2 SAMUEL 10 - KITTA KAREBA MADECENG

Nacauna Daud tau Amongngé sibawa tau Siriaé

¹ Siyagangngaré wettu rimunrinna maténi Nahas arung Amon, na Hanun ana' worowanéna mancaji arung.

² Namakkedana Arung Daud, “Nahas iyanaritu sahaba'ku iya matinulué. Jaji harusu tokka massahaba sibawa Hanun ana'na.” Rimakkuwannanaro kirinni Daud suro lao ri wanuwa Amon untu' saléworiwi Hanun nasaba amaténna ambo'na.

³ Wettunna mennang lettu ri Amon, makkedani sining pamimpinna wanuwaéro lao ri Arung Hanun, “Aja' nappikkiri Datu nakiringngi Daud suronaro nasaba maéloi pakalebbii ambo'na Datu! Nakiringngi iyaro sining tauwé lao mai selaku mata-mata untu' salidikiwi kotaéwé, kuwammengngi naulléi sittaiwi.”

⁴ Nainappa natikkeng Hanun sining surona Daudro, nacukkuru'i janggo'na siwali, narette'i pakéyanna mennang gangka poncing, nanasuroi mennang lao.

⁵ Iyakiya masirii mennang untu' lisu ri wanuwanna. Wettunna gau'éro ripaissengi Daud, kirinni paseng kuwammengngi iyaro sining suroé monroi ri Yérikho narapi tuwo paimeng janggo'na.

⁶ Nainappa namaingeki tau Amongngé makkedaé pangkaukenna mennang nassabariwi Daud musui mennang. Rimakkuwannanaro séwani mennang 20.000 tau prajuri Siria iya monroé ri Bét-Réhob sibawa Zoba, makkuwatoro 12.000 tau prajuri polé ri Tob, enrengngé arunna wanuwa Maakha sibawa 1.000 tau ana' buwana.

⁷ Wettunna Daud naéngkalinga gau'éro, nasuroni Yoab sibawa sininna tentarana maju méwai balié.

⁸ Massuni tau Amongngé nanaatoro'i barisi'na ri yolona pintu gerbang Raba ibukotana mennang, na tau Siriaé, tau Tob-é sibawa Maakhaé matoro'i barisi'na ri padangngé.

⁹ Naitani Yoab makkedaé tassipii ri pasukang balié ri yolo sibawa ri munri. Rimakkuwannanaro piléni tentara Israél iya pommakessingngé sibawa taroi mennang siyolo-olong sibawa tentara Siriaé.

¹⁰ Lebbinna polé ri tentara Israélié nabbéréyangngi lao ri Abisai anrinna, iya matoro'éngngi barisi'na siyolo-olong sibawa tentara Amongngé.

¹¹ Makkedani Yoab lao ri anrinnaro, “Rékko dé'na uwulléni mattahang lao ri tentara Siriaé, asitta'no tulukka; sibalé'na, rékko dé'na mulléni mattahang lao ri tentara Amongngé, polépa matu tulukko.

¹² Attahanno! Laono mai tammusu sibawa barani untu' bangsata sibawa untu' kota-kotana Allataalata. Tennapodo napogau'i Puwangnge aga iya Napuwéloé.”

¹³ Majuni maggasa Yoab sibawa pasukanna, angkanna lari tentara Siriaé.

¹⁴ Wettunna naita tau Amongngé lari tentara Siriaé, lari toni mennang polé ri Abisai sibawa soro muttama ri laleng kotaé. Puranana namusu tau Amongngé, lisuni Yoab ri Yérusalém.

¹⁵ Namaingekini tau Siriaé makkedaé ricauni mennang ri tau Israélié, rimakkuwannanaro naobbini sininna pasukanna kuwammengngi naddeppungeng paimessi.

¹⁶ Nainappa Arung Hadadezér massuro mobbii tau Siriaé iya engkaé ri seddé alauna Salo Efrat, napoléna mennang ri Hélam napimping Sobakh, pallima tentarana Arung Hadadézer polé ri Zoba.

¹⁷ Naéngkalingana gau'éro, napaddeppungenni Daud masitta sininna pasukang Israélié, nainappa malléttoiwi Salo Yordan, namaju lao ri Hélam. Kuwaniro tau Siriaé matoro'i barisi'na nainappa gasai pasukanna Daud.

¹⁸ Iyakiya tau Israélié pasoroi tentara Siriaé. Daud sibawa pasukanna mpunoi 700 tau pappalari karétana balié, sibawa 40.000 tentara makkinnyarang; ri lainnaéro Sobakh pallimana tentara balié masero lona angkanna maté ri ammusurengngé.

¹⁹ Wettunna sining arung iya nakuwasaiyé Hadadézer naita makkedaé ricauni mennang ri tentarana Israélié, naéllauni mennang sidamé nainappa tunru lao ri tau Israélié. Sipongennaro dé'na nabaranina tau Siriaé bantui tau Amongngé.