2 SAMUEL 22 - KITTA KAREBA MADECENG

Elong apakalanna Daud

¹ Puranana napassalama Puwangnge Daud polé ri Saul sibawa polé ri sininna balinna iya laingngé, napuwélonni Daud iyaé élongngé untu' Puwangnge: [

² Upoji-Ko, oh Puwang, Iko ritu awatangekku.]

³ Puwangnge pada-padai bénténg iya mawatangngé onrokku mallinrung. Allataalaku pada-padai bulu batué, onrokku maccinaung. Pada-pada kaliyawoé tongkoka, sibawa jagaika kuwammengngi natuli amakka.

⁴ Mangobbika lao ri Puwang iya sipato'é ripoji, napaleppe'ka polé risining balikku.

⁵ Riyattulilingika ri abala amaténgngé sibawa riyalle ri lémpe abinasangngé.

⁶ Riyattulilingika ri abala amaténgngé, siyo-siyo amaténgngé engkai ri yoloku.

⁷ Ri laleng aposongekku mangobbika lao ri Puwangnge, goraka lao ri Allataalaku méllau pattulung. Polé ri Bolana Naéngkalingai saddakku sibawa jampangiwi pangobbiku.

⁸ Nanataggottang tanaé sibawa ténré, goyanni akkatettongenna bulué sibawa tatténréng nasaba caina Allataala!

⁹ Mapporo rumpué polé ri sebbo inge'-Na, api sibawa bara massu polé ri bawa-Na.

¹⁰ Napuwé'i langié, nananonno-Na, nasibawang ellung mapettang ri yawana ajé-Na.

¹¹ Luttui sibawa tonangi kérub; sajéi ri yasé'na panni angingngé.

¹² Nakalémoriwi Aléna sibawa apettangeng; ellung malilling iya makkompe'é mattulilingiwi.

¹³ Polé ri billa'é ri yolo-Na, massuni ellungngé, bosi ése'é sibawa apié.

¹⁴ Namagguttu Puwangnge polé ri bétaraé, Iya Pommatanré mapparéngkalingangngi saddan-Na.

¹⁵ Nattémbakengngi sining pana-Na, nanapatassiya-siyai balié. Napaccenné-cennéi billa'é makkolik-koling sibawa mébbui mennang lari.

¹⁶ Tattimpa borina tasi'é sibawa tabbukka pallanggana linoé Wettunna Puwangnge nagera' balin-Na sibawa macai.

¹⁷ Polé ri yasé naloro'i liman-Na Puwangnge; Nakkatennikka sibawa Nagettekka polé ri uwai iya maliyungngé.

¹⁸ Napassalama'ka polé ri bali iya poré sibawa polé risining tau iya benciyékka nasaba mawatang senna'i mennang untu' aléku.

¹⁹ Nagasaka mennang wettukku nakenna abala iyakiya Puwangnge mancaji pattulukku.

²⁰ Napaleppe'ka polé ri abalaé sibawa passalama'ka nasaba Naélorika.

²¹ Nawale'i Puwangnge pangkaukekku iya tongengngé; Nabarakkakika saba' dé' upasala.

²² Uturusiwi paréntana Puwangnge, sibawa dé' uwabboko polé ri Allataalaku.

²³ Sininna hukkun-Na upuriyatiwi, parénta-parénta-Na dé' utettangngi.

²⁴ Naisseng makkedaé dé' cellaku sibawa pabélaiwi alé polé ri asalangngé.

²⁵ Nanawale'i Puwangnge pangkaukekku iya tongengngé saba' Naissengngi dé' upasala.

²⁶ Puwang, matinulu-Ko lao ri tau iya matinulué sibawa makessingngi lao ri tau makessingngé.

²⁷ Lao ri tau mapaccingngé mupannessai alému mapaccing, iyakiya tau majaé mumusui.

²⁸ Tau iya mariyawa atié mupassalama'i; iyakiya tau iya matempoé mupatunru'i.

²⁹ Mupalluwa'i pajjennangekku; Puwang Allataalaku tajangiwi apettangekku.

³⁰ Mupéwatangika untu' paccappui balikku; nasibawang bantuwanna Allataalaku uleppoi attahangenna mennang.

³¹ Pangkaukenna Allataala sukkui, jancinna Puwangnge weddingngi riyatepperi! Pada-padai kaliyawoé lao ri sininna iya mallinrungngé ri Aléna.

³² Saba' banna Puwangnge ritu Allataala; Allataalata bawang pangéwaingetta.

³³ Aléna ritu Allataala iya péwatangiyékka sibawa mébbui asekku amang.

³⁴ Napéwatangiwi ajéku pada-pada ajé jongaé, sibawa jagaiwi asalamakekku ri bulué.

³⁵ Napagguruka untu' mammusu, angkanna weddikka paggettengngi pana iya kaminang mawatangngé.

³⁶ Puwang, Iko linrungika sibawa passalama'ka, nenniya tumpe'ka sibawa akuwasam-Mu mancajika riyattuwang nasaba tindakam-Mu.

³⁷ Mujagaika kuwammengngi dé' naritawakka sibawa dé' naengka namabuwang.

³⁸ Ulellungngi balikku sibawa ucaui mennang, sibawa pémmali soro narapi mennang cappu.

³⁹ Uwabbantingeng mennang narapi dé' naulléi tokkonna, rebbai mennang ri yolona ajéku dé' pakkullénna.

⁴⁰ Muwérékka awatangeng untu' mammusu, sibawa apakalang lao risining balikku.

⁴¹ Muwébbui balikku lari polé ri iyya; upaccappui sining tau iya benciyékka.

⁴² Gorai mennang, iyakiya dé'gaga mattulung, mangobbii mennang lao ri Puwangnge, iyakiya dé' Nappébali.

⁴³ Uwancuru'i mennang pada-pada awu iya mattarumpué, sibawa usering pada-pada bungkaé ri lalengngé.

⁴⁴ Mupaleppe'ka polé ri appang iya madorakaé, sibawa pancajiko panguwasana bangsa-bangsaé; bangsa iya dé'é uwissengngi mancaji atakku.

⁴⁵ Tunru ri iyya sining tau laingngé, sibawa mapato rékko naéngkalingai paréntaku.

⁴⁶ Teddénni abaraningenna mennang; ténré mennang sibawa massu polé ri bénténna.

⁴⁷ Tuwoi Puwangnge! Ripojiwi pangéwaingekku! Pakarajai arajanna Allataala, pappassalama'ku!

⁴⁸ Nawérékka apakalang lao ri balikku, Napatunru'i bangsa-bangsaé ri yoloku,

⁴⁹ Napassalama'ka polé risining balikku. Puwang, Muwérékka apakalang lao ri balikku, Mulinrungika polé risining tau mabecco'é.

⁵⁰ Naupakaraja-Ko ri yelle'na bangsa-bangsaé, sibawa upuwélongek-Ko pappoji-pojiyang.

⁵¹ Allataala mabbéré apakalang battowa lao ri arun-Na, tette'i namaséi tau napilé-Na, iyanaritu Daud sibawa wija-wijanna untu' mannennungeng.