2 SAMUEL 19 - KITTA KAREBA MADECENG

Nappaitanna Yoab asalanna Daud

¹ Ripaissengini Yoab makkedaé teriwi Arung Daud sibawa mabbarata untu' Absalom.

² Natappinrana apakalangngé iyaro essoé mancaji sara lao risininna tentarana Daud nasaba naéngkalingai mennang makkedaé nateringiwi arungngé ana' worowanéna.

³ Mammekko-mekkoni mennang lisu ri kotaé, pada-pada tentara iya masirié nasaba lariwi polé ri ammusurengngé.

⁴ Nasamponi arungngé rupanna nanawating sibawa macenno, “Oh ana'ku! Ana'ku Absalom! Absalom, ana'ku!”

⁵ Laoni Yoab mangolo ri arungngé sibawa makkeda, “Iyaé essoé napakasirii Datu ana' buwana Datu, padahal mennang ritu pura passalama'i nyawana Datu, nyawana ana'-ana' worowanéna sibawa makkunrainna Datu, bainéna sibawa gundi'na Datu.

⁶ Namaséiwi Datu sining tau iya benciyéngngi Datu, iyakiya nabenciwi Datu sining tau iya mamaséiyéngngi Datu! Manessai nappaitang Datu makkedaé sining parawirana sibawa prajuri'na Datu dé' sises-siseng bettuwanna lao ri Datu. Mala samanna masennang senna'i Datu ébara'na tuwo mupi Absalom essoéwé na idi manengngé maté!

⁷ Sitinajanna moto'i Datu nalao tettong ri saliweng untu' pattennangngi atinna ana' buwana Datu. Mattanroi atatta nasabbing Puwangnge, rékko dé' namassu Datu sitangngi mennang, iyato wennié dé'gaga matu muwi séddi tau iya maéloé sibawangngi Datu. Na iyaro sinrupai matu abala kaminang battowaé iya napéneddingiyé matu Datu gangka tuwona.”

⁸ Nanaoto'na arungngé nanalao massu, natudang ri seddéna pintu gerbangngé. Naéngkalingani ana' buwana makkedaé engkai kuwaro, napolé manenna mangolo. Na wettuéro sininna pasukanna Israélié larini, nalisu ri bolana tungke'-tungke'.

Lisunna Daud ri Yérusalém

⁹ Ri yelle'na sininna suku Israélié momponi assisalangngé. Adanna mennang, “Purani' napassalama Arung Daud polé ri tau Filistingngé sibawa paleppe'ki polé risining bali laingngé, iyakiya makkekkuwangngé larini polé ri Absalom nanasalaiwi wanuwaéwé.

¹⁰ Talanti'i Absalom mancaji arung, iyakiya makkekkuwangngé maténi ri laleng ammusurengngé. Magi nadé' gaga muwi séddi tau makkuraga untu' tiwii Arung Daud lisu?”

¹¹ Iyaro ada-adaé lettu towi ri Arung Daud. Rimakkuwannanaro nasuroni Imang Zadok sibawa Imang Abyatar makkutangngi risining pamimpinna Yéhuda makkuwaé, “Magi namumancaji iya paccappurengngé untu' duppaiwi sibawa tinrosiwi arungngé lisu ri saorajana?

¹² Tenniyaga iko sumpulolona sibawa siyajinna? Masa iko paccappureng méllauwi kuwammengngi ulisu?”

¹³ Risuro towi mennang ri Daud powadangngi Amasa makkuwaé, “Tenniyakoga siyajikku? Mappammulai makkekkuwangngé uwakkako mancaji pallima tentaraku sulléiwi Yoab. Tennapodo naunoka Allataala rékko dé' upogau'i gau'éro!”

¹⁴ Makkuwaniro Daud naulléni malai atinna sininna tau Yéhudaé angkanna kiring mennang paseng lao ri arungngé kuwammengngi nalisu ri saorajaé silaong sibawa sininna pegawénna.

¹⁵ Nanajoppana arungngé sibawa lettu ri Salo Yordan, na sining tau Yéhudaé lettu'ni ri Gilgal untu' duppaiwi arungngé sibawa silaongengngi malléttoiwi saloéro.

^16-17 Siméi ana' Géra, tau Bényamingngéro tiwini sisebbu tau polé ri suku Bényamin namapperi-peri polé silaong sining tau Yéhudaéro untu' duppaiwi arungngé. Makkuwatoro Ziba atanna kaluwargana Saul, silaong iya seppulo lima ana'na iya worowané sibawa iya duwappulo atanna; nalléttoini mennang Salo Yordan ri wettu dé'napa nalettu arungngé.

¹⁸ Nabantuni mennang kaluwargana arungngé mallétto enrengngé pogau'i sininna iya nassurowangngé arungngé lao ri mennang. Wettunna arungngé maélo malléttoi saloé, suju'ni Siméi ri yolona sibawa makkeda,

Riyamaséinna Siméi ri Daud

¹⁹ “Naéllauwi atanna, tennapodo Datu dé' naangga'i atatta tette pasala. Tennapodo maéloi Datu mallupaiwi aga iya napogau'é atatta ri esso nasalainna Datu Yérusalém.

²⁰ Mainge'ni atatta, makkedaé purani pogau' dosa atatta, narimakkuwannanaro, ri yelle'na suku-suku iya monroé ri daéra manorang atatta ritu bunge'-bunge' polé untu' duppaiwi Datu essoéwé.”

²¹ Naéngkalinganaro makkedani Abisai ana' Zéruya, “Sitinajani Siméi rihukkung maté nasaba purai natanroi arung iya napilé Puwangnge.”

