2 SAMUEL 2 - KITTA KAREBA MADECENG

Riyakkana Daud mancaji arunna Yéhuda

¹ Purairo makkutanani Daud lao ri Puwangnge, “Napuwéloga Puwangnge laoka makuwasaiwi sala séddinna kotaé ri Yéhuda?” Nappébali Puwangnge, “Ya.” Nakkutana Daud, “Kota kéga?” Nappébali Puwangnge, “Hébron.”

² Nalaona Daud ri Hébron silaong iya duwa bainéna: Ahinoam makkunrai Yizreel sibawa Abigail jandana Nabal iyanaritu makkunrai Karmél.

³ Makkuwatoro ana' buwana sibawa kaluwargana tungke'-tungke' maccowéni ri Daud, namattette'na mennang ri Hébron sibawa seddéna.

⁴ Nanalaona sining tau Yéhudaé ri Hébron sibawa lanti'i Daud mancaji arung ri Yéhuda. Wettunna naéngkalinga Daud makkedaé sining tau Yabésh-é ri Giléad purani nakuburu ujuna Saul,

⁵ kirinni suro lao kuwaro sibawa palettu paseng, “Tennapodo Puwangnge barakkakiko, nasaba purani muwappaitang atinuluremmu lao ri arummu sibawa tampungngi ujuna.

⁶ Rimakkuwannanaro, tennapodo Puwangnge mappaitangngi pammaséna sibawa atinuluren-Na lao ri iko. Maélo tokka gaurekko sibawa makessing nasaba pangkaukemmuro.

⁷ Pakkasse'ni atimmu sibawa tinda'no selaku pahlawang! Saul, arummu mémeng maténi, iyakiya purani nalanti'ka sining tau Yéhudaé mancaji arunna mennang.”

Ripancajinna Isybosét arung ri Israélié

⁸ Pallima tentarana Saul, iyanaritu Abnér ana' Nér, larini silaong Isybosét ana' Saul, lao ri Mahanaim ri liwenna Salo Yordan.

⁹ Kuwaniro Abnér nakka Isybosét mancaji arung ri daéra-daéra Giléad, Asyuri, Yizreel, Efraim sibawa Bényamin, mala ri sininna Israélié.

¹⁰ Patappulo taung umuru'na Isybosét wettunna ripancaji arung ri Israélié, namapparéntai duwattaung ittana. Iyakiya suku Yéhudaé tette'i matinulu lao ri Daud,

¹¹ na Daud mapparéntai ri Hébron ri Yéhuda pituttaung sitengnga ittana.

Mammusuna Israélié sibawa Yéhuda

¹² Riséuwaé esso laowi Abnér polé ri Mahanaim lao ri kota Gibéon, risilaongeng ri ana' buwana Isybosét.

¹³ Makkuwatoro Yoab (indo'na riyaseng Zéruya), silaong ana' buwana Daud mattuju ri kotaéro. Iya duwa regu siyéwaéro siyolongngi ri kullang Gibéon; Abnér sibawa ana' buwana tudang ri liweng kumaiyé, Yoab sibawa ana' buwana ri liweng kuwaro.

¹⁴ Nakkedana Abnér lao ri Yoab, “Ayo, tasuroi ana' buwata mattanding!” Nappébali Yoab, “Makessinni.”

¹⁵ Namajuna seppulo duwa tau polé ri suku Bényamin iya wakkélékiyéngngi Isybosét, sibawa seppulo duwa polé ri ana' buwana Daud.

¹⁶ Tungke'-tungke' mennang sisullé sittikkeng gemme sisullé sigajang babuwana balinna, angkanna pada maténi mennang. Iyanaro saba'na iyaro onrongngé ri Gibéon nariyaseng “Dare Peddang”.

¹⁷ Purananaro kajajiyanni musu maseroé, na Abnér sibawa tentara Israélié ricauni ri ana' buwana Daud.

¹⁸ Iya tellu ana'na Zéruya engkai kuwaro, iyanaritu Yoab, Abisai sibawa Asaél. Larinna Asaél magatti pada-pada jongaé,

¹⁹ nanalellunni Abnér matteru-teru.

²⁰ Nagiling Abnér limonri sibawa makkutana, “Ikoga Asaél?” Nappébali, “Iyyé.”

²¹ Nakkeda Abnér, “Aja' mulellukka. Cobani tikkengngi sala séddinna tau polé risining prajuri'éro namuwalai sanjatana!” Iyakiya matteru mupi Asaél lellungngi.

²² Siseppi Abnér makkeda ri aléna, “Aja' mulellukka! Tarapassaka matu mpunoko. Jaji, pékkugi weddikka mitai tappana Yoab kakamuro?”

²³ Wettunna tette'i Asaél dé' namaélo mappésau, mabbessini Abnér limonri, nanakennai babuwana Asaél gangka bettu iyaro bessié ri lekke'na. Namabuwanna Asaél sibawa maté ri onrongngéttoro. Sininna tau iya laowé ri onrong nalénnekiyéro, mappésauni kuwaro.

²⁴ Iyakiya Yoab sibawa Abisai napatterui lellungngi Abnér. Wettunna labu essoé, lettu'ni mennang ri Bulu-bulu Ama, iya engkaé ri seddé alauna Giah, mattujué ri padang kessi Gibéon.

²⁵ Kuwaniro sining tau polé ri suku Bényamin masséddi sibawa Abnér, nainappa naatoro barisi'na mennang ri tompo'na séddié bulu-bulu.

²⁶ Polé kuwaro gorani Abnér lao ri Yoab, “Harusu'ki'ga tuli mammusu? Dé'ga mumainge makkedaé iyaé musué banna tiwii apaireng? Idi'é saudara sibangsamu. Siyagapi ittana maéloko mattajeng ri wettu dé'napa muparéntangngi ana' buwamu kuwammengngi nappésau lellukki?”

²⁷ Nappébali Yoab, “Nasabbing Allataala iya tuwoé, ébara'na dé' mupammulaiwi mabbicara, pasti ana' buwaku matterui lellukko narapi baja éléé.”

²⁸ Nainappa naseppung Yoab tarompé'é selaku tanrang lao ri ana' buwana kuwammengngi nappésau lellungngi tau Israélié, nappésauna ammusurengngéro.

²⁹ Abnér sibawa ana' buwana puppu benni mabbarisi molai Lompo Yordan, nainappa malléttoiwi Salo Yordan, najoppanana puppu esso bajana, lettu'ni mennang ri Mahanaim.

³⁰ Mappésaunnana Yoab lellungngi Abnér, napaddeppungenni sininna ana' buwana. Ri lainnaé Asaél annessana engka seppulo aséra polé ri mennang teddéng.

³¹ Ana' buwana Daud purani nauno 360 tau pasukanna Abnér polé ri suku Bényamin.

³² Purairo nakkani Yoab silaong ana' buwana ujuna Asaél nanakuburu'i ri laleng kuburu kaluwargana ri Bétléhém. Nainappa mennang joppa puppu benni nalettu ri Hébron ri subué.