ANGIMANGENG 27 - KITTA KAREBA MADECENG

Peraturanna passalenna pakkasuwiyang laowé ri Puwangnge

¹ Puwangnge mabbéré lao ri Musa

² iyaé peraturangngé untu' bangsa Israélié. Rékko séddié tau riyakkasuwiyangeng lao ri Puwangnge untu' mappaleppe séuwa tinja iya dé'é padanna, iyaro tauwé weddingngi ricéra sibawa sijumella dowi.

^3-7 Situru elli iya takkennaé ri Kémana Puwangnge: – riyasé'na 60 taung: worowané 15 dowi péra' makkunraié 10 dowi péra' – pallawangenna 20-60 taung: worowané 50 dowi péra' makkunraié 30 dowi pera' – pallawangenna 5-20 taung: worowané 20 dowi péra' makkunraié 10 dowi péra' – ri yawana 5 taung: worowané 5 dowi péra' makkunraié 3 dowi péra'

⁸ Rékko tau iya mattinja'é kasiyasi senna'i untu' mpajai iya ripattentué, harusu'i natiwi tau iya puraé riyakkasuwiyangeng lao ri Puwang-ngéro lao ri imangngé. Harusu'i imangngé pattentui elli iya lebbi mariyawaé situru amampungenna tauwéro.

^9-10 Rékko iyaro tinja'é iyanaritu olokolo hallala' iya weddingngé ritarima selaku pakkasuwiyang lao ri Puwangnge, iyaro tau iya mattinja'é dé' nawedding nasélé sibawa olokolo laing, saba' sininna iya riyakkasuwiyangengngéro lao ri Puwangnge mancajiwi appunnangenna Puwangnge.

¹¹ Iyakiya rékko iyaro tinja'é iyanaritu olokolo harang iya dé'é nawedding ritarima selaku pakkasuwiyang lao ri Puwangnge, tau iya mattinja'é harusu'i natiwi olokolo'é lao ri imangngé.

¹² Imangngé pattentui matu ellinna situru keadaanna iyaro olokolo'é. Na elli iya pura ripattentué iyanaritu elli maté.

¹³ Rékko iyaro tauwé macinnai passui olokolo'na, harusu'i nawaja ellinna ritambai duwappulo paresséng.

¹⁴ Rékko séddié tau makkasuwiyangengngi bolana lao ri Puwangnge, imangngé pattentui ellinna manuru keadaanna iyaro bolaé. Elli iya pura ripattentué iyanaritu elli maté.

¹⁵ Rékko iyaro tauwé maéloi passui bolana, harusu'i nawaja ellinna ritambai duwappulo paresséng.

¹⁶ Rékko séddié tau makkasuwiyang sibagiyang polé ri tanana lao ri Puwangnge, harusu'i ripattentu ellinna situru jumella biné iya riyapparelluwangngé untu' tanengiwi iyaro tanaé. Untu' tungke' duwappulo kilo gandong ellinna seppulo dowi péra'.

¹⁷ Rékko iyaro tanaé riyakkasuwiyangengngi mappammulai Taung Appalisungngé, harusu'i riwaja maneng ellinna.

¹⁸ Rékko iyaro tanaé riyakkasuwiyangengngi puranana Taung Appalisung, imangngé harusu tasséré'i elli kontanna situru jumella taung iya engkaé mupa narapi Taung Appalisung paimenna, nainappa napattentu elli iya lebbi masémpoé.

¹⁹ Rékko tau iya makkasuwiyangngéngngi iyaro dare'é macinnai passui, harusu'i nawaja ellinna ritambai duwappulo paresséng.

²⁰ Rékko nabalu'i iyaro dare'é sibawa dé' nacéra'i lebbi riyolo polé ri Puwangnge, dé'na nappunnai ha' passui iyaro dare'é.

²¹ Ri laleng Tuang Appalisung paimenna, iyaro dare'é mancaji appunnangennai Puwangnge untu' mannennungeng, sibawa riwéréngngi sining imangngé.

²² Rékko séddié tau makkasuwiyang lao ri Puwangnge sikonrong dare iya puraé naelli,

²³ harusu'i imangngé tasséré'i ellinna situru taung iya engkaé mupa narapi Taung Appalisung paimenna. Nainappa iyaro tauwé harusu'i mpajai ellinna ri essoéttoro. Iyaro dowié mancaji appunnangennai Puwangnge.

²⁴ Ri laleng Taung Appalisungngé, iyaro dare'é harusu'i ripalisu lao ri punnana mammulangngé iyaré'ga lao ri, wija-wijanna.

²⁵ Sininna ellié harusu'i ripattentu manuru elli iya takkennaé ri Kémana Puwangnge.

²⁶ Olokolo iya bunge' jajiyé iyanaritu appunnangenna Puwangnge, jaji dé' nawedding riyakkasuwiyangeng untu' akkarobang cenning ati. Ana' saping, ana' bimbala iyaré'ga ana' bémbé iya bunge' jajiyé iyanaritu appunnangenna Puwangnge.

²⁷ Iyakiya olokolo harang iya bunge' jajiyé wedding ricéra' situru angke iya takkennaé ri Kémana Puwangnge, ritambai duwappulo paresséng. Rékko dé' naricéra', iyaro olokolo'é wedding ribalu lao ri tau laingngé situru elli iya takkennaé ri Kémana Puwangnge.

²⁸ Dé' muwi séddi tau wedding balu'i iyaré'ga passui aga iya puraé ripallaing temmakkésara' lao ri Puwangnge, muwi iyaro rupa tau, olokolo iyaré'ga tana. Iyaro appunnangenna Puwangnge untu' mannennungeng.

²⁹ Mala rupa tau iya puraé ripallaing lao ri Puwangnge untu' ripabbinasa dé' nawedding ripassu; harusu'i riyuno.

³⁰ Tawa seppulona polé risininna wassélé tanaé, muwi gandong iyaré'ga buwa-buwa, iyanaritu untu' Puwangnge.

³¹ Rékko séddié tau maéloi passui sibagiyang polé ri wassélé'éro, harusu'i nawaja ellinna iya puraé ripattentu ritambai duwappulo paresséng.

³² Séddi polé ri tungke' seppulo kajunna olokolo piyaraé iyanaritu appunnangenna Puwangnge. Rékko ribilangngi iyaro olokolo piyaraé, tungke' kajunna olokolo piyara iya maseppuloé mancajiwi appunnangenna Puwangnge.

³³ Iyaro punna olokolo'é dé' nawedding napilé-pilé kéga makessing, kéga maja. Dé'to wedding nasélé. Rékko to naséléi, iya duwa olokolo'éro mancajiwi appunnangenna Puwangnge sibawa dé' nawedding ripassu.

³⁴ Iyanaro parénta-parénta iya nabbéréyangngé Puwangnge ri tompo'na Bulu Sinai lao ri Musa untu' bangsa Israélié.