²² Iyakiya makkedai Daud lao ri Abisai sibawa Yoab kakana, “Aja' muwaccowé campuru'i. Magi musussaika? Iyaé essoé mancaji arussika ri Israélié, nadé' nawedding engka tau Israél iya rihukkung maté.”

²³ Nainappa mattanroni arungngé lao ri Siméi, “Utanggungngi makkedaé dé' narihukkung matéko matu.”

Riyamaséinna Méfibosét ri Daud

²⁴ Makkuwatoro Méfibosét eppona Saul, poléni untu' duppaiwi arungngé. Dé' nabissaiwi ajéna, dé' narette'i janggo'na, sibawa dé' nasessa'i pakéyanna sipongenna Arung Daud salaiwi Yérusalém narapi lisu sibawa salama.

²⁵ Wettunna lettu Méfibosét polé ri Yérusalém untu' duppaiwi arungngé, makkedani arungngé lao ri aléna, “Méfibosét, magi dé' muwaccowérika wettuéro?”

²⁶ Nappébali, “Iya Malebbié, naisseng Datu képpangngi atattaé. Nasuroi atatta pattumaninna atatta passadiya kaleddé iya weddingngé natonangi atatta untu' maccowériwi Datu. Iyakiya ribali'bellariwi atatta ri pattumaniéro.

²⁷ Mala ripétenna'i atatta lao ri Datu. Iyakiya Datu pada-padai malaéka'na Allataala. Rimakkuwannanaro pogau'ni aga iya nasengngé Puwakku makessing.

²⁸ Sininna siyajinna ambo'na atatta sitinajai rihukkung maté ri Datu, iyakiya atattaé purani napalalo Datu maccowé manré ri saorajaé. Makkekkuwangngé dé'na nabaranina atatta méllau agi-agi polé ri Datu.”

²⁹ Nappébali arungngé, “Dé' naparelluko powadai aga-agana. Purani upettui untu' mabbéréyangngi sininna waramparanna Saul lao ri iko sibawa lao ri Ziba.”

³⁰ Namappébali Méfibosét, “Leppessanni nala maneng Ziba. Masennanni atatta nasaba lisuni Datu sibawa salama.”

Riyamaséinnato Barzilai ri Daud

³¹ Makkuwatoro Barzilai tau Giléad-éro engkani polé ri Rogelim untu' tinrosi arungngé malléttoiwi Salo Yordan.

³² Macowa senna'ni Barzilai, aruwani pulona taung umuru'na. Sugi senna'i sibawa wettunna arungngé monro ri Mahanaim riyolo, Barzilai passadiya inanré untu' arungngé.

³³ Makkedai arungngé ri aléna, “Accowérina lao ri Yérusalém, uwéréppo matu matti sininna apparelluwammu kuwaro.”

³⁴ Iyakiya mappébaliwi Barzilai, “Dé'na namaittana atatta tuwo. Jaji aga akkégunana atatta maccowé ri Datu lao ri Yérusalém?

³⁵ Umuru'na atatta aruwani pulona taung, sibawa dé'na gaga iya weddingngé mabbéré asennangeng lao ri atatta. Dé'na naulléi atatta peneddingiwi aga nanré atatta iyaré'ga naénungngé, sibawa dé'na naulléi méngkalingai saddanna tauwé makkélong. Banna mancaji réppami bawang atatta lao ri Datu.

³⁶ Dé' nasitinaja atatta tarima appalang battowaéro. Banna macinnai atatta tinrosiwi Datu siyagangngaré bawang jongkana polé ri liwenna Salo Yordan.

³⁷ Purairo, leppessanni atatta lisu ri bolaé sibawa maté ri seddéna kuburu'na tomatowanna atatta, iyakiya iyanaé ana'na atatta Kimham. Palaloni tinrosiwi Datu sibawa pogau'ni lao ri aléna aga iya naitaé Datu makessing.”

³⁸ Nappébali arungngé, “Utiwii matu Kimham sibawa uwurusu'i matu pada-pada muwacinnaiyé, sibawa sininna iya muwéllauwé ri iyya upennoiwi matu.”

³⁹ Nainappa Daud sibawa sininna ana' buwana malléttoiwi Salo Yordan. Nainappa Daud bauwi Barzilai sibawa siassimangeng sibawa aléna. Purairo lisuni Barzilai ri bolana.

Massasana Yéhuda sibawa Israélié passalenna arungngé

⁴⁰ Sininna pasukanna Yéhuda sibawa sitengnga pasukanna Israélié tinrosiwi arungngé malléttoiwi saloé. Purairo matteruni arungngé lao ri Gilgal, namaccowéna Kimham ri aléna.

⁴¹ Nainappa poléni sininna tau Israélié mangolo ri arungngé sibawa makkeda, “Datu, magi silessuretta sining tau Yéhudaéro masengngi makkedaé mennang ritu mappunnai ha' untu' duppaiwi sibawa jagaiwi Datu silaong sininna kaluwargana nenniya ana' buwana Datu malléttoiwi Salo Yordan?”

⁴² Namappébali tau Yéhudaé, “Tentuni, nasaba arungngé iyanaritu sumpulolona. Magi mumacai? Aga apparelluwatta natanggungngi arungngé, iyaré'ga purani nawérékki hadiya?”

⁴³ Nappébali tau Israélié, “Ha'ta lao ri arungngé wékkaseppulo lebbi battowa naiya ha'mu, namuni arungngé iyanaritu sumpulolomu. Magi mupandang éntékki? Aja' muwallupaiwi makkedaé idi ritu bunge'-bunge' senna méllauwi untu' tiwii lisu arungngé!” Iyakiya lebbi tedde'i tau Yéhudaé naiya tau Israélié sibawa dé' namaélo cau.