ABBILANGENG 4 - KITTA KAREBA MADECENG

Tugasna tau Léwi appanna Kéhat

¹ Puwangnge suroi Musa sibawa Harun

² bilangngi tau Léwi polé ri appanna Kéhat situru kaluwargana tungke'-tungke',

³ nainappa riyokii asenna sininna tau worowané iya makkéumuru' telluppuloé narapi limappuloé taung, iya mulléngngi pogau'i jamang waji'é ri Kémana Puwangnge.

⁴ Jamanna mennang iyanaritu murusu'i barab-barang iya pommapaccingngé.

⁵ Puwangnge mpéréngngi Musa iyaé peraturangngé: Rékko narapini wettunna ribongkara' akkémangngé, Harun sibawa ana'-ana'na harusu'i muttama ri Kémana Puwangnge, panonnoi kaing paddenring ri yolona Petti Assijancingngé, sibawa tongkoi iyaro Pettié sibawa kaingngéro.

⁶ Puranana, harusu'i mennang tongkoi sibawa silampa bingkulang alusu, nainappa pallebba kaing magawu ri yaséna, nanapasangngi aju pabbuléna iyaro Pettié.

⁷ Harusu'i mennang pallebba silampa kaing magawu ri yasé'na méjang appatalang roti untu' Puwangnge, na ri yasé'na méjangngéro harusu'i mennang palénne penné loppo, baki onrong dupa, baki onrong pakkasuwiyang, sibawa kendi untu' pakkasuwiyang uwai anggoro. Patala rotié harusu'i tuli engka ri méjangngéro.

⁸ Harusu'i mennang natongko maneng iyaro sibawa silampa kaing cella, nainappa pallebba silampa bingkulang alusu ri yasé'na, enrengngé pasangngi aju pabbuléna iyaro méjangngé.

⁹ Harusu'i mennang mala silampa kaing gawu sibawa tongkoi ajé lampué enrengngé lampu-lampunna, pakkakkasa untu' pépaccingiwi sumbu pajjennangengngé sibawa attarimanna, enrengngé sininna onrong minnya zaitungngé.

¹⁰ Ajé lampué sibawa sininna pappésukkuna harusu'i nadoko mennang sibawa silampa bingkulang alusu nainappa nataro ri yasé'na onrong abbulérengngé.

¹¹ Purairo harusu'i mennang pallebba silampa kaing gawu ri yasé'na mézba polé ri ulawengngéro, nanatongkoi silampa bingkulang alusu, nainappa napasang aju pabbuléna mézbaéro.

¹² Sininna paréwa iya ripaké ri laleng Bili' Mapaccingngé harusu'i mennang naala enrengngé nadoko sibawa silampa kaing gawu. Nainappa harusu'i mennang natongko silampa bingkulang alusu, nanataroi ri yasé'na ulérengngé.

¹³ Harusu'i mennang pépaccingiwi iyaro mézbaé polé ri awué, nainappa napallebbakeng silampa kaing collipao ri yasé'na.

¹⁴ Na ri yasé'naro harusu'i mennang napalénne sininna paréwa iya ripaké ri laleng assompangngé ri mézbaéro: onrong apié, sondo'é, sodé'é sibawa katowangngé. Nainappa harusu'i mennang natongko manenro sibawa silampa bingkulang alusu sibawa pasangngi aju pabbuléna.

^15-20 Makkedai Puwangnge lao ri Musa sibawa Harun, “Wettummu bongkara'i akkémangngé, Harun sibawa ana'-ana'na harusu'i muttama ri laleng Kéma-Ku sibawa tongkoi sininna barangngé sibawa paréwanna iya engkaé kuwaro. Purairo nappa sining tau Kéhat-é wedding polé untu' méssangngi. Iyakiya dé' nawedding mennang naita, maddeppériwi iyaré'ga géssai iyaro barab-barangngé, nasaba purani ripallaing untu' aléku. Rékko to napogau'i mennang, matéi matu. Jaji, kuwammengngi iyaro sining tau Kéhat-é aja' nalennye polé ri suku Léwié, Harun sibawa ana'-ana'na harusu tugaskangngi tungke'-tungke' ri yelle'na mennang aga iya harusu'é mennang natiwi. Iyanaro tugasna tau Kéhat-é wettunna Kéma-Ku ripalétté. Eléazar, ana' Harun tanggung jawakiwi sininna Kéma-Ku, minnya lampué, dupa, akkarobang gandongngé untu' pappatala iya tette'é, minnya upacaraé sibawa sininna iya engkaé ri laleng Kéma-Ku.”

