ANGIMANGENG 24 - KITTA KAREBA MADECENG

Carana parakaiwi lampué

¹ Puwangnge suroi Musa

² mabbéréyangngi iyaé sining peraturangngé lao ri bangsa Israélié: Tiwino minnya zaitun iya tuléngngé sibawa iya kaminang makessingngé untu' lampué ri laleng Kémana Puwangnge, kuwammengngi nawedding ripasang sibawa malluwa matteru.

³ Harusu'i Harun matoro'i sining lampuéro mappammulai mapettanna narapi élé ri onrong naonroiyé Puwangnge, ri saliwenna kaing paddenring iya tongkoéngngi Petti Assijancingngé ri Bili' Pommapaccingngé. Iyaro paréntaé harusu'i ripogau' untu' mannennungeng.

⁴ Harusu'i Harun murusu'i sining lampué ri ajé lampué polé ri ulaweng tuléngngé kuwammengngi natette malluwa ri laleng Kémana Puwangnge.

Roti ripatalaé

⁵ Alano seppulo duwa kilo labbu iya kaminang makessingngé sibawa ébbuno seppulo duwa roti lébu, tungke'-tungke' polé risikilo labbu.

⁶ Palénne'i rotié ri laleng duwassusung, enneng roti tungke' susunna, ri yasé'na méjang mallapi ulaweng tuléng iya engkaé ri laleng Kémana Puwangnge.

⁷ Taroiwi kamennyang tuléng tungke' susung roti untu' tanrangiwi makkedaé iyaro rotié akkarobangeng inanré untu' Puwangnge.

⁸ Tungke' esso Saba'é harusu'i engka roti iya ripatalaé ri laleng Kémana Puwangnge. Iyanaro kewajibanna bangsa Israélié untu' mannennungeng.

⁹ Iyaro rotié untu' Harun sibawa wija-wijanna. Harusu'i mennang nanré ri onrong iya mapaccingngé, nasaba iyaro rotié sinrupai bagiyang iya kaminang mapaccingngé polé ri akkarobangeng inanré iya riyakkasuwiyangengngé lao ri Puwangnge untu' sining imangngé.

Pahukkungenna tau iya tanroiyéngngi Allataala sibawa pahukkungeng pakkabale'é

^10-11 Ri akkémanna tau Israélié engka séddi tau worowané. Ambo'na tau Maséré sibawa indo'na tau Israél riyaseng Sélomit, ana' Dibri polé ri suku Dan. Riséuwaé esso massasai sibawa tau Israélié ri akkémangngé. Wettunna massasa, natanroiwi Allataala. Rimakkuwannanaro sining tau Israélié tiwii mangolo ri Musa,

¹² sibawa tahangngi nanatajeng towi apettunna Puwangnge passalenna aga iya harusu'é mennang napogau' lao ri aléna.

¹³ Makkedani Puwangnge lao ri Musa,

¹⁴ “Tiwii iyaro tauwé massu ri akkémangngé. Tungke' tau iya puraé méngkalingai mattanro, harusu'i palénne'i limanna ri tompo ulunna tauwéro untu' mabbéré asabbing makkedaé pasalai. Nainappa sininna umma'é harusu'i genrungngi batu gangka maté.

¹⁵ Purairo appallebbangenni iyaé lao ri Israélié: Nigi-nigi tanroiwi Allataala harusu'i natanggung addimonrinna

¹⁶ sibawa rihukkung maté. Nigi-nigi tanroiwi Puwangnge harusu'i rigenrung batu gangka maté risininna jema'é. Iyaro hukkungngé takkennai untu' tau Israélié iyaré'ga untu' tau laing iya mattette'énna ri Israél.

¹⁷ Nigi-nigi mpunoi tau laingngé harusu'i rihukkung maté.

¹⁸ Nigi-nigi mpunoi olokolo'na tau laingngé harusu'i nasulléi. Tettongenna iyanaritu ‘nyawa risulléi nyawa’.

¹⁹ Rékko séddié tau mébbui tau laingngé malo, agi-agi iya puraé napogau', harusu towi rigaukengngi.

²⁰ Rékko napoloi bukué, harusu towi ripolo bukunna. Rékko naébbui tauwé gicco, harusu towi rigicco. Rékko naunrui tau laingngé narapi polo isinna, harusu towi ripolo isinna. Agi-agi iya napogau'é angkanna tau laingngé sala-salang, harusu towi rigaukeng selaku pakkabale.

²¹ Nigi-nigi mpunoi olokolo'é, harusu'i nasulléi, iyakiya nigi-nigi mpunoi tauwé harusu'i rihukkung maté.

²² Iyaro hukkungngé takkennai untu' iko maneng sibawato untu' tau laing iya mattette'é ri yelle'mu, nasaba Iyya'na Puwang, Allataalamu.”

²³ Puranana napalettu Musa iyaro ada-adaé lao ri bangsa Israélié, natiwini mennang massu tau iya puraé tanroiwi Allataalaro ri akkémangngé nainappa nagenrung batu gangka maté. Nasibawang caraéro napogau'ni bangsa Israélié aga iya puraé napparéntang Puwangnge lao ri Musa.