ASSURENG 11 - KITTA KAREBA MADECENG

Nabotona Musa amaténna ana' macowaé

¹ Nakkeda Puwangnge lao ri Musa, “Maéloka patatteppa séddi abalapa ri yasé'na arung Maséré sibawa ra'ya'na. Purapiro, naleppessanno matu lao. Mala iko maneng napaddésu'ko matu polé kuwaé.

² Rimakkuwannanaro abbicarano sibawa bangsa Israélié; suroi mennang méllauwi paréwa ulawenna sibawa péra'na balibolana.”

³ Puwangnge mébbui tau Maséré'é makacuwa lao ri tau Israélié. Mancajini Musa tau iya ripakalebbi senna'é risining pejaba'é sibawa sininna ra'ya' Maséré.

⁴ Nakkeda Musa lao ri arungngé, “Mappakkuwaiyé ada-adanna Puwangnge, ‘Kira-kira ri tengnga bennié maéloka jalajja'i tana Maséré.

⁵ Tungke' ana' worowané iya macowaé ri Maséré matéi matu, mappammulai ana'na arung Maséré lettu ri ana'na ata makkunrai iya mallélu gandongngé. Ana' iya bunge jajiyé polé ri sininna olokolo'é maté towi matu.

⁶ Ri sininna Maséré riyéngkalingai matu sadda mpating maladde'é, iya dé'éppa naengka nakajajiyang sibawa dé'na matu nakajajiyanna.

⁷ Iyakiya ri yelle'na Israélié, muwi rupatauwé iayaré'ga olokolo'é dé' nariganggu. Namuwissengngi matu makkedaé Iyya, Puwang, mébbu assilaingeng ri yelle'na tau Maséré'é sibawa tau Israélié.’ ”

⁸ Angkanna Musa makkeda, “Sininna pejaba'na Puwakku poléi matu sibawa suju' ri yoloku nanaéllauwi kuwammengngi iyya sibawa bangsaku salaiwi iyaé wanuwaé. Purairo laona' matu.” Namacai senna'na Musa salaiwi arungngé.

⁹ Nakkeda Puwangnge lao ri Musa, “Dé' nabati-batiwi matu arungngé ada-adammu, kuwammengngi weddik-Ka mébbu lebbi maéga anu makalallaing ri sininna Maséré.”

¹⁰ Naébbuni Musa sibawa Harun sininna anu makalallaingngéro ri yolona arungngé, iyakiya Puwangnge mébbui matedde ati, angkanna dé' namaélo palaloi tau Israélié salaiwi wanuwanna.