ASSURENG 38 - KITTA KAREBA MADECENG

Mébbui mézbaé untu' akkarobangeng ritunué

¹ Malani Bézaleel aju akasia, nainappa naébbu mézba untu' akkarobangeng ritunué. Iyaro mézbaé massulapa'i, lampéna sibawa sakkana tungke'-tungke' 2,2 météré, sibawa tanréna 1,3 météré.

² Ri tungke' sunna ri yasé riyébburengngi tanru iya masséddié sibawa mézbaéro. Iya manenna rilapiriwi sibawa gessa.

³ Naébbu towi pamuttu-pamuttué, sikopangngé, mangko'-mangko'é, sondo'-sondo'é sibawa onrong apié. Sininna iyaro paréwaé riyébbui polé ri gessaé.

⁴ Naébburengngi anengeng kawe polé ri gessaé iya nabbebbekengngé ri mézbaé bagiyang yawana, tanréna sitengngana polé ri tanréna mézbaé.

⁵ Nainappa naébbureng eppa toling untu' aju pabbuléna polé ri iya eppa sunna ri yawanaro.

⁶ Iyaro aju pabbuléé naébbui polé ri aju akasiaé iya rilapiriyé sibawa gessa.

⁷ Nainappa iya duwa aju pabbulééro, riputtama ri laleng tolit-toling ri iya duwa benrénna mézbaéro. Iyaro mézbaé naébbui polé ri pépengngé sibawa bagiyang lalenna makkalebbong.

Mébbui kullang gessaé

⁸ Bézaleel mébbui kullang gessaé sibawa tudangenna poléto ri gessaé. Iyaro gessaé poléi risining camming appunnangenna sining makkunrai iya mattumaniyé ri sumpanna Kémana Puwangnge.

Seddéna Kémana Puwangnge

⁹ Nasapponi Bézaleel seddé yolona Kémana Puwangnge sibawa ténda polé ri kaing lénang alusu'é. Ri bagiyang yattanna, lampéna 44 météré,

¹⁰ ritahangngi ri duwappulo alliri gessa, tungke'-tungke' pallangga gessa, sibawa pakkadak-kadang nenniya toling polé ri péra'é.

¹¹ Ri seddé manoranna riyébbureng towi pada-padaéttoro.

¹² Ri seddé yajanna ripasangiwi ténda 22 météré lampéna, sibawa seppulo alliri enrengngé seppulo pallangga; pakkadak-kadang sibawa pallambunna riyébbui polé ri péra'e.

¹³ Ri seddé alauna, iya engkaé tange'na, sakkana téndana 22 météré.

^14-15 Ri abéyo sibawa ataunna tangé''ro ripasangiwi ténda, tungke'-tungke' lampéna 6,6 météré, sibawa tellu alliri nenniya tellu pallangga.

¹⁶ Sininna téndaé iya mattulilingiyéngngi téndaéro riyébbui polé ri kaing lénang alusu'é.

¹⁷ Pallanggana sining allirinna riyébbui polé ri gessaé, na pakkadak-kadanna, lambunna sibawa coppo allirinna riyébbui polé ri péra'é. Sininna alliri iya mattulilingiyéngngi seddénaro ripasilambungngi séddié sibawa laingngé sibawa pakkadak-kadang péra'.

¹⁸ Kaing pallawana pintu gerbang seddénaro riyébbui polé ri lénang alusu'é iya ritennungngé silaong wol gawu, collipao sibawa cella enrengngé ribélo-béloi sibawa sulangeng. Lampéna aséra météré sibawa tanréna duwa météré, pada-pada téndana seddéna.

¹⁹ Iyaro kaing pallawa sumpangngé ritahangngi ri eppa alliri sibawa eppa pallangga gessa. Sininna pakkadak-kadangngé, pattongko coppo'na sibawa tolinna riyébbui polé ri péra'é,

²⁰ iyakiya patto-patto untu' Kémaé sibawa untu' sumpanna riyébbui polé ri gessaé.

Bessi iya ripaké ri laleng Kémana Puwangnge

²¹ Iyanaé daftarna rupanna bessié iya ripaké ri laleng Kémana Puwangnge, onronna iya duwa batué sibawa Seppulo Paréntana Allataalaro ritaro. Iyaro daftar-é riyébbui nasaba paréntana Musa sibawa nasusungngi sining tau Léwié iya majjamaé ri yawa pappimpinna Itamar, ana'na Imang Harun.

²² Bézaleel ana' Uri, eppona Hur polé ri suku Yéhuda, mébbui sininna iya napparéntangngé Puwangnge.

²³ Pabbantunna Aholiab ana' Ahisamakh polé ri suku Dan, iyanaritu séddiwi tau tukang passobbi, parrancang sibawa pattennung kaing lénang alusu, enrengngé wol gawu, collipao sibawa cella.

²⁴ Ulaweng iya riyakkasuwiyangengngé lao ri Puwangnge untu' Kéma Mapaccingngé, iya manenna sisebbu kilo jumellana, ritimbangngi situru timbangeng iya ripaké ri Kémana Puwangnge.

²⁵ Péra' iya rilolongengngé polé ri abbilangenna bangsa Israélié jumellana 3.430 kilo ritimbangngi situru timbangeng iya ripaké ri Kémana Puwangnge.

²⁶ Iyaro jumellaé padai sibawa aga iya nawajaé sininna tauwé iya ridaftar-é ri laleng abbilangengngéro. Tungke' tau wajai ellinna iya puraé ripattentu, ritimbangngi situru timbangeng iya ripaké. Ri laleng abbilangengngéro ridaftar ri 603.550 tau worowané iya makkéumuru'é 20 taung liyasé.

²⁷ Polé ri péra'éro, 3.400 kilo ripaké untu' mébbui iya sératu pallangga alliri Kémana Puwangnge sibawa kaing pallawa sumpangngé. Tungke' pallangga tane'na 34 kilo.

²⁸ Polé risésana péra'éro, 30 égana, naébbui Bézaleel pallambung-lambung sibawa pakkadak-kadang untu' alliri-allirinna, enrengngé pattongko coppo'na iyaro allirié.

²⁹ Gessa iya riyakkasuwiyangengngé lao ri Puwangnge iya manenna jumellana 2.425 kilo.

³⁰ Iyaro gessaé ripakéi untu' mébbui pallangga tange'na Kémana Puwangnge, mézba sibawa anengeng kawe polé ri gessaé, sininna passakke'na mézbaé,

³¹ pallapi'na téndaé mattulilingiwi seddéna sibawa pintu gerbanna, sininna patto'na Kémaé sibawa seddéna mattulili.