2 SAMUEL 17 - KITTA KAREBA MADECENG

Napasisalana Husai rancanana Ahitofel

¹ Dé' namaitta puranaro, makkedasi Ahitofel lao ri Absalom, “Palaloka pilé 12.000 tau. Matu wennié maéloka joppa lellungngi Daud.

² Maéloka gasai wettunna poso sibawa koddo sumange'na. Maéloka patassélengngi, angkanna sininna ana' buwana lari. Banna Arung Daud bawang maélo uwuno.

³ Iyakiya sininna ana' buwana maéloka palisui lao ri Puwakku pada-pada botting makkunraié lisu lao ri lakkainna. Dé'ga Puwakku banna macinnaiwi nyawana séddi tau bawang? Iya laingngé dé' nariyagaga matu.”

⁴ Iyaro pangajaé naita makessinni Absalom sibawa sininna pamimping Israélié.

⁵ Namuni makkuwaro makkedai Absalom, “Obbii makkekkuwangngé Husai; laono mai taéngkalingai pékkugi pallolongenna.”

⁶ Wettunna polé Husai mangolo, ripowadanni ri Absalom rancanana Ahitofel, nainappa makkeda, “Maéloki'ga turusiwi pangajaéro? Rékko dé', abbéréno tangnga laingngé.”

⁷ Nappébali Husai, “Pangajana Ahitofel iya sisengngé dé' namakessing.

⁸ Pasti naisseng Petta makkedaé Daud sibawa ana' buwanaro iyanaritu pajuwang iya poré. Sissekkang mennang beruwang komba iya teddéngngé ana'é. Nainappani Daud iyanaritu prajuri mappangalamang iya dé'é naengka nabbenni silaong ana' buwana.

⁹ Naullé makkekkuwangngé massubbuni ri laleng séddié gowa iyaré'ga onrong laingngé. Jaji, ébara'na ana' buwana Petta riserangngi ri Daud, naengka maté, na nigi-nigi méngkalingai gau'éro makkedai matu makkedaé ricauni ana' buwana Absalom.

¹⁰ Na muwi sining tau iya kaminang baranié sibawa poré pada-pada singaé pasti métauto matu. Saba' sininna tau Israélié naisseng iyaro ambo'na Petta iyanaritu pahlawangngi, sibawa ana' buwana iyanaritu pajuwang-pajuwang iya baranié.

¹¹ Rimakkuwannanaro, pangajaku makkuwaiyé: Paddeppungengngi sininna tau Israélié polé ri sininna wanuwaé, angkanna jumellana singngégai kessi'é ri wiring tasi'é. Nainappa aléna Petta ritu pimpingngi mennang maju mammusu.

¹² Taruntu'i matu Daud muwi kégi monro, nanatagasai ri wettu dé'napa namaingekiwi aga kajajiyang. Dé' gaga matu iya leppe'é, muwi aléna iyaré'ga ana' buwana.

¹³ Rékko lariwi ri laleng séddié kota, sininna ra'ya'ta malai matu tulu nanassarénréngengngi iyaro kotaé nainappa napasempé ri laleng lompo iya macawé'é. Muwi séddi batu dé'to matu monro ri tompo'na bulu-buluéro.”

¹⁴ Naéngkalinganaro makkedani Abasalom sibawa sininna tau Israélié, “Lebbi kessing muwi pangajana Husai naiya pangajana Ahitofel.” Mémeng, Puwangnge pura pattentui untu' pasisalai pangajana Ahitofel iya makessingngéro, kuwammengngi nakennai Absalom abala.

Napassalama'na aléna Daud

¹⁵ Purairo nalaporo'ni Husai lao ri Imang Zadok sibawa Imang Abyatar passalenna pangajana Ahitofel sibawa pangajanato lao ri Absalom sibawa sining pamimpinna Israélié.

¹⁶ Nakkeda Husai, “Asitta'ko! Paissengiwi Daud kuwammengngi aja' nabbenni ri onrong alléttong saloé ri padang kessi'é. Harusu'i masitta malléttoiwi Salo Yordan. Rékko dé', aléna sibawa sininna pasukanna riyancuru'i matu.”

¹⁷ Wettuéro Yonatan ana' Abyatar sibawa Ahimaas ana' Zadok mattengngang mattajeng ri seddéna mata uwai En-Rogel, ri wirinna kota Yérusalém. Dé' mennang nabarani muttama ri kotaé saba' métaui riita ri tauwé. Pada-pada biyasanna, séddi ata makkunrai palettukengngi mennang karéba iya harusu'é nalaporo lao ri Arung Daud.

¹⁸ Iyakiya iyaé sisengngé séddi ana' worowané nasitujuwangngi mitai mennang, nanapaissengiwi Absalom. Jaji mapperi-perini lao namassubbu ri bolana séddié pabbanuwana désa Bahurim. Ri seddé bolana engka bujung namuttama'ni mennang ri lalenna.

¹⁹ Bainéna punna bolaéro pallebba silampa kaing ri yasé'na kalebbong bujungngéro nanatale gandong ri yasé'na, angkanna dé' napaita iyaro bujungngé.

²⁰ Poléni sining surona Absalom ri bolaéro sibawa makkutana ri makkunraié onna, “Kégani Ahimaas sibawa Yonatan?” Nappébali, “Silalona mennang malléttoiwi saloé.” Nasappani mennang iya duwa kalloloéro, iyakiya dé' naruntu'i, nanalisuna mennang ri Yérusalém.

²¹ Massuni Ahimaas sibawa Yonatan polé ri bujungngéro, nainappa mapperi-peri lao sita Arung Daud sibawa laporo manengngi. Adanna mennang, “Mabbéréi Ahitofel pangaja untu' gasai Datu. Jaji joppani' makkekkuwangngétto malléttoiwi saloéwé.”

²² Nainappa Daud sibawa ana' buwana malléttoiwi Salo Yordan, nalettu ri liweng wettu subué.

²³ Wettunna napahang Ahitofel makkedaé dé' nariturusi pangajana, napatoppo'ni lapi-lapi kaleddé'na nanalisu ri kotana muto. Purana napacceppi sininna urusanna nagattunni aléna, nainappa rikuburu ri laleng kuburu'na kaluwargana.

²⁴ Lettu'ni Daud ri kota Mahanaim wettunna Absalom malléttoiwi Salo Yordan, ritinrosi risining tau Israélié. (

²⁵ Purani riyakka Amasa ri Absalom mancaji kapala pasukang sulléiwi Yoab. Amasa ana' Yitra tau Ismaél; indo'na riyaseng Abigail ana' Nahas, iyanaritu padakkunrainna Zéruya indo'na Yoab.)

²⁶ Makkémani Absalom sibawa ana' buwana ri tana Giléad.

²⁷ Wettunna Daud lettu ri Mahanaim, riduppaini ri Sobi ana' Nahas polé ri kota Raba ri Amon, sibawa Makhir ana' Amiél polé ri Lodebar, sibawa Barzilai polé ri Rogelim ri Giléad.

^28-29 Tiwini mennang mangko, pamuttu, sibawa kasoro untu' Daud sibawa ana' buwana, makkuwatoro gandong, cadduku, labbu, goré labbu, buwé cella, buwé cella loppo, cani, kéju, susu mattékké sibawa siyagangngaré bimbala. Naisseng mennang makkedaé malupui Daud sibawa ana' buwana, madekka sibawa poso nasaba allalengengngé ri padang kessi'é.