2 SAMUEL 11 - KITTA KAREBA MADECENG

Daud sibawa Batsyéba

¹ Biyasanna majui mammusu arung-ngarungngé ri wettu lemmaé. Na ri wettu lemmaé ri taungngéro risuroni Yoab ri Daud maju mammusu silaong sining parawirana sibawa sininna tentara Israélié; nanacauni mennang tau Amongngé sibawa keppungngi kota Raba. Iyakiya Daud monroi ri Yérusalém.

² Riséuwaé arawéng, moto'nana Daud, joppa-joppai ri pabbingenna saorajaé iya malappaéro. Polé kuwaniro naitai séddi makkunrai mattengngang cemmé, na iyaro makkunraié magello senna.

³ Nainappa nassurowang Daud makkutanangngi niga iyaro makkunraié, naripaissengina makkedaé iyaro makkunraié asenna Batsyéba; ambo'na riyaseng Eliam sibawa lakkainna iyanaritu Uria tau Hét.

⁴ Nassurowanni Daud mobbii iyaro makkunraié, napolénana ri saorajaé, siatinronni sibawa Daud. (Silalona Batsyéba pura pogau'i upacara pappépaccing pajanana maddara.) Purairo lisuni ri bolana.

⁵ Siyagangngaré wettu rimunrinna mammulani Batsyéba mattampu, nanakiring karéba passalenna gau'éro lao ri Daud.

⁶ Masitta'ni Daud kiring parénta lao ri Yoab, adanna, “Suroi Uria tau Hét éro lao ri iyya.” Narisurona Uria ri Yoab méwai sita Daud.

⁷ Wettunna Uria mangolo ri Arung Daud, nakkutananni Daud pékkugi keadaanna Yoab sibawa pasukanna Israélié, sibawa makkuwatoro pékkugi joppana ammusurengngé.

⁸ Nainappa makkeda Daud lao ri Uria, “Lisuno ri bolamu namuwappésau cinampe.” Nasalainnana Uria saorajaé, kirinni Daud hadiya lao ri bolana Uria.

⁹ Iyakiya dé' nalisu Uria sangadinna matinroi ri yolona pintu gerbanna saorajaé silaong sining pengawalna arungngé.

¹⁰ Ripaissengini Daud gau'éro. Namakkutanana ri Uria, “Silalomu lisu polé ri allalengeng mabélaé, magi nadé' mulisu ri bolamu?”

¹¹ Nappébali Uria, “Tentara Israélié sibawa Yéhuda mattengngang mammusu na Petti Assijancinna Puwangnge sibawangngi mennang; Yoab pallimata sibawa sining parawirana makkémai ri padangngé. Masa atattaé lisu ri bolaé, sibawa manré ménung enrengngé matinro sibawa bainéna atattaé? Nasabbing nyawana Datu sibawa nyawana atatta, dé' namaélo atatta pogau'i iyaro!”

¹² Namakkeda Daud, “Sikuna, appésauno paimeng kuwaé iyaé essoé na baja éléé upalaloko matu lao.” Jaji monroni Uria ri Yérusalém ri essoéro. Ri esso rappina riyobbini manré ri Daud.

¹³ Namanréna sibawa riwérénni maéga énungeng angkanna mabo'. Iyakiya muwi iyaro wennié dé'to nalisu Uria ri bolana, sangadinna matinroi mappéi parampa'na ri laleng bili' pengawalna saorajaé.

¹⁴ Pappa bajanana mokini sure' Daud lao ri Yoab, nanakiringngi naolai Uria.

¹⁵ Okina, “Taroi Uria ri jori mariyoloé, kégi kaminang masero musué, nainappa soroko tennaissengngi kuwammengngi namaté.”

¹⁶ Na wettunna Yoab keppungngi iyaro kotaé, nasuroni Uria lao ri onrong iya naissengngé najagai senna balié.

¹⁷ Wettunna massu tentara balié polé ri kotaé sibawa gasai pasukanna Yoab, siyagangngaré tau parawirana Daud riyuno, muttama'ni Uria.

¹⁸ Nainappa kiring Yoab suro lao ri Daud untu' paissengiwi joppana iyaro ammusurengngé.

¹⁹ Paréntana Yoab lao ri suroéro, “Naéngkalingana datu laporammu passalenna joppana ammusurengngéwé,

²⁰ nauéllé macayii sibawa makkutana ri iko, ‘Magi muwaddeppé makkuwa ri kotaéro? Dé'ga muwissengngi makkedaé pasti balié mappanai matu polé ri yasé'na témbo'-témbo'na?

²¹ Muwallupainiga pékkugi Abimélékh ana' Gidéonro riyuno ri Tébes? Dé'ga namaté nasaba séddi makkunrai maggenrungeng batu allélureng labbu polé ri yasé'na témbo'é lao ri aléna? Jaji, mangi muwaddéppé makkuwa ri témbo'éro?’ Rékko makkutana makkuwairo Datu, powadanni, ‘Uria parawirana Datu, maté towi!’ ”

²² Nanalaona iyaro suroé mangolo ri Daud sibawa paissengiwi aga riparéntangngi ri Yoab.

²³ Makkedani iyaro suroé, “Balitta lebbi mawatangngi sibawa massui mennang polé ri kotaé gasaki ri padangngé. Iyakiya gegge'ki dessa'i mennang lisu narapi pintu gerbanna kotaé.

²⁴ Nainappa polé ri yasé'na témbo'é napanaki mennang, nasiyagangngaré polé ri parawirana Datu muttama'ni Uria maténi.”

²⁵ Namakkeda Daud lao ri suroéro, “Pakkasse'i atinna Yoab sibawa powadangngi kuwammengngi aja' mumarenni ati, saba' dé' nariyullé botoi niga maté matu ri laleng ammusurengngé. Powadangngi kuwammengngi namaggasa lebbi maseropasi lao ri kotaéro narapi manyara iyaro kotaé.”

²⁶ Wettunna naéngkalinga Batsyéba makkedaé maténi lakkainna, mabbaratani.

²⁷ Nainappa leppe'nana wettu abbaratanna, nassuro mobbini Daud iyaro makkunraié lao ri saorajaé sibawa mancajini bainéna. Siyagangngaré uleng rimunrinna jajiyanni séddi ana' worowané. Iyakiya dé' namasennang Puwangnge sibawa pangkaukenna Daudro.