ANGIMANGENG 23 - KITTA KAREBA MADECENG

Esso-esso marajaé

¹ Puwangnge mpéréngngi Musa

² sining peraturangngé passalenna ramé-ramé agamaé, iya harusu'é riyappallebbangeng selaku esso maraja untu' massompa.

³ Engka enneng essona untu' mappallaung, iyakiya esso mapitué, esso Saba'é, iyanaritu esso appésaungeng iya ripallaingngé untu' Puwangnge. Ri essoéro harusu'ko pakangka addeppu-deppungeng untu' massompa sibawa dé' nawedding mappallaung.

⁴ Iyanaé esso-esso maraja iya napattette'é Puwangnge sibawa harusu'i riyappallebbangeng ri wettu iya ripattentué.

Esso Maraja Paskaé sibawa Roti Dé'é Raginna

⁵ Esso Maraja Paska iya riramé-raméiyé untu' pakalebbii Puwangnge, mappammulai labunna essoé ri tanggala seppulo eppa uleng séddi.

⁶ Pappa bajana, tanggala seppulo lima, mappammulani Ramé-ramé Roti Dé'é Raginna, na pitungngesso ittana dé' nawedding manré roti iya riyébbué paké ragi.

^7-8 Iyaro pitungngessoé ittana harusu'ko makkasuwiyang akkarobangeng inanré lao ri Puwangnge. Ri esso mammulangngé sibawa mapitué ramé-raméro harusu'ko pakangka addeppu-deppungeng untu' massompa sibawa dé' nawedding pogau' pallaung matane.

^9-10 Rékko lettu'no ri wanuwa iya nabbéréyangngé Puwangnge ri iko sibawa paddeppungeng wassélé tana, wessé gandong iya bunge' muwéngngalaé harusu'i ritiwi ri imangngé.

¹¹ Ri esso labe'nana esso Saba'é, harusu'i imangngé makkasuwiyangengngi iyaro gandongngé selaku pakkasuwiyang tanréyangeng lao ri Puwangnge, kuwammengngi namasennang Puwangnge lao ri iko.

¹² Ri esso muwakkasuwiyangenna iyaro gandongngé, harusu tokko makkasuwiyang untu' akkarobangeng ritunu sikaju ana' bimbala lai iya makkéumuru sitaungngé sibawa dé'é sala-salanna.

¹³ Untu' akkarobangeng inanré, akkasuwiyangengngi duwakkilo labbu ricampuru minnya zaitun. Bau akkarobangengngéro pésennangiwi atinna Puwangnge. Nasibawang iyaro akkasuwiyangeng towi sibang uwai anggoro.

¹⁴ Ri wettu dé'napa mutiwii iyaro pakkasuwiyangngé lao ri Puwangnge, dé' naweddikko manré muwi céddé polé ri gandong baruéro, muwi mamata, ripanggang iyaré'ga ritunu mancaji roti. Iyaro peraturangngé harusu'i naturusi sininna wija-wijammu untu' mannennungeng.

Pésta Engngalangngé

¹⁵ Mappammulai esso labe'na Saba'é, wettummu makkasuwiyang lao ri Puwangnge wessé gandong mammulangngé, harusu'ko bilangngi pitu aha' bujuru.

¹⁶ Ri esso iya malimappuloé, iyanaritu esso purana Saba'é iya mapitué, harusu'ko tiwi akkarobangeng ripatala lao ri Puwangnge.

¹⁷ Tungke' kaluwarga harusu'i makkasuwiyangeng duwa roti untu' pakkasuwiyang tanréyangeng lao ri Puwangnge. Tungke' rotié harusu'i riyébbu polé ri duwakkilo labbu nenné iya paké ragi sibawa harusu'i riyabbéréyang lao ri Puwangnge selaku pakkasuwiyang wassélé tana iya mammulangngé.

¹⁸ Nasibawang iyaro rotié harusu'i bangsa Israélié makkasuwiyangeng pitukkaju ana' bimbala iya makkéumuru sitaungngé, sikaju saping lai lolo sibawa duwakkaju bémbé. Tungke'-tungke' dé' nawedding engka sala-salanna sibawa harusu'i riyakkasuwiyangeng untu' akkarobangeng ritunu untu' Puwangnge, sibawa akkarobangeng ripatala enrengngé akkarobangeng uwai anggoro. Na iyaro akkarobangengngé napésennangiwi atinna Puwangnge.

¹⁹ Akkasuwiyangeng towi sikaju bémbé lai untu' akkarobangeng paddampengeng dosa sibawa duwakkaju bimbala lai iya makkéumuru sitaungngé untu' akkarobangeng pappasidamé.

²⁰ Roti sibawa iya duwa ana' bimbala'éro harusu'i nakkasuwiyangeng imangngé selaku pakkasuwiyang tanréyangeng lao ri Puwangnge, na iyaro untu' bagiyanna imangngé. Iyaro sining pakkasuwiyangngé mapaccingngi.

²¹ Ri essoéro harusu'ko pakangka addeppu-deppungeng untu' massompa sibawa dé' nawedding pogau' pallaung matane. Iyaro peraturangngé harusu'i naturusi sininna wija-wijammu untu' mannennungeng, kégi-kégi mennang monro.

