ASSURENG 27 - KITTA KAREBA MADECENG

Mézbaé

¹ “Ebbuno séddi mézba polé ri aju akasiaé. Bentu'na massulapa, lampéna sibawa sakkana tungke'-tungke' 2,2 météré sibawa tanréna 1,3 météré.

² Ri tungke' sunna ri yasé harusu'i riyébbureng tanru-tanru iya masséddié sibawa mézbaé. Iya manenna harusu'i rilapiri sibawa gessa.

³ Ebbuno pamuttu-pamuttu, kénro, mangko'-mangko', sondo sibawa onrong api. Iya manenna paréwaéro harusu'i riyébbu polé ri gessaé.

⁴ Ebbuno anengeng kawe polé ri gessaé sibawa pasanno eppa toling untu' aju pabbuléna ri eppa sunna ri yawa.

⁵ Tanréna iyaro anengeng kawe'é harusu'i sitengngana polé ri tanréna mézbaé. Iyaro anengeng kawe'é harusu'i riyabbebbekeng ri bagiyang yawana mézbaé.

⁶ Ebbuno duwa aju pabbulé polé ri aju akasiaé iya mallapi gessaé,

⁷ sibawa puttama'i ri laleng sining tolingngé ri iya duwa benrénna mézbaé wettunna muulé iyaro mézbaé.

⁸ Ebbui iyaro mézbaé polé ri pépengngé sibawa makkalebbong ri bagiyang lalenna, situru rancana iya Ujellokengngékko ri yasé'na buluéwé.”

Seddéna Kémana Puwangnge

⁹ “Ebburenni Kéma-Ku seddé mattulili iya risappoé sibawa ténda polé ri kaing lénang alusu'é. Ri bagiyang yattanna, lampéna iyaro téndaé 44 météré,

¹⁰ ritahangngi polé ri duwappulo alliri gessa, tungke'-tungke' sibawa pallangga gessa, enrengngé pakkadak-kadanna sibawa tolinna poléi ri péra'é.

¹¹ Ebbu towi pada-padaéro ri bagiyang manoranna.

¹² Ri seddé yajang, lampéna iyaro téndaé duwappulo duwa météré, sibawa seppulo alliri enrengngé seppulo pallangga.

¹³ Ri bagiyang alauna, iya engkaé tange'na, lampéna iyaro téndaé duwappulo duwa météré.

^14-15 Ri abéyo sibawa ataunna iyaro tange'é harusu'i ripasangi ténda, tungke'-tungke' lampéna 6,6 météré sibawa tellu alliri ri laleng tellu pallangga.

¹⁶ Untu' tange'na harusu'i ripasangi pallawa sillampé aséra météré polé ri lénang alusu'é iya ritennungngé sibawa wol gawu, collipao sibawa cella, enrengngé ribélo-béloi sibawa sulangeng. Untu' tahangngi iyaro kaing pallawa tange'é harusu'i riyébbureng eppa alliri sibawa eppa pallangga.

¹⁷ Sininna alliri iya mattulilingiyéngngi seddénaro harusu'i ripasisumpung séddié lao ri laingngé sibawa toling péra'; pakkadak-kadanna harusu'i polé ri péra'é sibawa pallanggana poléi ri gessaé.

¹⁸ Ténda iya mattulilingiyéngngi seddé yolonaro lampéna 44 météré, sakkana 22 météré sibawa tanréna 2,2 météré. Téndana harusu'i riyébbu polé ri kaing lénang alusu'é sibawa pallanggana poléi ri gessaé.

¹⁹ Sininna passakke'na iya ripaké ri laleng Kémaé, sininna patto untu' Kémaé sibawa untu' téndana harusu'i riyébbu polé ri gessaé.”

Carana murusu'i lampué

²⁰ “Suroi tau Israélié tiwi minnya zaitun iya tuléngngé sibawa iya kaminang makessingngé untu' lampué ri laleng Kéma-Ku kuwammengngi weddingngi ritunui sibawa malluwa matteru.

²¹ Harun sibawa ana'-ana'na harusu'i murusu'i iyaro lampué mappammulai arawéng lettu ri éléé ri onrokku hadéré, ri saliwenna kaing iya taggattungngé ri yolona Petti Assijancingngé. Iyaro paréntaé harusu'i napogau' untu' mannennungeng tau Israélié sibawa wija-wijanna.”