AMOS 2 - KITTA KAREBA MADECENG

Moab

¹ Makedai Puwangnge, “Makkolik-kolinni madosa pabbanuwana Moab, rimakkuwannanaro pasti Uhukkungngi matu mennang. Napakatunai mennang arung Edom iya matéénnaro, sibawa nabongkara'na tampunna enrengngé malai buku-bukunna nanatunui mancaji awu.

² Rimakkuwannanaro, kirik-Ka matu api lao ri wanuwa Moab, sibawa tunui gangka cappu sining bénténg Kériot. Matéi matu tau Moab-é ri tengnga-tengngana rukka ammusurengngé, ri wettu ripaoninna mupa tarompé'é, sibawa rigoranna pagganti musué.

³ Uwunoi matu panguwasana Moab sibawa sininna pajaba pamaréntana.”

Yéhuda

⁴ Makkedai Puwangnge, “Makkolik-kolinni Yéhuda madosa, rimakkuwannanaro pasti Uhukkungngi matu mennang. Najjalékkaiwi mennang sining parénta-Ku sibawa dé' nabati-batiwi sining pappagguruwak-Ku. Ripapusai mennang ri déwata-déwata laing iya nasompaé toriyolona.

⁵ Rimakkuwannanaro, kirik-Ka matu api lao ri Yéhuda sibawa tunui gangka cappu sining bénténna Yérusalém.”

Pahukkunna Allataala lao ri Israélié

⁶ Makkedai Puwangnge, “Makkolik-kolinni madosa tau Israélié, rimakkuwannanaro pasti Uhukkungngi matu mennang. Tau malempu iya dé'é naulléi palisui inrenna, purani mennang nabalu mancaji ata. Makkuwatoro pangkaukenna mennang lao ri tau kasiyasi iya dé'é naulléi mpajai inrenna, namuni iyaro inrengngé banna singngangke sipasangngé lapikajé.

⁷ Natenre'i mennang tau malemma iya dé'é pakkullénna, sibawa passalai tau kasiyasié. Ambo' sibawa ana'é lusérengngi ata makkunrai iya padaé, angkanna nacarépai asek-Ku iya mapaccingngé.

⁸ Ri tungke' onrong assompang, matinroi tauwé sibawa waju iya nalaé selaku boro'na inrenna tau kasiyasié. Ri Bolana Allataalana, ménungngi mennang anggoro iya nalaé polé ri tau iya makkinrengngé ri mennang.

⁹ Namuni makkuwaro, éh umma'-Ku, untu' iko ritu upaccappui tau Amori iya matanré pada-pada pong camaraé sibawa mawatangngé pada-pada pong terpentingngé.

¹⁰ Purano Utiwi massu polé ri Maséré, sibawa Udulung molai padang kessi'é patappulo taung ittana. Purani Uwabbéréyang lao ri iko tanana tau Amorié mancaji wanuwammu muto.

¹¹ Purani upilé siyagangngaré polé ri ana'-ana'mu untu' mancaji nabi, sibawa siyagangngaré tau malolomu untu' mancaji tau Nazir. Dé'ga natongeng iyaro, éh tau Israélié? Iyya, Puwang pura mabbicara.

¹² Iyakiya mupaénungngi anggoro tau Nazir-é, angkanna mébbui mennang massakkarengngi jancinna. Sibawa muwattéyangngi nabi-nabié palettu'i pasek-Ku.

¹³ Makkekkuwangngé Utenre'ko matu lettu ri tanaé, angkammu maddaréké pada-pada karéta iya pennoé sibawa lureng gandong.

¹⁴ Muwi tau magattié lari dé'to naulléi leppe; tau mawatangngé ateddéngengngi matu awatangenna, sibawa tau baranié dé' naulléi matu passalama'i aléna.

¹⁵ Dé' naulléi matu mattahang pappanaé, tau magattié lari dé' nalulléi matu lari, sibawa pakkinnyarangngé dé' naleppe matu.

¹⁶ Iyaro essoé muwi prajuri iya kaminang baranié nasalai towi matu senjatana, nainappa lari. Iyya Puwang pura mabbicara.”