanro lao ri Abraham, Ishak sibawa Yakub; iyaro tanaé Uwérékko mancaji appunnangeng ri alému. Iyya'na Puwang.”

⁸ Iya manennaro pasenna Puwangnge napalettu'i Musa lao ri bangsa Israélié, iyakiya dé' namaélo mennang bati-batiwi Musa, nasaba angatangeng iya mabecco'éro pura mébbui mennang pettu paddennuwang.

⁹ Nainappa makkeda Puwangnge lao ri Musa,

¹⁰ “Laono mangolo ri arung Maséré namupowadai makkedaé harusu'i palaloi bangsa Israélié salaiwi wanuwanna.”

¹¹ Iyakiya mappébaliwi Musa, “Tau Israéliénna bawang dé' namaélo méngkalingaka. Pékkugi makkullé arung Maséré'é méngkalingai tau iya dé'é namacca mabbicara pada-pada iyya?”

¹² Makkuwaniro Puwangnge suroi Musa sibawa Harun untu' palettu'i lao ri bangsa Israélié sibawa arung Maséré makkedaé risuroi mennang untu' pimpingngi bangsa Israélié massu polé ri Maséré.

Assossorenna Musa sibawa Harun

¹³ Iyanaé assossorenna Musa sibawa Harun: Rubén, ana' macowana Yakub, mappunnaiwi eppa ana' worowané: Hénokh, Palu, Hézron sibawa Karmi. Mennang ritu néné-nénéna polé risining appangngé ri laleng suku Rubén.

¹⁴ Siméon sibawa bainéna séddiwi makkunrai Kanaan, mappunnaiwi enneng ana' worowané: Yémuél, Yamin, Ohad, Yakhin, Zohar sibawa Saul. Mennang ritu néné-nénéna polé risining appangngé ri laleng suku Siméon.

¹⁵ Léwi mappunnaiwi tellu ana' worowané: Gérson, Kéhat sibawa Mérari; mennang ritu néné-nénéna polé ri appangngé ri laleng suku Léwi. Umuru'na Léwi narapii 137 taung.

¹⁶ Gérson mappunnaiwi duwa ana' worowané: Libni sibawa Siméi; mappunnaiwi mennang maéga wija.

¹⁷ Kéhat mappunnaiwi eppa ana' worowané: Amram, Yizhar, Hébron sibawa Uziél. Umuru'na Kéhat narapii 133 taung.

¹⁸ Mérari mappunnaiwi duwa ana' worowané: Mahli sibawa Musi. Iyanaro sining appangngé ri laleng suku Léwié sibawa wija-wijanna mennang tungke'-tungke'.

¹⁹ Amram kawingngi sibawa Yokébéd, anri makkunrainna ambo'na, na ana'-ana'na mennang iyanaritu Harun sibawa Musa. Amram tuwoi 137 taung.

²⁰ Yizhar mappunnaiwi tellu ana' worowané: Korah, Néfég sibawa Zikhri.

²¹ Uziél mappunnai towi tellu ana' worowané: Misaél, Elsafan sibawa Sitri.

²² Harun kawingngi sibawa Eliséba, ana' makkunrainna Aminadab; massilessureng towi Eliséba sibawa Nahason. Eliséba jajiyangngi Nadab, Abihu, Eléazar sibawa Itamar.

²³ Korah mappunnaiwi tellu ana' worowané: Asir, Elkana sibawa Abiasaf. Mennang ritu néné-nénéna polé ri appanna Korah.

²⁴ Eléazar, ana' worowanéna Harun, kawingngi sibawa sala séddinna ana'na Putiél, na ana'na mennang iyanaritu Pinéhas. Iyanaro sininna kapala appanna sibawa kapala kaluwargana ri laleng suku Léwi.

²⁵ Harun sibawa Musa ritu iya riparéntangngé ri Puwangnge untu' tiwii sining tau Israélié massu polé ri Maséré.

²⁶ Sipadduwai mennang mangolo ri arung Maséré kuwammengngi napaleppe'i tau Israélié.

Mabbéréna Puwangnge parénta lao ri Musa sibawa Harun

²⁷ Wettunna Puwangnge mabbicara sibawa Musa ri Maséré,

²⁸ Makkedai Puwangnge, “Iyya'na Puwang. Palettukengngi arung Maséré sininna iya puraé Upowadakko.”

²⁹ Iyakiya mappébaliwi Musa, “Puwang, Muwisseng makkedaé dé' umacca mabbicara. Pékkugi makkullé arungngé maélo méngkalingaka?”