2 SAMUEL 21 - KITTA KAREBA MADECENG

Rihukkung maténa wija-wijanna Saul

¹ Wettunna mapparénta Daud, kajajiyanni akkadéreng masero senna'é iya ittanaé telluttaung bujuru. Nanaéllau Daud panunju'na Puwangnge passalenna gau'éro, namakkeda Puwangnge, “Iyaro akkadérengngé iyanaritu nasaba asalanna Saul sibawa kaluwargana, purai mennang nauno sining tau Gibéongngé.”

² (Sining tau Gibéongngé tenniya tau Israél; muttama'i mennang sikalompo baiccu ri tau Amorié. Purai majjanci sining tau Israélié maélo linrungiwi mennang, iyakiya purai nausahakang Saul paccappui mennang nasaba napikkiri'i apentingenna tau Israélié sibawa Yéhudaé.) Nanaobbini Daud iyaro sining tau Gibéongngé,

³ namakkutana lao ri mennang, “Aga wedding upogaukekko? Macinnaka mpajai asalang iya puraé ripogau' lao ri iko, kuwammengngi mubarakkakiwi umma'na Puwangnge.”

⁴ Nappébali mennang, “Parakarata sibawa Saul enrengngé kaluwargana dé' nawedding ripurai sibawa péra' nenniya ulaeng, iyakiya dé'to tamacinna mpunoi muwi séddi tau polé ri bangsa Israélié.” Namakkeda Daud, “Rékko makkuwaitu, aga muwacinnai upogau'?”

⁵ Nappébali mennang, “Saul arung napilé Puwangnge macinnai paccappu manekki angkanna lennye'ki polé ri sininna Israélié.

⁶ Rimakkuwannanaro, abbéréyanni pitu tau polé ri wija-wijanna iya worowané, kuwammengngi tagattungngi ri yolona Puwangnge ri Gibéa, kotana muto Arung Saul.” Nappébali arungngé, “Madécénni, uwabbéréyappi matu mennang.”

⁷ Iyakiya nasaba Daud sibawa Yonatan pada purani mattanro séddié sibawa laingngé, dé' nabbéréyangngi Daud Méfibosét ana'na Yonatan.

⁸ Iya nalaé Daud iyanaritu Armoni sibawa Méfibosét, iyanaritu iya duwa ana' worowanéna Saul iya najajiyangngé Rizpa ana' Aya; sibawa iya lima ana' worowanéna Mérab ana' makkunrainna Saul, iyaro ana'-ana'é jajiwi polé ri allaibinénna Mérab sibawa Adriél ana'na Barzilai, tau Méholaéro.

⁹ Riyabbéréyangngi mennang lao risining tau Gibéongngé, nainappa iya pitu tauwéro matéi massamang mennang rigattung ri tompo'na bulu-bulué ri yolona Puwangnge. Iyaro pahukkungeng maté napogau'i ri cappa'na wettu lemmaé, wettunna caddukué mammula riyéngngala.

¹⁰ Nainappa Rizpa gundi'na Saul, pallebbarengngi aléna kaing karung ri tompo'na batu naonroiyé iyaro sining ujué makkalénnereng. Dé' nasalaiwi Rizpa iyaro mappammulai ri pammulanna wettu éngngalangngé narapi teppana bosié ri wettu addunurengngé. Dé' naleppessangngi iyaro sining ujué riganggu ri manu'-manu'é ri essoé iyaré'ga ri olokolo masekkangngé ri wennié.

¹¹ Wettunna ripowadang Daud aga iya napogau'é Rizpa,

¹² laoni malai buku-bukunna Saul sibawa Yonatan polé ri pabbanuwana kota Yabés ri Giléad. (Iyaro sining tauwé purai naénnau iyaro buku-bukué ri tana lapanna kota Bét-San, onronna tau Filistingngé gattungngi iyaro sining ujué nacaunana Saul ri Bulu-bulu Gilboa.)

¹³ Iyaro buku-bukunna Saul sibawa Yonatan natiwini polé kuwaro, nainappa napaddeppungeng towi buku-bukunna iya pitu tau rigattungngéro.

¹⁴ Nainappa buku-bukunna Saul sibawa Yonatan enrengngé buku-bukunna iya pitu tauwéro nakuburu'ni ri laleng kuburu'na Kish ambo'na Saul ri Zéla ri daérana Bényamin. Pura manennana napogau' situru paréntana arungngé, natarimani Allataala sempajanna mennang untu' wanuwaéro.

Apakalanna lao risining tau rassasa Filistingngé

¹⁵ Mammususi tau Filistingngé sibawa tau Israélié. Daud sibawa ana' buwana laoni mammusu méwai tau Filistingngé. Ri laleng musuéro posoi Daud.

¹⁶ Poléni séddi tau rassasa asenna Yisbi-Bénob. Bessinni riyébbui polé ri gessaé tane'na kira-kira tellu sitengnga kilo. Tappi towi peddang iya mabarué, sibawa mateppe'na naulléi mpunoi Daud.

¹⁷ Iyakiya Abisai ana' Zéruya poléi tulungngi Daud. Naluruiwi iyaro rassasaé sibawa naunoi. Purairo naéllauni ana' buwana Daud kuwammengngi najjanci Daud dé'na namaélona maccowé ri laleng musué. Makkedai mennang, “Datu iyanaritu amménasanna Israélié, aja' narapiki ateddéngeng Datu,”

¹⁸ Kajajiyassi musué méwai tau Filistingngé ri Gob. Ri laleng musuéro Sibkhai tau Husaé mpunoi séddi rassasa riyasengngé Saf.

¹⁹ Ri laleng musu laingngé sibawa tau Filistingngé ri Gob, Elhanan ana' Yair polé ri Bétléhém mpunoi Goliat polé ri Gat. Torongeng mpessinna iyaro Goliat silloppo aju paréwa tennungngé.

²⁰ Kajajiyassi musué méwai tau Filistingngé ri Gat. Kuwaro engka séddi rassasa iya poji senna'éngngi mammusu. Mappunnaiwi enneng jari ri tungke' limanna sibawa enneng jari ri tungke' ajéna.

²¹ Naéllékéllé'ni tau Israélié, iyanaro saba'na nariyuno ri Yonatan ana' Siméa, kakana Daud.

²² Iya eppa tau iya naunoé Daud sibawa pasukannaro, iyanaritu wija-wijanna rassasaé ri Gat.