ASSURENG 18 - KITTA KAREBA MADECENG

Yitro célléngiwi Musa

¹ Yitro, matuwanna Musa, imang ri Midian, naéngkalingani passalenna sininna séuwa-séuwaé iya napogau'é Allataala untu' Musa sibawa bangsa Israélié, wettunna mennang napimping massu polé ri Maséré.

² Nalaona Yitro célléngiwi Musa, natiwii Zipora, bainéna Musa iya monroé mupa ri Midian,

³ silaong Gérson sibawa Eliézer, iya duwa ana' worowanéna. Ana' mammulangngé nasengngi Gérsom, nasaba makkedai Musa, “Séddika tau polé-polé ri wanuwa laingngé”;

⁴ ana' maduwaé nasengngi Eliézer nasaba makkedai Musa, “Allataala nasompaé néné-nénéku pura tulukka sibawa passalama'ka angkanna dé' naunoka arung Maséré.”

⁵ Poléi Yitro silaong bainéna Musa enrengngé iya duwa ana'na ri padang kessi'é onronna Musa makkéma ri seddéna bulu mapaccingngé.

⁶ Riwérénni karéba Musa makkedaé poléi mennang,

⁷ nanassuna duppaiwi. Suju'ni ri yolona Yitro sibawa bauwi. Sisulléni mennang sitanai adisid-disingenna tungke'-tungke', nainappa muttama ri laleng kémana Musa.

⁸ Nacuritani Musa lao ri matuwanna sininna séuwa-séuwaé iya napogau'é Puwangnge lao ri arungngé sibawa bangsa Maséré'é untu' passalama'i bangsa Israélié. Nacuritangeng toni passalenna sining asukkarakeng iya nangoloiyé bangsa Israélié ri tengnga laleng, sibawa pékkugi Puwangnge passalama'i mennang.

⁹ Naéngkalingana iya manennaro, marennuni Yitro

¹⁰ namakkeda, “Ripojiwi Puwang iya passalama'ékko polé ri limanna arungngé sibawa bangsa Maséré'é! Ripojiwi Puwang iya paleppe'éngngi bangsa Israélié polé ri angatangengngé!

¹¹ Uwissenni makkekkuwangngé makkedaé lebbi battowai Puwangnge naiya sininna déwataé, saba' iya manennaro napogau'i wettunna tau Maséré'é tinda sibawa matempo senna lao ri bangsa Israélié.”

¹² Nainappa Yitro tiwii siyagangngaré akkarobangeng ritunu sibawa akkarobangeng rigéré selaku pakkasuwiyang lao ri Allataala. Harun sibawa sininna pamimpinna bangsa Israélié poléni sibawa manré sisama Yitro ri laleng ahadérékenna Allataala.

Makkana Musa Haking-haking

¹³ Pappa bajanana nadélékini Musa sining assisalangngé ri yelle'na sining tau Israélié. Iyaro jama-jamangngé mala wettu polé ri éléé narapi wenni.

¹⁴ Wettunna naita Yitro sininna iya harusu'é najama Musa, makkutanani, “Aga-agana iya harusu'é mujama untu' bangsaéwé? Harusu'ga iya manennaé mujama alé-alému, angkanna untu' méllauwi bawang pangajamu, iyaro sining tauwé harusu'i tettong kuwaé polé ri éléé narapi wenni?”

¹⁵ Nappébali Musa, “Iyaro sining tauwé laowi ri iyya untu' missengngi élona Allataala.

¹⁶ Rékko sisalai mennang, mangoloi ri iyya kuwammengngi upettuiwi parakarana, sibawa upalettukengngi mennang sining paréntana nenniya hukkung-hukkunna Allataala.”

¹⁷ Nakkeda Yitro, “Dé' namakessing makkuwaéro.

¹⁸ Iyaro caraé naposoi alému, sibawa iyatoro sining tauwé. Iyaro jama-jamangngé maéga senna'i untu' séddi tau.

¹⁹ Engkalingai pangajaku, na Allataala tulukko matu. Mémeng makessing wakkélékiwi bangsaéwé ri yolona Allataala sibawa tiwii persoalanna ri Aléna.

²⁰ Harusu'ko mappagguruwangngi lao ri mennang sining paréntana Allataala sibawa pakatajangngi cara atuwong iya makessingngé sibawa aga mennang harusu napogau'.

²¹ Iyakiya ri lainnaéro harusu'ko pilé siyagangngaré tau worowané iya mapanré, sibawa jello'i mennang mancaji pamimpinna ri yasé'na sisebbu tau, sératu tau, limappulo tau, sibawa seppulo tau. Sitinajai mennang sining tau iya métaué sibawa turusiyéngngi Allataala, wedding riyatepperi sibawa dé' namaélo tarima dowi pasoso.

²² Suroi mennang tinda selaku haking-hakinna bangsaéwé, tungke'-tungke' lao ri kalompo'na. Iyaro jamangngé harusu'i napogau' mennang secara taratoro. Parakara-parakara iya pentingngé weddingngi mennang napangolo ri iko, iyakiya assisalang iya baiccu'é naulléi mennang pacceppiwi. Iyaro gau'é naringengiko matu nasaba maccowéi mennang mattanggung jawa'.

²³ Rékko mupogau'i makkuwaéro, na iyaro gau'é napparéntangngi Allataala lao ri iko, mulléi matu pogau'i jamammu, sibawa sininna tauwé lisui matu sibawa masennang nasaba masitta'i ripacceppi persoalanna.”

²⁴ Naccowérini Musa pangajana Yitro,

²⁵ sibawa piléi sining tau iya mapanré ri yelle'na bangsa Israélié. Najello'ni mennang mancaji pamimping ri yasé'na sisebbu tau, sératu tau, limappulo tau, sibawa seppulo tau.

²⁶ Napajoppani mennang jamanna selaku haking-haking ri yasé'na bangsa Israélié. Parakara-parakara pentingngé napangoloi mennang ri Musa, naiya assisalang baiccu-baiccu'é napacceppini mennang.

²⁷ Nainappa Musa naleppessang Yitro lao nanalisuna Yitro ri wanuwanna.