²² Rékko méngngalako, aja' muwéngngalai gandong iya tuwoé ri wiring-wiring dare'mu sibawa aja' mulisu untu' paddeppungengngi gandong iya nasésae puranana éngngalangnge. Leppessangngi iyaro untu' tau kasiyasié sibawa tau laingngé. Puwangnge iyanaritu Allataalamu.

Pésta Taung Mabarué

^23-24 Tanggala séddi uleng pitu harusu'i riramé-raméi selaku esso iya ripallaingngé untu' mappésau. Iyaro essoé ritanrangiwi sibawa oni tarompé, naharusu'ko pakangka addeppu-deppungeng untu' massompa.

²⁵ Akkasuwiyangenno akkarobangeng inanré lao ri Puwangnge sibawa aja' mupogau' pallaung matane ri essoéro.

Esso Paddampengeng Dosaé

^26-27 Tanggala seppulo uleng pitu iyanaritu esso upacara pattaungeng untu' paddampengeng dosana bangsa Israélié. Ri essoéro harusu'ko mappuwasa sibawa pakangka addeppu-deppungeng untu' massompa enrengngé makkasuwiyangeng akkarobangeng inanré lao ri Puwangnge.

²⁸ Aja' muwappallaung, saba' iyaro essoé iyanaritu Esso Paddampengeng Dosaé, kuwammengngi mulolongeng addampeng ri yolona Puwang Allataalamu.

²⁹ Nigi-nigi manré séuwa ri essoéro, dé'na nariyangga anggota umma'na Allataala.

³⁰ Sibawa nigi-nigi pogau' pallaung ri essoéro, rihukkungngi ri Puwangnge muto sibawa pahukkungeng maté.

³¹ Iyaro peraturangngé takkennai untu' sininna wijanna kégi-kégi mennang monro.

³² Mappammulai labunna matanna essoé ri tanggala asérana ulengngéro narapi labunna matanna essoé ri tanggala seppulona, harusu'ko ramé-raméiwi pada-pada esso Saba'é, esso iya ripallaingngé untu' mappésau. Puppu essoko harusu mappuwasa.

Pésta Kalampang Daud-daungngé

^33-34 Pésta Kalampang Daud-daungngé mappammulai ri tanggala seppulona lima uleng pitu sibawa ittana pitungngesso.

^35-36 Iyaro pitungngessoé ittana, esso-essoko harusu makkasuwiyang akkarobangeng inanré. Ri esso mammulangngé sibawa iya maaruwaé harusu'ko pakangka addeppu-deppungeng untu' massompa sibawa makkasuwiyangeng akkarobangeng inanré lao ri Puwangnge. Aja' mupogau' pallaung matane ri essoéro.

³⁷ Iyanaro esso-esso maraja agama iya napalettu'é Puwangnge sibawa iya harusu'é muwappallebbangeng. Ri ramé-raméro harusu'ko pakalebbii Puwangnge sibawa pakangka addeppu-deppungeng untu' massompa sibawa makkasuwiyangeng akkarobangeng inanré, akkarobangeng ritunu, akkarobangeng olokolo sibawa akkarobangeng uwai anggoro, singngéga iya riyapparelluwangngé esso-esso.

³⁸ Iyaro ramé-ramé sinrupai pattamba ri esso-esso Saba'é biyasaé, jaji iyaro sining pakkasuwiyangngé iyanaritu pattambana towi pabbérému iya biyasaé, ri akkarobangemmu untu' mappaleppe tinja, iyaré'ga akkarobangeng cenning ati iya muwabbéréyangngé lao ri Puwangnge.

³⁹ Puranana éngngalangngé, mappammulai tanggala seppulo lima uleng pitu, harusu'ko pakangka ramé-ramé pitungngesso ittana. Ri esso iya mammulangngé sibawa iya maaruwaé iyanaritu esso iya ripallaingngé untu' mappésau.

⁴⁰ Ri esso iya mammulangngé harusu'ko maccéppu buwa-buwa iya kminang makessingngé ri palla'mu, daud-daung pattukuto sibawa takké-takké polé ri ajukajung iya maworongngé, nainappa pammulaini ramé-ramé ariyo-riyongngé untu' pakalebbii Puwang Allataalamu.

⁴¹ Iyaro ramé-ramé harusu'i mupatteru pitungngesso ittana. Iyaro peraturangngé harusu'i napogau' wija-wijammu untu' mannennungeng.

⁴² Pitungngesso ittana sininna bangsa Israélié harusu'i monro ri laleng sining kalampang daud-daungngé,

⁴³ kuwammengngi naissengngi wija-wijammu makkedaé Puwangnge suroi bangsa Israélié monro ri laleng sining kalampang biyasaé, wettunna ritiwi mennang massu polé ri Maséré. Aléna ritu Puwang Allataalamu.

⁴⁴ Makkuwaniro Musa palettu'i ri bangsa Israélié sining peraturangngé passalenna ramé-ramé untu' pakalebbii Puwangnge.