ABBILANGENG 12 - KITTA KAREBA MADECENG

Rihukkunna Miryam

¹ Malani Musa séddi makkunrai Kus mancaji bainéna, na iyanaro napancaji alasang Miryam sibawa Harun untu' cellai Musa.

² Adanna mennang, “Naolaiga Musa bawang Puwangnge mabbicara? Dé'ga nabbicara naola towi idi?” Naéngkalingani Puwangnge aga iya napowadaé mennang.

³ Musa iyanaritu tau iya mariyawa ati senna'é, napakacauriwi sininna tau iya tuwoé ri linoéwé.

⁴ Teppa makkedani Puwangnge lao ri Musa, Harun sibawa Miryam, “Iko sipattellu laoko ri Kéma-Ku.” Nanalaona mennang kuwaro

⁵ nananonnona Puwangnge ri laleng alliri ellungngé. Tettongngi Puwangnge ri sumpang Kéma-Na sibawa mobbii Harun nenniya Miryam. Malluruni iya duwa tauwéro,

⁶ namakkeda Puwangnge, “Engkalingai iyaé ada-adak-Ku! Rékko engka séddi nabi ri yelle'mu, Uwappaddissengengngi alé-Ku lao ri aléna ri laleng pakkitang-pakkitangngé nenniya mabbicaraka sibawa aléna ri laleng nippi.

⁷ Iyakiya dé' nakkuwaro sibawa atak-Ku Musa. Aléna ritu tau iya matinulué ri yelle'na umma'-Ku.

⁸ Enrengngé mabbicaraka sibawa aléna siyolong tappa, sibawa manessa enrengngé dé' nasibawangngi patteppung. Mala muwi rupak-Ku purani naita! Magi mubarani méwai Musa, atak-Kuro?”

⁹ Macai senna'ni Puwangnge lao ri iya duwa, nalao.

¹⁰ Wettunna iyaro ellungngé nasalai Kémana Puwangnge, paitani Miryam nakenna lasa oli iya mabbahayaé; maputé olina pada-pada ape'é. Wettunna Harun giling lao ri Miryam sibawa mitai makkedaé nakennani iyaro lasaé,

¹¹ makkedani lao ri Musa, “Tulungngi, Puwakku, aja' taleppessakki risissa nasaba dosa iya riyébbué ri laleng adonggotta.

¹² Aja' taleppessangngi mancaji pada-pada ana' lolo iya matéénna najaji, sibawa sitengnga makebbong jukuna.”

¹³ Namangobbina Musa lao ri Puwangnge, “Oh Allataala, uwéllauwi, pajjappai!”

¹⁴ Nappébali Puwangnge, “Akkalarapanna riyamméccuiwi rupanna ri ambo'na, dé'ga napitungngesso ittana harusu'i masiri? Passalai polé ri akkémangngé pitungngesso ittana, napurapiro naweddinni muttama paimeng.”

¹⁵ Naripassuna Miryam polé ri akkémangngé pitungngesso ittana, sibawa iyaro bangsaé dé' nalétté polé kuwaro narapi Miryam ripalalo lisu ri akkémangngé.

¹⁶ Nainappa mennang nasalai Hazérot namakkéma ri padang kessi Paran.