Tugasna tau Léwi polé ri appanna Gérson

²¹ Puwangnge suroi Musa

²² bilangngi tau Léwi polé ri appanna Gérson situru kaluwargana tungke'-tungke'.

²³ Harusu'i naoki Musa sininna tau worowané iya makkéumuru telluppuloé narapi limappulo taung iya mullééngngi pogau' jamang waji'é ri Kémana Puwangnge.

²⁴ Ritugaskangngi mennang untu' makkai barab-barangngé:

²⁵ Kaing téndana Kémaéro sibawa pattongkona bagiyang ri lalengngé nenniya bagiyang saliwengngé polé ri bingkulang alusu'é, kaingngé ri sumpanna Kémaé,

²⁶ ténda-téndana sibawa sining tuluna untu' seddé Kémaé sibawa mézbaé, kaing ri gerbang seddéna, sibawa sininna paréwanna iya ripaké untu' pasangngi sininna barab-barangngéro. Mattanggung jawa'i mennang lao risininna jama-jamang iya engkaé assisumpungenna sibawa barab-barangngéro.

²⁷ Musa sibawa Harun harusu jagaiwi kuwammengngi jama-jamang iya nabbéréyangngé Harun sibawa ana'-ana'na lao risining tau Gérsongngéro napogau'i, sibawa sininna barang iya harusu'é riyakka, kuwammengngi naakkai.

²⁸ Iyanaro tugasna sining tau Gérsongngé ri laleng Kémaé; iyaro sining jamangngé harusu'i napogau' ri yawa pappimpinna Itamar, ana'na Imang Harun.

Tugasna tau Léwi polé ri appang Mérari

²⁹ Puwangnge suroi Musa bilangngi tau Léwi polé ri appanna Mérari situru kaluwargana tungke'-tungke'.

³⁰ Musa harusu mokii asenna sininna tau worowané iya makkéumuru telluppuloé narapi limappulo taung iya mullééngngi pogau'i jama-jamang waji'é ri Kémana Puwangnge.

³¹ Ritugaskangngi mennang untu' makkai paréwa-paréwanna Kémaéro, balo'-balo'na, alliri-allirinna sibawa pallanggana.

³² Makkuwatoro alliri-alliri seddéna iya mattulilingiyéngngi iyaro Kémaé sibawa pallanggana, patto-patto'na sibawa sining tuluna enrengngé sininna pakkakkasa'na iya riyapparelluwangngé untu' patettongngi. Tungke' tau ritugaskangngi tiwii barab-barang mattentué.

³³ Iyanaro sining jamanna appang Mérari; sininna jamanna mennang ri Kémana Puwangnge harusu'i napogau' ri yawa pappimpinna Itamar, ana'na Imang Harun.

Ribilanna sining tau Léwié

^34-48 Situru paréntana Puwangnge, Musa, Harun sibawa sining pamimping umma'é bilangngi iya tellu appangngé ri laleng suku Léwi, iyanaritu Kéhat, Gérson sibawa Mérari. Napogau'i mennang iyaro abbilangengngé tassikaluwarga-tassikaluwarga. Naokii mennang sining tau worowané iya makkéumuru telluppuloé narapi limappulo taung iya mullééngngi pogau'i jama-jamang waji'é ri Kémana Puwangnge. Iyanaé wassélé'na: Appang Jumella taunna Kéhat 2.750 Gérson 2.630 Mérari 3.200 Iya manenna: 8.580

Appang Jumella taunna

⁴⁹ Nasaba paréntana Puwangnge naolai Musa, tungke' tau riyokii sibawa tungke'-tungke' riwéréng tanggung jawa' lao ri aga iya harusu'é natumaningi iyaré'ga iya harusu'é naéssang.