ANGIMANGENG 21 - KITTA KAREBA MADECENG

Apaccingenna sining imangngé

¹ Puwangnge suroi Musa palettu'i iyaé paréntaé lao risining imang wija-wijanna Harun, “Séddié imang dé' nawedding napanajisi' aléna nasaba maccowéi hadéré ri upacara attampungenna sumpulolona,

² sangadinna rékko iya matéro iyanaritu indo'na, ambo'na, ana'na, padaorowanéna,

³ iyaré'ga ana' daranna iya dé'éppa nakawing, iya naéwaé sibola.

⁴ Dé' nawedding napanajisi' aléna sibawa maccowʻriwi upacara attampungenna sumpulolona bainéna.

⁵ Séddié imang dé' nawedding kellui sibagiyang polé ri ulunna sibawa dé' nawedding nagoncing janggo'na iyaré'ga loi watakkaléna sibawa anu matareng untu' mappaitangngi makkedaé mabbaratai.

⁶ Appunnangekkui iya ripallaingngé nadé' nawedding carépaiwi asek-Ku. Makkasuwiyangngi akkarobangeng inanré lao ri Iyya, jaji harusu'i mapaccing.

⁷ Séddié imang dé' nawedding kawing sibawa séddié makkunrai iya cakkuribangngé riyolo iyaré'ga séddié makkunrai iya tenniyaé parawang iyaré'ga iya massarangngénna, nasaba imangngé iyanaritu appunnangek-Ku.

⁸ Bangsa Israélié harusu'i mangakuiwi imangngé selaku tau iya ripallaingengngékka nasaba makkasuwiyangngi akkarobangeng inanré lao ri Iyya. Iyya'na Puwang; mapaccikka sibawa Upaccingiwi umma'-Ku.

⁹ Rékko ana' makkunrainna séddié imang mancaji cakkuribangngi, napakatunai ambo'na naharusu'i ritunu gangka maté.

¹⁰ Purani rilanti Imang Lompoé sibawa tirikiwi minnya upacara tompo ulunna sibawa papasangiwi pakéyang imang lompoé ri aléna. Rimakkuwannanaro dé' nawedding naleppessang gemme'na makota iyaré'ga sapé'ʻi pakéyanna selaku tanrang mabbarata.

^11-12 Purani riyakkasuwiyangeng ri alé-Ku untu' mancaji appunnangek-Ku, jaji dé' nawedding napanajisi' aléna. Dé'to nawedding napanajisi' Kéma-Ku ri laleng massuna polé kuwaro untu' muttama ri laleng bola engkaé ujuna, namuni iyaro ujuna ambo'na iyaré'ga indo'na.

^13-14 Banna weddingngi kawing sibawa séddié parawang polé ri sukunna muto. Dé' nawedding kawing sibawa séddié janda, iyaré'ga séddié makkunrai iya massarangngénna, iyaré'ga séddié makkunrai cakkuribangngé riyolo.

¹⁵ Rékko riyajjalékkaiwi iyaro peraturangngé, ana'-ana'na iya harusu'é mapaccing, najisi'i matu. Iyya'na Puwang sibawa purani Upallaing mancaji Imang Lompo.”

¹⁶ Puwangnge paréntangngi Musa

¹⁷ untu' powadai iyaé lao ri Harun, “Séddié wija-wijammu iya sala-salangngé watakkaléna dé' nawedding makkasuwiyang akkarobangeng inanré lao ri Iyya. Iyaro takkennai untu' mannennungeng.

¹⁸ Tau iya makkasuwiyangngé akkarobangeng dé' nawedding sala-salang watakkaléna, iyanaritu tau butaé, iyaré'ga péso'é, tau sala-salangngé rupanna iyaré'ga anggota watakkaléna,

¹⁹ iya maté limanna iyaré'ga képpangngé ajéna;

²⁰ iya bukku'é iyaré'ga mapancé'é, iya mapeddi mataé iyaré'ga malasa olié sibawa iya rilase'é.

²¹ Tungke' wija-wijanna Imang Harun iya sala-salangngé watakkaléna dé' nawedding makkasuwiyang akkarobangeng inanré lao ri Iyya.

²² Iyakiya weddingngi manré inanré iya riyakkasuwiyangngé, muwi akkarobang inanré iya mapaccingngé muwi akkarobangeng inanré iya mapaccing senna'é.

²³ Nasaba iyaro tauwé sala-salangngi watakkaléna, dé' nawedding maddeppériwi paddenring iya passarangngéngngi Bili' Mapaccingngé iyaré'ga mézbaé. Dé' nawedding napanajisi' barab-barang iya puraé ripallaing untu' Iyya, nasaba Iyya'na Puwang, sibawa Iyya'na ritu iya pallaingngéngngi iyaro barab-barangngé.”

²⁴ Iyanaro peraturang-peraturang iya napalettu'é Musa lao ri Harun enrengngé ana'-ana'na, sibawa lao risininna bangsa Israélié.