ABBILANGENG 10 - KITTA KAREBA MADECENG

Tarompé-tarompé polé ri péra'é

¹ Makkedai Puwangnge lao ri Musa,

² “Ebbuno duwa tarompé polé ri péra' rilanroé untu' mobbii pabbanuwaé maddeppungeng iyaré'ga untu' suroi mennang joppa.

³ Rékko riseppung malampéi iya duwa, bettuwanna sininna umma'é harusu'i maddeppungeng mattulilingiko ri yolona sumpanna Kéma-Ku.

⁴ Iyakiya rékko séddi bawang riseppung, bettuwanna banna sining tomariyoloé harusu maddeppungeng mattulilingiko.

⁵ Rékko riseppungngi maponco'-ponco' tarompé'é, iyaro tanranna sining suku-suku iya makkémaé ri seddé alau harusu'i joppa.

⁶ Rékko riseppungngi maponco'-ponco' untu' mabbékkaduwanna, suku-sukué ri seddé yattang harusu joppa. Jaji oni iya maponco'-ponco'é makkébettuwangngi harusu'i joppa umma'é,

⁷ naiya oni iya malampéé makkébettuwangngi harusu'i maddeppungeng umma'é.

⁸ Iyaro sining tarompé'é harusu'i naseppung sining imangngé, ana'-ana'na Harun. Iyanaro peraturang iya harusu'é muturusi untu' mannennungeng.

⁹ Sibawa rékko mammusuko ri wanuwammu untu' méwaiwi alému polé ri bali iya mallurué, seppungngi iyaro sining tarompé'é. Na Iyya, Puwang Allataalamu, mattulung matu sibawa passalama'ko polé risining balimmu.

¹⁰ Makkuwatoro ri esso-esso marennummu, iyanaritu ri pésta-pésta Uleng Barué sibawa ramé-ramému iya laingngé, iyaro tarompé'é harusu'i riseppung wettummu makkasuwiyangeng akkarobangeng ritunu sibawa akkarobangeng pappasidamé lao ri Iyya. Na Utulukko matu. Iyya'na Puwang Allataalamu.”

Joppana tau Israélié

¹¹ Ri laleng taung maduwaé nasalainnana bangsa Israélié Maséré, ri tanggala duwappulona uleng duwa, ménré'ni ellungngé ri yasé'na Kémana Puwangnge.

¹² Nanajoppana tau Israélié matturu-turuseng salaiwi padang kessi Sinai, nanappésauna iyaro ellungngé wettunna lettu ri padang kessi Paran.

¹³ Iyanaro pammulanna mennang joppa nasaba paréntana Puwangnge naolai Musa.

¹⁴ Kaminang riyolo joppai tentara iya maccinaungngé ri yawa bandéra passéddiyanna Yéhuda, tassipasukang-tassipasukang: Nahason, ana' Aminadab pimpingngi barisi'na suku Yéhuda,

¹⁵ Nétaneel ana' Zuar pimpingngi barisi'na suku Isakhar,

¹⁶ sibawa Eliab ana' Hélon pimpingngi barisi'na suku Zébulon.

¹⁷ Nainappa ribongkara Kémana Puwangnge, najoppana appanna Gérson sibawa Mérari iya méssangngéngngi Kémaéro.

¹⁸ Nainappa joppa tentara iya maccinaungngé ri yawa bandéra passéddiyanna Rubén, tassipasukang-tassipasukang: Elizur ana' Syédéur pimpingngi barisi'na suku Rubén,

¹⁹ Sélumiél ana' Zurisyadai pimpingngi barisi'na suku Siméon,

²⁰ sibawa Elyasaf ana' Réhuél pimpingngi barisi'na suku Gad.

²¹ Purairo joppani sining tau Kéhat-é iya méssangngéngngi sining barab-barang mapaccingngé. Rékko lettu'i mennang ri onrong akkémangngé iya rappinaé, purani ripasassi Kémana Puwangnge.

²² Nainappa mancinrola tentara iya maccinaungngé ri yawa bandéra passéddiyanna suku Efraim, tassipasukang-tassipasukang: Elisama ana' Amihud pimpingngi barisi'na suku Efraingngé,

²³ Gamaliél ana' Pédazur pimpingngi barisi'na suku Manasyé,

²⁴ sibawa Abidan ana' Gidéoni pimpingngi barisi'na suku Bényamin.

²⁵ Paccappurenna joppani tentara iya maccinaungngé ri yawa bandéra passéddiyanna suku Dan. Mennang iyanaritu pengawal rimunri sininna passéddiyangngé. Joppani mennang tassipasukang-tassipasukang: Ahiézer ana' Amisyadai pimpingngi barisi'na suku Dan.

²⁶ Pagiél ana' Okhran pimpingngi barisi'na suku Asyer,

²⁷ sibawa Ahira ana' Enan pimpingngi barisi'na suku Naftali.

²⁸ Iyanaro atturu-turusenna mabbari si tau Israélié, tassipasukang-tassipasukang, sises-siseng mennang joppa untu' létté.

²⁹ Makkedai Musa lao ri ipana, Hobab ana' Réhuél tau Midiangngé, “Maéloki joppa lao ri onrong iya manuru'é adanna Puwangnge maélo riwérékki. Puwangnge pura majjanciyangngi iya makessingngé lao ri tau Israélié. Jaji accowéno, maéloki pogau' décéng lao ri iko.”

³⁰ Nappébali Hobab, “Tarima kasi, iyakiya macinnaka lisu ri kampong assalekku.”

³¹ Nakkéda Musa, “Aja' musalaiki, weddikko mancaji panunju laletta, saba' muwisseng kégaki wedding makkéma ri padang kessi'é.

³² Rékko maccowéko, sininna iya makessingngé iya napogau'é Puwangnge lao ri idi, ripogau' towi matu lao ri iko.”

Joppana bangsa Israélié

³³ Nasalainnana bangsa Israélié Sinai, bulu naonroiyé Puwangnge, joppani mennang tellungngesso ittana. Petti Assijancinna Puwangnge tuli ritiwii poddiyoloiwi mennang untu' sappa onrong makkéma untu' mennang.

³⁴ Rékko joppai mennang polé ri onrong akkémangngé, ellunna Puwangnge engkai ri yasé'na mennang ri essoé.

³⁵ Sises-siseng iyaro Petti Assijancingngé maélo riyakka makkedai Musa, “Oto'ni, oh Puwang, patassiya-siyai balimmu angkanna tau iya benciyékko lariwi.”

³⁶ Sibawa sises-siseng iyaro Petti Assijancingngé lettu ri onrong appésaungngé, makkedai Musa, “Lisuni' oh Puwang, ri massebbu-sebbu kaluwargana Israélié.”