2 ARUNG-NGARUNG 9 - KITTA KAREBA MADECENG

Rilanti'na Yéhu mancaji arunna Israélié

¹ Iyaro wettué naobbini Nabi Elisa sala séddinna polé ri yelle'na sining nabi iya napaggurué sibawa makkeda, “Sadiya-sadiyano untu' lao ri Ramot ri Giléad, sibawa tiwii iyaé botolo mallise'é minnya zaitun.

² Lettu'mu kuwaro sappai Yéhu ana' Yosafat sibawa eppona Nimsi. Erai alé-aléna lao riséddié bili',

³ namutiri'i iyaé minnya'é ri tompo ulunna, nainappa makkeda, ‘Makkedai Puwangnge makkedaé nakkako mancaji arunna Israélié.’ Purana mupogau' iyaro gau'é, salaiwi iyaro onrongngé masitta-sitta.”

⁴ Joppani iyaro nabi kalloloé lao ri Ramot,

⁵ nanapoléini Yéhu sibawa pallima laingngé mattengngang maddeppungeng kuwaro. Makkedani iyaro nabié, “Pa', tiwika karéba untu' Puwang.” Nappébali Yéhu, “Untu' niga?” Nametté iyaro nabié, “Untu' aléna Puwang.”

⁶ Nainappa sipadduwa mennang muttama ri lalempola, nanatiri'ni iyaro nabi kalloloé minnya zaitungngéro ri tompo ulunna Yéhu nainappa makkeda, “Makkedai Puwang Allataalana Israélié, ‘Ulanti'ko mancaji arung ri yasé'na umma'-Ku Israélié.

⁷ Mupaccappui matu kaluwargana puwammu Ahab. Nanallalengiwiro Uhukkungngi Izebél iya puraé mpunoi nabi-nabik-Ku sibawa ata-atak-Ku iya laingngé.

⁸ Sininna kaluwargana sibawa ana' eppona Ahab harusu'i maté. Tungke' tau worowané muwi macowa iyaré'ga malolo Upaccappui matu.

⁹ Ugaukengngi matu kaluwargana pada-pada Ugaukengngéngngi kaluwargana Yérobéam sibawa kaluwargana Baésa, arung-ngarunna Israélié.

¹⁰ Dé' narikuburu matu Izebél. Nanréi matu asu ujuna ri daéra Yizreel.’ ” Purana napowada manenro, massuni nabi kalloloéro nanalari.

¹¹ Lisuni Yéhu ri sellao-sellaona, namakkutana mennang, “Engka karéba aga? Maéloi maga iyaro tau jangengngé sibawa iko?” Nappébali Yéhu, “Ah, muwissenni.”

¹² Nappébali mennang, “Dé', dé' taissengngi! Ayo paissengiki!” Nappébali Yéhu, “Napalettu'i pasenna Puwangnge makkedaé nakkaka Puwangnge mancaji arunna Israélié.”

¹³ Masitta'ni sellao-sellaona Yéhu ludungngi jumbana mennang nanapallebba'i ri addénéngngé ri yolona Yéhu. Nainappa mennang seppung tarompé sibawa gora, “Arunni Yéhu!”

Riyunona Yoram arung Israél

^14-15 Makkuwaniro Yéhu sikongkolo méwai Arung Yoram iya engkaé wettuéro ri Yizreel. Laowi Yoram kuwaro untu' mabbura nasaba sining lona iya nalolongengngé ri laleng ammusurengngé ri Ramot méwai Hazaél arung Siria. Makkedani Yéhu lao ri sellao-sellaona sining pallimaé, “Rékko musitujuiwi iyya mancaji arung, jagaiwi kuwammengngi aja' naengka muwi séddi tau iya massué polé ri Ramot untu' powadangngi sining tauwé ri Yizreel.”

¹⁶ Purairo naénrékini karéta musuna, nanajoppa lao ri Yizreel. Iyaro wettué dé'pa najjappa Yoram, na Ahazia arunna Yéhuda engkai kuwaro célléngiwi.

¹⁷ Wettunna pengawalna manara kota Yizreel naita Yéhu sibawa sining taunna polé, gorani, “Engka sirombongang tau mattuju lao mai!” Nappébali Yoram, “Suroi séddi prajuri makkinnyarang lao salidikiwi rangegga mennang iyaré'ga bali.”

