ABBILANGENG 9 - KITTA KAREBA MADECENG

Ramé-ramé Paskaé iya maduwaé

¹ Ri uleng maséddié ri laleng taung maduwaé nasalainnana bangsa Israélié Maséré, mabbicarani Puwangnge lao ri Musa ri padang kessi Sinai. Adanna Puwangnge,

^2-3 “Ri tanggala seppulo eppa ulengngéwé, mappammulai labunna essoé, harusu'i tau Israélié ramé-raméiwi Paskaé situru peraturang iya puraé ripattette.”

⁴ Nasuroni Musa bangsa Israélié ramé-raméiwi Paskaé.

⁵ Naramé-raméini mennang ri padang kessi Sinai ri arawéngngé tanggala seppulo eppa uleng séddi. Napogau' manenni pada-pada iya napparéntangngé Puwangnge lao ri Musa.

⁶ Iyakiya ri yelle'na mennang engka iya najisi'é nasaba géssai uju, angkanna dé' nawedding ramé-raméiwi Paskaé ri essoéro. Laoni mennanro mangolo ri Musa sibawa Harun

⁷ namakkeda, “Idi'é najisi'ki nasaba puraki géssa uju. Iyakiya magi naharusu'ki ripassangadi angkanna dé' nawedding makkasuwiyang akkarobang lao ri Puwangnge silaong silessu-silessuretta?”

⁸ Nappébali Musa, “Tajenni riyolo' narapika tarima panunju polé ri Puwangnge.”

⁹ Puwangnge suroi Musa

¹⁰ makkeda lao ri bangsa Israélié, “Rékko ri yelle'mu iyaré'ga wija-wijammu engka najisi' nasaba purai géssa uju iyaré'ga mattengngangngi ri laleng allalengeng mabélaé, harusu towi ramé-raméiwi Paskaé untu' Puwangnge.

¹¹ Iyakiya iyaro ramé-ramé harusu'i ripakangka siuleng rimunrinna, iyanaritu ri wenni tanggala seppulona eppa ri laleng uleng duwa. Ramé-raméiwi iyaro essoé sibawa manré bimbala Paska silaong roti iya dé'é napaké ragi sibawa ukkaju mapai.

¹² Aja' naengka musésa polé ri inanréro narapi pappa bajana éléna, sibawa aja' mupoloi muwi séddi bukunna olokolo iya muwakkasuwiyangengngé lao ri Iyya. Ramé-raméiwi iyaro Paskaé situru sibawa sininna peraturanna.

¹³ Sibalé'na tau iya dé'é nanajisi' sibawa dé'to narilaleng allalengengngé, iyakiya dé' najampangiwi ramé-raméiwi Paskaé, dé'na Uwangga'i séddi tau polé ri umma'-Ku, nasaba dé' nakkasuwiyangeng akkarobangeng lao ri Iyya ri wettu iya ripattentué. Iyaro tauwé harusu'i natanggung addimonrinna dosana.

¹⁴ Rékko ri yelle'mu engka séddi tau laing iya maéloé ramé-raméiwi Paskaé, harusu'i naramé-raméi situru sibawa sininna peraturanna sibawa attettekenna Hukkungngéro takkennai untu' tungke' tau, muwi tau Israél iyaré'ga tau laing.”

Ellung iya mattappaé

^15-16 Ri esso ripatettonna Kémana Puwangnge, poléni ellungngé sibawa tongkoi iyaro Kémaé. Mappammulai wennié narapi éléé iyaro ellungngé paitai pada-pada apié.

¹⁷ Tungke' ménré iyaro ellungngé, nabongkara'i tau Israélié akkémanna mennang, nainappa joppa. Na kégi-kégi iyaro ellungngé nonno, ri onrongngéro mennang makkémasi.

¹⁸ Nasaba paréntana Puwangnge iyaro bangsa Israélié nabongkara'i kémaé sibawa nasaba paréntanato Puwangnge napasangngi mennang paimeng. Ri wettu engkana mupa iyaro ellungngé ri yasé'na Kémana Puwangnge, tette'i mennang monro ri onrongngéro.

¹⁹ Rékko iyaro ellungngé maittai monro ri yasé'na iyaro Kémaé, tunru'i mennang lao ri peraturana Puwangnge sibawa dé' najoppa polé ri onrongngéro.

²⁰ Iyakiya biyasato banna siyagangngaré bawang essona iyaro ellungngé monro ri yasé'na Kémaéro. Muwi maga, paréntana Puwangnge ritu pattentui mennang monro riséuwaé onrong iyaré'ga joppai.

²¹ Biyasa iyaro ellungngé banna monro mappammulai arawéng narapi élé, na wettunna iyaro ellungngé ménré ri éléé, joppani mennang. Uppanna ménré iyaro ellungngé, muwi esso iyaré'ga wenni, joppai mennang.

²² Ri wettu engkana mupa iyaro ellungngé ri yasé'na Kémana Puwangnge, naullé duwangngesso, siuleng, sitaung iyaré'ga lebbi, sikuto wettunna mennang monro ri onrongngéro. Rékko ménré'ni iyaro ellungngé, nappai mennang joppa.

²³ Monroi mennang riséuwaé onrong sibawa joppai lao ri onrong laingngé situru paréntana Puwangnge iya nabbéréyangngé Puwangnge naolai Musa.