ABBILANGENG 34 - KITTA KAREBA MADECENG

Pakkaséséng-pakkasésénna wanuwaéro

¹ Puwangnge mpéréngngi Musa

² iyaé parénta-paréntaé untu' bangsa Israélié, “Dé'na namaitta mumattamakiwi wanuwa Kanaan, wanuwa iya Uwéréngngékko selaku tana mana. Iyanaé sining pakkasésénna wanuwammuro.

³ Ri yattang, iyaro pakkaséséngngé mappammulai ri padang kessi Zin tuttungngi Edom. Ri alau iyaro pakkaséséngngé mappammulai ri cappa yattanna Tasi Maté,

⁴ bélo' liyattang mattuju ri Laleng Akrabim sibawa matteru ri Zin lettu ri Kadés-Barnéa ri yattang. Polé kuwaro bélo' liyajang ri tasi'é lettu ri Hazar-Adar, sibawa matteru ri Azmon.

⁵ Kuwaro bélo' lao ri lompo'é ri pakkasésénna Maséré sibawa maccappa ri Tasi Tengngaé.

⁶ Tasi Tengngaé selaku pakkaséséng wanuwammu ri tibang yajang.

⁷ Ri manorang, iyaro pakkaséséngngé mappammulai ri Tasi Tengngaé mattuju ri Bulu Hor

⁸ napolé kuwaro lao ri Laleng Hamat, nainappa matteru lao ri Zédad

⁹ sibawa lao ri Zifron sibawa maccappa'i ri Hazar-Enan.

¹⁰ Ri alau, iyaro pakkaséséngngé mappammulai ri Hazar-Enan lao ri Séfam.

¹¹ Polé kuwaro nonno ri Ribla ri seddé alauna Ain, nainappa matteru lao ri bulu-bulué ri wiring alauna Tappareng Galiléa,

¹² nainappa liyattang sillampé Salo Yordan lettu ri Tasi Maté. Iyanaro wanuwammu situru sining pakkasésénna iya mattulilingiyéngngi.”

¹³ Makkedai Musa lao ri bangsa Israélié, “Iyanaro tana iya maéloé mutarima sibawa muloteréi, tana iya manuru'é paréntana Puwangnge harusu'i ribagé lao ri aséra sitengnga suku bangsa Israélié.

¹⁴ Suku-suku Rubén sibawa Gad nenniya sibagiyang polé ri suku Manasyé purani natarima bagiyanna mennang, sibawa iyaro tanaé pura toni ritawangeng kaluwarga-kaluwargana mennang.

¹⁵ Iyaro tana manana mennang ri seddé alaunai Salo Yordan, ri seddéna kota Yérikho.”

Sining pamimping iya risuroé bagéi iyaro tanaé

¹⁶ Makkedai Puwangnge lao ri Musa,

¹⁷ “Iya harusu'é bagéi iyaro tanaé ri yelle'mu iyanaritu Imang Eléazar sibawa Yosua ana' Nun.

¹⁸ Jello tokko séddi pamimping polé ri tungke' suku untu' bantui Eléazar sibawa Yosua bagéi iyaro tanaé.”

^19-28 Asenna iyaro sining tauwé iyanaritu: Suku Pamimpinna Yéhuda Kaléb ana' Yéfune Siméon Samuél ana' Amihud Bényamin Elidad ana' Kislon Dan Buki ana' Yogli Manasyé Hanilél ana' Efod Efraim Kémuél ana' Siftan Zébulon Elisafan ana' Parnah Isakhar Paltiél ana' Azan Asyer Ahihud ana' Sélomi Naftali Pedaél ana' Amihud

Suku Pamimpinna

²⁹ Iyanaro sining tau iya naparéntangngé Puwangnge untu' bagéi tana manaé lao ri bangsa Israélié ri wanuwa Kanaan.