2 SAMUEL 9 - KITTA KAREBA MADECENG

Daud sibawa Méfibosét

¹ Riséuwaé esso makkutanai Daud, “Engka mupaga tau iya tuwoé polé ri kaluwargana Saul? Rékko engka, macinnaka pogau'i makessingngé lao ri aléna nasaba Yonatan.”

² Kaluwargana Saul mappunnai ata iya riyasengngé Ziba, narisuro mangolo ri Arung Daud. Makkutanani arungngé, “Ikoga Ziba?” Nappébali, “Iyyé, Datu.”

³ Nainappa makkutana arungngé, “Engka mupaga tau iya tuwoé polé ri kaluwargana Saul? Macinnaka pogau'i makessingngé lao ri aléna, pada-pada iya puraé uwajjanciyang ri Allataala.” Nappébali Ziba, “Engka mupa séddi tau ana' worowanéna Yonatan. Képpangngi.”

⁴ Nakkutana arungngé, “Kégani?” Nappébali Ziba, “Ri Lodebar, ri bolana Makhir ana' Amiél.”

⁵ Nanassurowanni Arung Daud mobbii ana' worowanéna Yonatanro.

⁶ Iyaro ana' worowanéna Yonatan riyasengngi Méfibosét. Wettunna polé, suju'ni pakalebbii Daud. Nariwérékkadaina ri Daud, adanna, “Méfibosét,” namappébali, “Iyyé, Datu.”

⁷ Nakkutana Daud, “Aja' mumétau. Maéloka masémpo ati lao ri iko nasaba Yonatan ambo'mu. Sininna tanana nénému Saul, maéloka palisungekko sibawa untu' mannennungeng weddikko manré ri saorajaé.”

⁸ Nasuju' si Méfibosét sibawa makkeda, “Aga bettuwanna atattaé! Magi Datu namakessing makkuwaro lao ri atatta?”

⁹ Nainappa riyobbi Ziba atanna Saulro ri arungngé, sibawa makkeda, “Sininna waramparang nasalaiyé Saul sibawa kaluwargana uwéréngngi eppona puwammué.

¹⁰ Iko sibawa ana'-ana'mu enrengngé pabbantummu harusu jamai tanaéro untu' kaluwargana puwammu Saul, namuwéréngngi wassélé tanaéro lao ri mennang untu' paggenne'i apparelluwanna. Iyakiya Méfibosét weddingngi manré ri saorajaé mannennungeng.” (Ziba mappunnai 15 ana' worowané sibawa 20 ata.)

¹¹ Nappébali Ziba lao ri arungngé, “Sininna paréntana Datu maéloi atatta pogau'i.” Jaji sisamani manré Méfibosét sibawa arungngé, pada-pada ana'na Arung Daud.

¹² Méfibosét mappunnai ana' worowané iya riyasengngé Mikha. Sininna anggota kaluwargana Ziba mancajini ata-atanna Méfibosét.

¹³ Makkuwaniro Méfibosét iya sala-salangngé ri iya duwa ajénaro monroi ri Yérusalém sibawa tuli manré ri saorajaé.