2 SAMUEL 5 - KITTA KAREBA MADECENG

Mancaji arunna Daud ri Israélié sibawa Yéhuda

¹ Purairo poléni sininna pamimpinna suku-suku Israélié ri Daud ri Hébron sibawa makkeda, “Idi'é siyajinna mupa Datu.

² Riyolopa nariyolo, mala wettunna mupa Saul paréntaki, Datuto pimpingngi tentara Israélié tungke' mennang maju mammusu, nainappani pura majjanciwi Puwangnge lao ri Datu makkedaé Datu ritu iya pimpingngéngngi matu umma'na sibawa mancaji arunna mennang.”

³ Mébbuni Daud assijancing sibawa sining pamimping Israéliéro, nainappa nalanti mancaji arunna Israélié.

⁴ Telluppulo taung umuru'na Daud wettunna mancaji arung, namapparéntai patappulo taung ittana.

⁵ Ri Hébron naparéntai Yéhuda pituttaung sitengnga ittana, sibawa ri Yérusalém naparéntai sininna Israélié sibawa Yéhuda telluppulo tellu taung ittana.

⁶ Riséuwaé esso Arung Daud sibawa ana' buwana joppani maélo gasai Yérusalém. Tau Yébus-é pabbanuwana kotaéro, nasengngi makkedaé dé' naulléi matu Daud caui Yérusalém. Rimakkuwannanaro makkedani mennang ri aléna, “Dé' muwulléi matu muttama kumaiyé; muwi sining tau buta sibawa sining tau képpang naulléto paddésu'ko.”

^7-9 Makkedani Daud lao ri ana' buwana, “Engkaga kuwaé tau iya benciyéngngi tau Yébus-é pada-pada ubencinna mennang? Cuku'ga paccéccénna angkanna macinna senna'i mpunoi mennang? Rékko makkuwaitu, uttama'no lalo ri balombong uwai namugasai sining tau képpangngé sibawa butaé iya ucéccéro.” (Iyanaro saba'na nakkeda tauwé, “Tau butaé sibawa tau képpangngé dé' nawedding muttama ri Bolana Puwangnge.”) Naulléni Daud sittaiwi bénténg Sion sibawa tudangiwi. Nasenni “Kota Daud”. Iyaro kotaé napatettongngi ri mattulilinna bénténgngéro, mappammulai ri seddé alauna bulu-bulu iya ripakatanré sibawa tana.

¹⁰ Pédé maitta Daud pédé mawatang, nasaba Puwang, Allataala Iya Pommakuwasaé tulungngi.

¹¹ Arung Hiram polé ri wanuwa Tarsus kiringngi duta-dutana lao ri Daud, makkuwatoro aju camara Libanon sibawa sining tukang kajué enrengngé sining tukang batué untu' patettong saoraja.

¹² Rimakkuwannanaro mateppe'ni Daud makkedaé Puwangnge pura pakkasse'i selaku arunna Israélié, sibawa pakkasse'i akkarungenna untu' apentingenna umma'na Puwangnge.

¹³ Létté'nana Daud polé ri Hébron lao ri Yérusalém, napubainési siyagangngaré makkunrai untu' gundi'na; nanatattambana ana'-ana' worowanéna sibawa makkunrainna.

¹⁴ Ana'-ana' worowanéna iya rijajiyangngé ri Yérusalém iyanaritu: Syamua, Sobab, Natan, Salomo,

¹⁵ Yibhar, Elisua, Néfég, Yafia,

¹⁶ Elisama, Elyada sibawa Elifélét.

Apakalanna lao ri tau Filistingngé

¹⁷ Wettunna naéngkalinga tau Filistingngé makkedaé mancajini Daud arunna Israélié, poléni mennang maélo tikkengngi. Iyakiya naéngkalingai Daud gau'éro nalao ri bénténgngé.

¹⁸ Lettu'ni tau Filistingngé ri Lompo Réfaim sibawa tudangiwi.

¹⁹ Makkutanani Daud ri Puwangnge, “Harusu'ka'ga gasai tau Filistingngéro? Aga Muwérékka matu apakalang?” Nappébali Puwangnge, “Gasani! Uwérékko matu apakalang!”

²⁰ Nanalaona Daud ri Baal-Pérasim nakkuwaniro nacau pasukang Filistingngéro. Namakkeda, “Puwangnge pura leppoi attahangenna balikku, pada-pada lémpe'é ruttungngi séuwa-séuwaé ri laleng sikédé.” Iyanaro saba'na nariyaseng iyaro onrongngé Baal-Pérasim.

²¹ Larini pasukang Filistingngé tennarapini tiwii dato'-dato' barahalana. Iyaro dato'-dato'é nalani Daud sibawa ana' buwana.

²² Dé' namaitta rimunrinna polési tau Filistingngé tudangiwi Lompo Réfaim.

²³ Siseppi Daud méllau panunju ri Puwangnge. Nappébali Puwangnge, “Aja' mugasai mennang polé kuwaé, iyakiya joppano maccenné namugasai polé ri munri, ri seddéna ajukajung murbéié.

²⁴ Rékko muwéngkalingani oni pada-padaé akka ajé tau mabbarisi'é ri coppo'na ajukajungngéro, majuno, saba' maélo-Ka joppa ri yolomu untu' caui tentara Filistingngé.”

²⁵ Napogau'ni Daud aga iya napparéntangngé Puwangnge, nanaulléni pasoroi tau Filistingngé polé ri Géba lettu ri Gézer.