ASSURENG 40 - KITTA KAREBA MADECENG

Ripatettonna Kémana Puwangnge sibawa ripallainna untu'

¹ Makkedai Puwangnge lao ri Musa,

² “Patettongngi Kéma-Ku ri tanggala séddi uleng séddi.

³ Puttama'i ri lalenna Petti Assijancingngé iya mallise'é Seppulo Parénta sibawa pasanni kaing pattongkoé ri yolona.

⁴ Taroi méjangngé sibawa passakke'na. Puttama towi ajé lampué sibawa pasangngi lampunna.

⁵ Palénne'i mézba ulaweng onrong mattunu dupaé ri yolona Petti Assijancingngé, namugattungngi kaing paddenringngé ri sumpanna Kémaé.

⁶ Palénne'i mézba untu' akkarobangeng ritunué ri yolona sumpang Kémaé.

⁷ Taroi kullang uwai ri pallawangenna Kémaé sibawa mézbaéro, nainappa muliseki sibawa uwai.

⁸ Nainappa mupasang téndaé mattulilingiwi seddéna Kémaé, sibawa gattungngi kaing paddenringngé ri pintu gerbang seddéna.

⁹ Nainappa Kémaé sibawa sininna passakke'na harusu'i muwakkasuwiyangeng lao ri Iyya sibawa cara minnyakiwi sibawa minnya upacara, na iya manennaro ripallaingngi untu' Iyya.

¹⁰ Akkasuwiyangengngi mézbaé sibawa sininna passakke'na sibawa caraéro, kuwammengngi na iya manenna ripallaingngi untu' Iyya.

¹¹ Ebbu towi makkuwaro kullang uwai sibawa pallanggana.

¹² Purairo, suroi Harun sibawa ana'-ana'na polé ri sumpang Kémaé sibawa bissaiwi aléna.

¹³ Pasangngi pakéyang imangngé ri Harun, sibawa minnyakiwi kuwammengngi ripallaingngi untu' tumaningi-Ka selaku imang.

¹⁴ Nainappa musuro ana'-ana'na maddeppé, namupapasangiwi kaméja ri mennang.

¹⁵ Nainappa muminnyaki mennang pada-pada muminnyakinna ambo'na, kuwammengngi naullé towi mennang tumaningi-Ka selaku imang. Nasibawang upacara minnya'éro, massossorengngi sukunna makkatenningngi jabatang imangngé.”

¹⁶ Napogau'ni Musa sininna pada-pada iya napparéntangngé Puwangnge.

¹⁷ Na ri tanggala séddi uleng séddi ri laleng taung maduwaé nasalainnana bangsa Israélié Maséré, ripasanni Kémana Puwangnge.

¹⁸ Napalénne'ni Musa sining pallanggana, patettongngi sining rangkana, pasangngi sining ajunna mappoloé, sibawa patettongngi sining allirinna.

¹⁹ Nainappa napallebba pabbingeng Kémaé sibawa pattongko bagiyang saliwenna ri yasé'na pada-pada iya napparéntangngé Puwangnge.

²⁰ Nainappa naputtama iya duwa batuéro ri laleng Petti Assijancingngé. Nainappa napasang Musa pattongkona Pettiéro sibawa naputtama'i aju pabbuléna ri laleng tolinna.

²¹ Nainappa nataro iyaro Pettié ri laleng Kémaé sibawa gattungngi kaing passampona ri yolona, pada-pada iya napparéntangngé Puwangnge lao ri aléna.

²² Nainappa nataro Musa méjangngé ri laleng Kémaé, ri bagiyang manoranna ri seddé saliwenna kaingngé,

²³ nainappa ripalénne roti ripatalaé ri yasé'na méjangngéro.

²⁴ Ajé lampué ripalénne'i ri laleng Kémaé, ri bagiyang yattang, siyolong sibawa méjangngéro,

²⁵ nainappa ripalluwa iyaro sining lampué ri yolona Puwangnge.

²⁶ Mézba ulawengngé ritaroi ri laleng Kémaé, ri yolona kaingngé,

²⁷ naritunu dupa mabaué pada-pada iya napparéntangngé Puwangnge lao ri Musa.

²⁸ Musa gattungngi kaing pallawa sumpanna Kémaé,

²⁹ na ri yolona sumpangngéro nataroi mézbaé untu' akkarobangeng ritunu. Ri yasé'na mézbaéro riyakkasuwiyangengngi akkarobangeng ritunué sibawa akkarobangeng ripatalaé.

³⁰ Kullang gessaé nataroi ri pallawangenna Kémaé sibawa mézbaé, nanalisekiwi sibawa uwai.

³¹ Musa, Harun sibawa ana'-ana'na bissaiwi limanna sibawa ajéna kuwaro,

³² sises-siseng mennang muttama ri laleng Kémana Puwangnge iyaré'ga maddeppériwi mézbaé.

³³ Ri mattulilinna Kémaé sibawa mézbaéro napasangngi Musa téndaé, nainappa nagattung kaing pallawana pintu gerbang seddé Kémaé. Natépu manenna sininna jama-jamangngéro.

Natongkona ellung Kémana Puwangnge

³⁴ Nananonnona ellungngé tongkoi Kémana Puwangnge, sibawa pennoni iyaro Kémaé sibawa cahaya ahadérékenna Puwangnge.

³⁵ Narimakkuwannanaro dé'na naulléi Musa muttama ri laleng Kémaéro.

³⁶ Sises-siseng iyaro ellungngé ménré ri yasé'na Kémana Puwangnge, nabongkara'i bangsa Israélié akkémanna mennang untu' létté ri onrong laingngé.

³⁷ Iyakiya rékko iyaro ellungngé dé' naénré, dé' mennang najoppa polé kuwaro.

³⁸ Ri wettu solléna bangsa Israélié, engkai Puwangnge ri Kémaéro ri laleng rupa ellung ri essoé sibawa ri laleng rupa api ri wennié.