2 SAMUEL 8 - KITTA KAREBA MADECENG

Sining apakalanna Daud ri laleng ammusurengngé

¹ Siyagangngaré wettu ri monrinna nagasani Arung Daud tau Filistingngéssi. Nacauni mennang sibawa nasittaiwi tanana mennang.

² Nacau towi Daud tau Moab-é. Nasuroi mennang léwu ri tanaé, nainappa nauno duwa tau ri yelle'na tellu tau. Jaji, tunru'ni tau Moab-é lao ri Daud sibawa makkamaja pakkasuwiyang lao ri aléna.

³ Nacau towi Daud Arung Hadadézer ana' Réhob iya mapparéntaé ri Zoba, iyanaritu séuwa akkarungeng ri seddéna Damsyik. Iyaro wettué mattengngangngi Hadadézer ri laleng allalengengngé maélo palisui akuwasanna ri daéra seddéna ulunna Salo Efrat.

⁴ Natawanni Daud 1.700 tau tentara makkinnyaranna sibawa 20.000 tau tentara mallalenna. Naképoni sininna anyarangngé, sangadinna sibagiyang, genne untu' seratu karéta musu.

⁵ Kirinni tentara tau Siriaé polé ri Damsyik untu' duwangngi Arung Hadadézer. Iyakiya Daud caui mennang sibawa mpunoi 22.000 tau polé ri mennang.

⁶ Nainappa Daud patettong akkémang-akkémang tentara ri laleng daérana mennang, natunru'na mennang sibawa makkamaja pakkasuwiyang lao ri aléna. Puwangnge mpéréngngi apakalang Daud kégi-kégi mammusu.

⁷ Kaliyawo-kaliyawo ulaweng iya napaké Hadadézer narampasa'ni Daud sibawa natiwii ri Yérusalém.

⁸ Ri lainnaéro mala towi Daud gessa maéga senna polé ri Bétah sibawa Bérotai, kota-kota iya nakuwasaiyé riyolo Hadadézer.

⁹ Naéngkalingani Arung Tou polé ri Hamat makkedaé nacauni Daud sininna tentarana Hadadézer.

¹⁰ Nanasuroni Yoram ana' worowanéna untu' palettu selleng ri Arung Daud sibawa passalama'i nasaba apakalannaro, saba' biyasai Hadadézer mammusu sibawa Tou. Laoni Yoram ri Daud sibawa tiwi maéga hadiya polé ri ulawengngé, péra'é sibawa gessaé.

^11-12 Nakkasuwiyangenni Arung Daud sininna hadiyaéro lao ri Puwangnge untu' riyakkégunang ri laleng upacara assompangngé. Makkuwatoro nagaukengngi barab-barang ulawengngé sibawa péra' iya puraé narampasa polé ri Hadadézer sibawa bangsa-bangsa iya nacaué, iyanaritu bangsa Edongngé, Moab-é, Amongngé, Filistingngé sibawa Amalé'é.

¹³ Lebbi tarompoi asenna Daud wettunna lisu puranana nauno 18.000 tau Edom ri Lompo Pejjé.

¹⁴ Patettonni akkémang-akkémang tentara risininna Edom, sibawa iyaro sining tau Edongngé tunru'ni ri aléna. Puwangnge mpéréngngi apakalang Daud kégi-kégi mammusu.

¹⁵ Makkuwaniro Daud paréntai sininna Israélié sibawa jagaiwi kuwammengngi ra'ya'na tuli rigaukengngi adélé enrengngé makessing.

^16-17 Iyanaé pejaba-pejaba tanré iya nakkaé Daud: Pallima tentara: Yoab ana' Zéruya; Jurutulisi'na saorajaé: Yosafat ana' Ahilud; Imang-ngimang: Zadok ana' Ahitub sibawa Ahimélékh ana' Abyatar; Jurutulisi'na wanuwaé: Séraya

¹⁸ Kapala pengawal paribadinna arungngé: Bénaya ana' Yoyada; Imang-ngimang ri saorajaé: ana'-ana' worowanéna Daud.