ANGIMANGENG 12 - KITTA KAREBA MADECENG

Upacara pappépaccing makkunraié rékko purai mémmana

¹ Puwangnge mabbéréyangngi lao ri Musa sining peraturangngéwé

² untu' bangsa Israélié. Rékko séddié makkunrai jajiyang ana' worowané, pitungngesso ittana najisi' iyaro makkunraié, pada-pada muto wettunna maddara.

³ Ri esso maaruwaé harusu'i risunna ana'na.

⁴ Labe'nana telluppulo essona najisi' mupi iyaro makkunraié nasaba maddarai. Dé' nawedding géssai barab-barang iya ripaké untu' massompa sibawa dé' nawedding muttamakiwi Kémana Puwangnge narapi wettu pappépaccinna genne'ni.

⁵ Rékko séddié makkunrai jajiyang ana' makkunrai, seppulo eppa essona iyaro makkunraié najisi', pada-pada muto ri wettunna maddara. Purairo enneng pulona enneng essosi iyaro makkunraié najisi'i nasaba maddarai.

⁶ Puranana wettu pappépaccinna, muwi nasaba purai jajiyang ana' worowané iyaré'ga ana' makkunrai, iyaro makkunraié harusu'i tiwii pakkasuwiyang lao ri imangngé ri yolona sumpang Kémana Puwangnge. Iyaro pakkasuwiyangngé iyanaritu sikaju ana' bimbala iya makkéumuru sitaungngé untu' akkarobang ritunu, sibawa sikaju jangang-jangang lolo untu' akkarobang paddampengeng dosa.

⁷ Imangngé harusu mabéréyangngi pakkasuwiyanna lao ri Puwangnge sibawa pogau'i upacaraé untu' leddai anajisikenna iyaro makkunraié, angkanna mancaji mapaccing. Jaji iyanaro harusu napogau' séddié makkunrai rékko purai mémmana'.

⁸ Rékko iyaro makkunraié dé' naulléi passadiya sikaju ana' bimbala, harusu'i tiwi duwak-kaju jangang-jangang lolo iyaré'ga bekku lolo: sikaju untu' akkarobang ritunu sibawa sikaju untu' akkarobang paddampengeng dosa. Harusu'i imangngé napogau' upacaraé untu' leddai anajisikenna iyaro makkunraié, namancaji mapaccing.