ABBILANGENG 22 - KITTA KAREBA MADECENG

Arung Moab mobbii Biléam

¹ Joppasi bangsa Israélié namakkéma ri tanéténa Moab, ri daéra liwenna Salo Yordan, seddéna kota Yérikho.

^2-3 Wettunna arung Moab iya riyasengngé Balak, ana' Zipor, méngkalingai pékkugiwi bangsa Israélié pura gaukengngi tau Amorié, sibawa iyaro bangsa Israélié battowa jumellana, métauni silaong sininna ra'ya'na.

⁴ Namakkeda tau Moab-é lao risining pamimpinna tau Midiangngé, “Dé'na namaitta iyaro garembolangngé napaccappu manengngi sininna séuwa-séuwaé iya engkaé ri seddéta pada-pada sapingngé paccappui wellaé ri padangngé.” Na Arung Balak

⁵ kiring suro untu' mobbii Biléam, ana' Béor, iya monroé ri kota Pétor seddéna Salo Efrat ri daéra Amau. Risuroi mennang palettu'i lao ri Biléam iyaé pasengngé polé ri Balak, “Issenni, engka séuwa bangsa polé ri Maséré; sining taunna tattale lao kégi-kégi sibawa sadiyana gasai wanuwatta.

⁶ Lebbi watangngi mennang naiya idi. Jaji, laoni mai! Tanrongekka mennang. Ajakké riyulléi caui mennang sibawa paddésu'i polé ri wanuwaéwé. Saba' mateppe'ka tau iya mubarakkakiyé lolongengngi matu barakka, sibawa tau iya mutanroiyé lolongengngi matu abusungeng.”

⁷ Nanalaona iyaro sining pamimpinna tau Moab-é nenniya Midiangngé sibawa tiwi saro untu' Biléam kuwammengngi namaélo tanroiwi tau Israélié. Lettu'nana ri Biléam, napalettu'ni mennang ri Biléam pasenna Arung Balak.

⁸ Adanna Biléam lao ri mennang, “Abbennino kuwaé. Bajapi ubirittaiyakko matu aga napowadakka Puwangnge.” Nanaonrona iyaro sining pamimpinna Moab ri onronna Biléam.

⁹ Napoléna Allataala ri Biléam sibawa makkutana, “Niga iyaro sining tauwé iya monroé ri onrommu, Biléam?”

¹⁰ Nappébali Biléam, “Surona Arung Balak polé ri Moab untu' mabbirittaiyangngi

¹¹ makkedaé séuwa bangsa iya polé ri Maséré massanrani kégi-kégi. Nasuroka Arung Balak tanroingengngi bangsaéro, kuwammengngi naulléi musui sibawa paddésu'i mennang.”

¹² Adanna Allataala lao ri Biléam, “Aja' mulao silaongengngi sining tauwéro, sibawa aja' mutanroiwi bangsaéro, nasaba purani Ubarakkaki.”

¹³ Pappa bajanana makkedani Biléam lao risining suronaro Balak, “Lisuno. Dé' napalaloka Puwangnge lao sibawakko.”

¹⁴ Nalisuna mennang ri Balak sibawa birittaiyangngi makkedaé dé' namaélo polé Biléam silaong mennang.

¹⁵ Nanakirinna Balak lebbi éga suro sibawa iya lebbi matanré pangka'na naiya pammulanna.

¹⁶ Napalettu'ni mennang ri Biléam paseng polé ri Balak, “Uwéllauwi sibawa masero: poléni', sibawa aja' tasampéyangngi.

¹⁷ Maéloka mabbéré saro iya maéga senna'é, sibawa pogau'i agi-agi iya mupowadaé. Poléni', namutanrongekka iyaro bangsaé.”

¹⁸ Iyakiya mappébaliwi Biléam, “Namuni iya maneng péra' sibawa ulaweng iya engkaé ri laleng saorajana Arung Balak nawajarekka, dé' nawedding uwajjalékkai paréntana Puwangnge, Allataala iya usompaé. Muwi ri laleng gau' iya baiccu'é dé'to uwulléi méwai.

¹⁹ Iyakiya makessingenni mabbenniko kuwaé, pada-pada iya napogau' sining suro iya riyoloé. Macinnaka missengngi aga engka mupa iya maéloé napowada Puwangnge lao ri iyya.”

²⁰ Iyaro wennié poléni Allataala ri Biléam sibawa makkeda, “Iyaro sining tauwé poléi untu' méllauko lao silaong mennang. Jaji sadiya-sadiyano untu' lao. Iyakiya iyana mupogau' iya riparéntangngékko.”

