2 SAMUEL 16 - KITTA KAREBA MADECENG

Daud sibawa Ziba

¹ Wettunna Daud silalona labe ri tompo bulu-bulué, tappa poléni Ziba atanna Méfibosét, sitangngi sibawa tiwi sipasang kaleddé iya mattékéé duwa ratu batunna roti, sératu réppung buwa anggoro rakko, sératu siyo buwa-buwa anggoro silalona riyala sibawa sipopang uwai anggoro.

² Makkutanani Arung Daud lao ri aléna, “Untu' aga iya manennaé?” Nappébali Ziba, “Iyaé sining kaleddé'é untu' olokolo akkinnyarangeng untu' kaluwargana Datu, roti sibawa buwa-buwaéwé untu' sining pattumaninna Datu, sibawa uwai anggoro'éwé untu' mennang iya madekkaé ri padang kessi'é.”

³ Namakkutana arungngé lao ri aléna, “Kégani Méfibosét eppona puwammu Saul?” Nappébali Ziba, “Tette mupi ri Yérusalém, saba' mateppe'i makkedaé makkekkuwangngénna napalisuni matu tau Israélié akkarungenna nénéna Saul lao ri aléna.”

⁴ Namakkedana arungngé lao ri Ziba, “Mappammulai makkekkuwangngé sininna appunnangenna Méfibosét mancajiwi appunnangemmu.” Nappébali Ziba, “Tarima kasi Datu. Tennapodo Datu tuli masennangngi lao ri atatta!”

Daud sibawa Siméi

⁵ Wettunna Daud lettu ri Bahurim, poléni séddi tau polé ri onrongngéro, nanaddeppériwi rombonganna arungngé, natanroiwi Daud. Iyaro tauwé asenna Siméi ana' Géra, polé ri sumpulolona Saul.

⁶ Siméi genrungngi Daud nenniya pegawé-pegawénna sibawa batu, namuni Daud riyattulilingiwi ri ana' buwana sibawa sining pengawalna.

⁷ Ritanroini ri Siméi sibawa ada-ada, “Laono! Laono! Pabbuno! Tau maja!

⁸ Purani murampasa akkarungenna Saul! Makkekkuwangngé nahukkunno Puwangnge nasaba muwunoi maéga senna sumpulolona Saul. Puwangnge pura mabbéréyangngi akkarungemmu lao ri ana'mu Absalom. Makkekkuwangngé maténo, éh pabbuno!”

⁹ Abisai anrinna Yoab ana' Zéruya, makkedai lao ri arungngé, “Magi Datu naleppessangngi pangacauéro tanroiwi Datu? Palaloi atatta géréi ellonna!”

¹⁰ Iyakiya makkedai arungngé lao ri Abisai sibawa Yoab kakana, “Aja' mubati-batiwi. Leppessangngi siya natanroika. Saba' rékko Puwangnge suroi, nigana punna ha' makkutanangngi magi nakédo makkuwaro?”

¹¹ Namakkeda paimeng Daud lao ri Abisai sibawa lao ri sininna atanna, “Ana' riyaléku paimeng makkuraga maélo mpunoka; magi muhérang mitai kédona tau Bényamingngéwé? Puwangnge ritu suroi tanroika; rimakkuwannanaro aja' muwagagai sibawa leppessangi siya patanroi.

¹² Naullé naitai matu Puwangnge iyaé anrasa-rasangngé nanabarakkakika selaku passulléna tanroéro.”

¹³ Nainappa Daud sibawa sining pattinrona patterui joppana, na Siméi magattini joppa maccowériwi mennang ri émpeng bulué nanatanroi towi sibawa maggenrungeng batu nenniya tana.

¹⁴ Poso senna'ni arungngé sibawa sininna ana' buwana wettunna lettu ri Salo Yordan, nainappa mennang mappésau kuwaro.

Absalom ri Yérusalém

¹⁵ Wettuéro Absalom sibawa sininna tau Israélié iya tinrosiyéngngi muttama'ni ri kota Yérusalém, na Ahitofel maccowé toni.

¹⁶ Wettunna Husai sellaona Daud iya matinuluéro siruntu Absalom, gorani Husai, “Tuwoi arungngé! Tuwoi arungngé!”

¹⁷ Iyakiya makkutanai Absalom ri aléna, “Kégani atinuluremmu lao ri sahaba'mu Daud? Magi dé' muwaccowériwi?”

¹⁸ Nappébali Husai, “Pékkugi wedding! Maccowéka lao ri tau iya ripilé ri Puwangnge, risining tauwéwé, sibawa ri sininna tau Israélié. Tauwé ritu uwaccowéri matu.

¹⁹ Nainappani, nigatona utumaningi matu? Tenniyaga ana' worowanéna Puwakku? Pada-pada pura utumaninginna ambo'na Petta, makkuwatoro utumaninginna matu Petta makkekkuwangngé.”

²⁰ Nainappa makkeda Absalom lao ri Ahitofel, “Powadani aga iya harusu'é tapogau'.”

²¹ Nappébali Ahitofel, “Laono ri gundi-gundi'na ambo'na Puwakku iya nasalaiyé untu' monrowangngi saorajaé, naatinrono silaong mennang. Naisseng manennitu matu Israélié makkedaé nasibawang pangkaukenna Puwakkuro, riyangga balini Puwakku ri ambo'na Puwakku. Na sininna tomaccowériyéngngi Puwakku tattamba baraniwi matu.”

²² Jaji, riyébburenni kéma Absalom ri tompo'na pabbingeng saorajaé iya malappaéro. Nainappa naita sininna tauwé muttama'ni Absalom ri laleng kémaéro namatinro silaong sining gundi'na ambo'na.

²³ Iyaro wettué tungke' pangajana Ahitofel ritarimai samanna iyaro adanna Allataala; muwi Daud iyaré'ga Absalom turusiwi sining pangajana.