ABBILANGENG 13 - KITTA KAREBA MADECENG

Seppulo duwa mata-mata

¹ Nakkeda Puwangnge lao ri Musa,

² “Polé ri yelle'na sining pamimping seppuloé duwa suku bangsaro, piléi séddi tau polé ritungke' suku. Suroi mennang lao salidikiwi tana Kanaan iya maéloé Uwabbéréyang lao ri tau Israélié, selaku mata-mata.”

^3-15 Situru sibawa paréntana Allataalaro, Musa suroi mennang polé ri padang kessi Paran. Iya manenna tauwéro iyanaritu sining pamimping ri yelle'na tau Israélié: Suku Pamimpinna Rubén Syamua ana' Zakur Siméon Safat ana' Hori Yéhuda Kaléb ana' Yéfune Isakhar Yigal ana' Yusuf Efraim Hoséa ana' Nun Bényamin Palti ana' Rafu Zébulon Gadiél ana' Sodi Manasyé Gadi ana' Susi Dan Amiél ana' Gemali Asyér Sétur ana' Mikhaél Naftali Nahbi ana' Wofsi Gad Guél ana' Makhi

Suku Pamimpinna

¹⁶ Iyanaro mata-mata iya nasuroé Musa untu' mitai iyaro wanuwaé. Hoséa ana' Nun risulléi asenna ri Musa mancaji Yosua.

¹⁷ Wettunna Musa suroi mennang joppa, mappasengngi lao ri mennang, “Joppana mattuju limanorang, mattuju ri bagiyang yattanna tana Kanaan, nainappa matteru ri daéra mabbulu-bulué.

¹⁸ Salidikiwi pékkugi wanuwaéro, maégaga pabbanuwana iyaré'ga céddé, mawatagga mennang iyaré'ga malemma.

¹⁹ Paréssai aga iyaro wanuwaé makessing iyaré'ga dé', sibawa aga pabbanuwana monroi ri désa-désaé iyare'ga kota-kota iya mabbénténgngé.

²⁰ Pakkasse'i atimmu. Itai aga macommo tanana sibawa maéga ajukajunna. Aja' muwallupaiwi tiwi lisu céddé buwa-buwa iya tuwoé kuwaro.” Iyaro wettué pammulanna wettu anggoro'é.

²¹ Nalaona iyaro sining tauwéro mattuju limanorang sibawa salidikiwi wanuwaéro mappammulai ri padang kessi Zin ri seddé yattang lao limanorang lettu ri kota Réhob, seddéna laleng laowé ri Hamat.

²² Bunge'-bunge'na laowi mennang ri bagiyang yattanna wanuwaéro nalettu ri kota Hébron, onrong naonroiyé sining tau Ahimangngé, Sésai sibawa Talmai, wija-wijanna Enak. Hébron ripatettongngi pituttaung riyolona kota Zoan ri Maséré.

²³ Nalettu'na mennang ri lompo Eskol. Kuwaniro mennang rette sitakké buwa anggoro iya makkuwaé mani tane'na, angkanna harusu'i naulé duwa tau. Tiwi towi mennang siyagangngaré buwa dalima sibawa buwa ara.

²⁴ Iyaro onrongngé riyasengngi Lompo Eskol nasaba takké buwa anggoro iya narette'é tau Israélié kuwaro.

²⁵ Puranana nasalidiki iyaro wanuwaé patappulo esso ittana, lisuni iyaro mata-mataé

²⁶ sibawa laporo'i lao ri Musa, Harun sibawa sininna umma Israélié iya maddeppungengngé ri Kadés, ri padang kessi Paran. Nacuritani mennang aga iya puraé naita sibawa majjellokengngi buwa-buwa iya natiwié mennang.

²⁷ Adanna mennang lao ri Musa, “Purani risalidiki iyaro wanuwaé sibawa mitai makkedaé sugii namacommo tanana, sibawa iyanaé céddé buwa-buwa polé kuwaro.

²⁸ Iyakiya pabbanuwana iyaro wanuwaé pada mawatang. Kota-kotana mennang battowa sibawa mabbénténg. Nappani, riitai sining tau wijanna rassasaé kuwaro.

²⁹ Tau Amalé'é monroi ri bagiyang yattanna wanuwaéro; tau Hét-é, Yébus-é sibawa Amorié monroi ri daéra mabbulu-bulué; na tau Kanaangngé monroiwi daéra mattuttung wiring tasi'é sibawa mattuttung wiwing Salo Yordan.”

³⁰ Iyakiya Kaléb pattennangngi atinna sining tau iya maddaréké lao ri Musa. Adanna Kaléb, “Iyaro wanuwaé harusu'i rigasa sibawa sittaiwi makkekkuwangngétto, nasaba genne awatangetta untu' caui.”

³¹ Iyakiya makkedai iyaro sining tau iya lisué silaong Kaléb, “Dé', dé' tasanggu' luruiwi mennang. Pabbanuwana iyaro wanuwaé lebbi mawatangngi naiya idi.”

³² Nainappa mennang pallebbang curita bellé ri yelle'na tau Israélié passalenna wanuwa iya puraé namata-matai mennanro. Adanna mennang, “Iyaro wanuwaé mabbahaya senna, mala untu' pabbanuwana muto. Sining tau iya riitaé kuwaro maloppo senna watakkaléna.

³³ Mala mitaki tau iya pada-padaé rassasa, iyanaritu wijanna tau Enak-é. Rékko ribandingngi sibawa mennang, pappénedditta padami incalé, na mattentuni makkuwaro anggapanna mennang lao ri idi.”