2 SAMUEL 1 - KITTA KAREBA MADECENG

Tarimana karéba Daud makkedaé maténi Saul

¹ Maténana Saul, lisuni Daud polé ri ammusurengngé caui tau Amalé'é, nanaonro ri Ziklag duwangngeso ittana.

² Pappa bajanana, poléni séddi kallolo polé ri akkémanna Saul. Selaku tanrang mabbarata nasapé'ni pakéyanna sibawa taro tana ri ulunna. Laoni ri Daud sibawa suju' ri yolona.

³ Makkutanani Daud, “Polé kégako?” Pappébalinna, “Leppe'i atatta polé ri akkémanna tau Israélié.”

⁴ Nakkutana Daud, “Curitai aga pura kajajiyang!” Nappébali iyaro kalloloé, “Lariwi tentarata polé ri ammusurengngé, namaéga maté, muttama'ni Saul sibawa Yonatan.”

⁵ Namakkutana Daud, “Pékkugi muwissengngi?”

⁶ Pappébalinna, “Nasitujuwangngi engkaka ri Bulu Gilboa, nanasanré Saul ri bessinna, na karéta-karéta sibawa tentara makkinnyaranna balié, maddeppéni maélo keppungngi.

⁷ Gilinni Saul limonri, nanaitai atatta, nanaobbii atatta, namappébali atatta, ‘Iyyé Puwakku.’

⁸ Makkutanani niga atatta, nanappaissengenni atatta makkedaé atattaé tau Amalé'.

⁹ Namakkeda lao ri atatta, ‘Laono mai, namuwunoka! Malo ladde'ka, sibawa mawé'na maté.’

¹⁰ Nanaddeppérini atatta, nanaunoi atatta, saba' naissengngi atatta makkedaé rékko sempé'i nasaba dé'na naulléi tettonna, pasti maté mutowi. Nainappa nala atatta passigera polé ri ulunna sibawa potto ri taiyyana, nanatiwii mai atatta lao ri Puwakku.”

¹¹ Naéngkalinganaro nasapé'ni Daud pakéyanna nasaba masarai, na sininna ana' buwana pogau' towi makkuwaéro.

¹² Mpatinni mennang sibawa mabbarata nenniya mappuwasa narapi wenni untu' Saul sibawa Yonatan, sibawa untu' ra'ya' Israélié, umma'na Puwangnge, saba' maéga senna iya maté ri laleng ammusurengngéro.

¹³ Nainappa makkutana Daud ri kallolo iya tiwiéngngi karébaéro, “Polé kégi assalemmu?” Pappébalinna, “Atattaé tau Amalé', séddiwi topolé-polé ri wanuwanna Puwakku.”

¹⁴ Nakkeda Daud, “Barani senna'ko mpunoi arung napiléna Puwangnge!”

¹⁵ Nainappa naobbi sala séddinna polé ri ana' buwana nanaparéntangngi, “Unoiro!” Iyaro tauwé nawettani iyaro kallolo Amalé'é gangka maté.

¹⁶ Nakkeda Daud lao ri kallolo Amalé'éro, “Iko muto patakkennai pahukkungeng matéwé ri alému sibawa mangakuiwi makkedaé purai muwuno arung iya napilé Puwangnge!”

Mpatinna Daud untu' Saul sibawa Yonatan

¹⁷ Purairo napuwélonni Daud iyaé mpatingengngé untu' Saul sibawa Yonatan,

¹⁸ sibawa mapparéntangngi kuwammengngi iyaéro élongngé riyappagguruwangngi lao ri suku Yéhuda. (Iyaéro élongngé tarokii ri laleng Kitta Yasar.)

¹⁹ “Israél, ri bulu-bulumu, kuwaro maténi pahlawangngé, sining ana'na wanuwaé, maruttunni mennang selaku bungana bangsaé.

²⁰ Tennapodo sining tau Gat-é dé' naéngkalingai iyaro karébaé. Tennapodo lorong-loronna Askélon dé' nalolongeng karéba passalennaro. Aja' narapii makkunrai Filistingngé gora-gora aja' narapii makkunrai kapéré'é kelli-kelli marowa.

²¹ Eh bulu-bulu Gilboa, éngkalingai pangobbiku: Aja' narapii cinoddoé sibawa bosié rica'ko! Leppessanni marakko sibawa makabuttu dare sibawa padammu. Saba' kuwaniro rappé kaliyawona pabbaranié. Nataiseng tona kaliyawona Saul tenriminnyaki.

²² Panana Yonatan mamoso, pauno. Peddanna Saul dé' naissengngi maddampeng mpunoi musué, paccappui balié.

²³ Saul sibawa Yonatan, makkuwamani bessana sibawa riyamaséi; tuli masséddiwi ri laleng atuwongngé sibawa amaténgngé; lebbi masitta'i mennang naiya kuwajangngé, lebbi mawatangngi naiya singa loloé.

²⁴ Eh, makkunrai Israélié, watingini Saul, arungngé! Iya pappakéiyékko waju cella iya masulié, sibawa bélo-béloiko sibawa ulaweng paramata iya magelloé.

²⁵ Maténi sining pahlawangngé, sempé ri ammusurengngé sibawa ri bulu-bulu masino-sinoé Yonatan lenro, matojo.

²⁶ Yonatan, éh saudaraku, messé atikku, saba' mangke senna'ko ri aléku. Malebbi senna pammasému lao ri iyya, mala nacau pammaséna makkunraié.

²⁷ Maténi sining pahlawang bangsaé. Siya-siyani senjatana mennang!”