²¹ Pappa bajanana napatoppokini Biléam lapi-lapi kaleddé'na, nainappa maccowériwi iyaro sining pamimpinna Moab.

Biléam sibawa kaleddé'na

²² Iyakiya wettunna Biléam lao, macaini Allataala. Na wettu natonanginna Biléam kaleddé'na, ritinrosi ri duwa pattumaninna, tettongngi malaéka'na Puwangnge ri tengnga laleng untu' lawa-lawaiwi.

²³ Naitana iyaro malaéka'é tettong kuwaro sibawa peddang pura rampu, lésséni iyaro kaleddé'é polé ri lalengngé, nabélo' lao ri dare'é. Naunruni Biléam iyaro kaleddé'é nanatiwii paimeng ri lalengngé.

²⁴ Natettong malaéka'na Puwangnge ri bagiyang laleng iya macipié, ri pallawangenna duwa palla anggoro sibawa témbo' batu wali-wali.

²⁵ Wettunna iyaro kaleddé'é naita malaéka'na Puwangnge, mabbirinni angkanna tassipi ajéna Biléam ri témbo'é. Naunrusi Biléam iyaro kaleddé'é.

²⁶ Nainappa létté malaéka'na Puwangnge, natettong ri onrong iya lebbi macipié angkanna dé'gaga laleng laing untu' labe' ri abéyona iyaré'ga ataunna.

²⁷ Naitana malaéka'na Puwangnge, naparebbani aléna iyaro kaleddé'é. Macaini Biléam nanaunrui iyaro kaleddé'é sibawa tekkeng.

²⁸ Nanaébbuni Puwangnge iyaro kaleddé'é wedding mabbicara. Adanna iyaoro kaleddé'é lao ri Biléam, “Aga upogau' lao ri Puwang angkanna naunruka Puwakku narapi wékkatellu?”

²⁹ Nappébali Biléam, “Muwacculé-culéika! Akkalarapanna engka peddakku, pastini uwunoko!”

³⁰ Nappébali iyaro kaleddé'é, “Tenniyaka'ga iyya'é kaleddé'na Puwang iya maittaénna natonangika Puwang? Engkaga naengka uwéwa lao ri Puwang?” Nappébali Biléam, “Dé'.”

³¹ Nainappa Puwangnge mébbui Biléam naullé mitai malaéka'na Puwangnge tettong kuwaro sibawa peddang pura rampu. Masitta'ni Biléam suju' ri tanaé sibawa massompa.

³² Nakkutana malaéka'na Puwangnge, “Magi muwunrui kaleddé'mu narapi wékkatellu? Poléka untu' lawa-lawaiko, saba' manuru pallolongekku, dé' namakessing laoko.

³³ Wettunna naitaka kaleddé'mu, lésséi narapi wékkatellu. Rékko dé', pasti purano uwuno, iyakiya iyaro kaleddé'é upassalama'i.”

³⁴ Nappébali Biléam, “Madosaka. Dé' uwissengngi makkedaé tettongngi Puwang ri tengnga laleng untu' lawa-lawaika. Iyakiya makkekkuwangngé, rékko manuru pallolongenna Puwang dé' namakessing upatteru allalengengngéwé, maéloka lisu.”

³⁵ Iyakiya makkedai malaéka'na Puwangnge, “Accowé bawanno risining tauwéro. Iyakiya banna weddikko powadai aga iya uwassurowangngé powadai.” Nanapatteruni Biléam joppana sibawa iyaro sining surona Balak.

Balak duppaiwi Biléam

³⁶ Wettunna naéngkalinga Balak makkedaé maéloi polé Biléam, laoni duppaiwi ri kota Moab, iya monroé ri wirinna Salo Arnon, ri pakkasésénna daéra Moab.

³⁷ Adanna Balak lao ri Biléam, “Magi dé' mupolé wettu bunge' uwobbimu? Aga muwasengngi dé' uwulléi wajai saromu?”

³⁸ Nappébali Biléam, “Nah, poléna makkekkuwangngé. Iyakiya dé' gaga ha'ku powadai muwi aga sangadinna iya nassurowangngé Allataala upowada.”

³⁹ Nanalaona Biléam sibawa Balak ri kota Huzot.

⁴⁰ Kuwaniro Balak makkasuwiyangeng siyagangngaré kajunna saping sibawa bimbala. Sibagiyang polé ri jukuéro nawéréngngi Biléam sibawa sining pamimping iya naéwaé silaong.

Napowadana botona Biléam iya mammulangngé

⁴¹ Pappa bajana ritiwini Biléam ri Balak ménrékiwi bulu-bulu Bamot Baal. Polé kuwaro naulléi Biléam mitai sibagiyang polé ri bangsa Israélié.