¹⁸ Laoni iyaro prajuri'é sibawa makkinnyarang méwai sita Yéhu sibawa makkeda, “Macinnai arungngé missengngi poléiga Puwang selaku rangeng.” Nappébali Yéhu, “Tenniya urusammu iyaro! Ayo accowéno ri iyya.” Iyaro pengawal manaraé naitai iyaro prajuri'é lettu ri rombongangngéro, iyakiya dé' nalisu. Nalaporo'ni gau'éro,

¹⁹ nainappa nasuro prajuri laingngé. Iyaé prajuri'é makkutana towi makkuwaro lao ri Yéhu, namappébalisi Yéhu, “Tenniya urusammu iyaro! Ayo accowéno ri iyya!”

²⁰ Nalaporo'si iyaro pengawal manaraé makkedaé iyaro suroé lettu'ni ri rombongangngéro iyakiya dé' nalisu. Nainappa natambai, “Naullé pamimpinna iyaro rombongangngé iyanaritu Yéhu, saba' natonangiwi karéta musuna pada-pada tau jangengngé.”

²¹ Napparénta Arung Yoram, “Passadiyangekka karétaku.” Ripassadiyani karétaé, nainappa Yoram sibawa Arung Ahazia joppa lao méwai sita Yéhu, tungke'-tungke' ri laleng karétana muto. Siruntu'ni mennang sibawa Yéhu ri dare' appunnangenna riyolo Nabot.

²² Nakkutana Yoram lao ri Yéhu, “Polékoga selaku rangeng?” Nappébali Yéhu, “Pékkugi wedding selaku rangeng, rékko maéga mupa kuwaé sanro, sibawa engka mupa assompang barahala iya napammulaiyé Izebél indo'muro?”

²³ “Iyaé abali'bellareng, Ahazia!” gorana Yoram nanapabélo'i karétana nanalari.

²⁴ Nagettenni panana Yéhu maggangka ullé panai Yoram ri lekke'na bettui jantunna. Narebbana Yoram, sibawa maté ri laleng karétana.

^25-26 Nainappa makkeda Yéhu lao ri Bidkar ajudanna, “Muwéngngerang mupaga, wettutta makkinnyarang maccowériwi Ahab, ambo'na Yoram? Iyaro wettué makkedai Puwangnge lao ri Ahab, ‘Uwisseng niga mpunoi Nabot sibawa ana'-ana'na iwenni, namajjancika maélo hukkukko ri palla'éttowé.’ ” “Rimakkuwannanaro,” adanna Yéhu patterui lao ri ajudannaro, “Aggenrungengngi iyaro ujuna Yoram lao ri palla'na Nabot, kuwammengngi nakajajiyang pahukkungenna Allataala ri yasé'na.”

Riyunona Ahazia arunna Yéhuda

²⁷ Naitani Ahazia aga iya puraé kajajiyang, nanalariyanni karétana mattuju ri kota Bét-Hagan. Rilellunni ri Yéhu sibawa gora lao ri ana' buwana, “Uno towi!” Ripanani ri mennang sibawa loi ri laleng iya mattujué ri Gur, seddéna kota Yibléam. Iyakiya naulléi lari lettu ri Megido, nakkuwaniro maté.

²⁸ Sining pegawénna malai ujuna nanatiwii sibawa karéta lisu ri Yérusalém, nanakuburu'i ri laleng kuburu'na arung-ngarungngé ri Kota Daud.

²⁹ Mancaji arungngi Ahazia ri Yéhuda wettunna Arung Yoram ana' Ahab seppuloni séddi taunna paréntai Israél.

Riyunona Ratu Izebél

³⁰ Lettu'ni Yéhu ri Yizreel. Naéngkalinganana Izebél passalenna aga pura kajajiyang, napakessingini gemme'na sibawa maccilla, nainappa cuku' makkita polé ri tellongenna saorajaé.

³¹ Wettunna Yéhu muttama lalo ri pintu gerbangngé, gorani Izebél, “Eh Zimri, pabbuno! Maéloko maga mulao kuwaé?”

³² Congani Yéhu makkita ri tellongengngé, namakkeda, “Niga maccowé ri iyya?” Naéngkalingana iyaro, duwa tellu tau pegawénna saorajaé cuku' liyawa.

³³ Nakkeda Yéhu lao ri mennang, “Aggenrungengngi liyawa!” Nanaggenrungenni Izebél liyawa narilélu ri karétaé angkanna tapporo darana lao ri témbo'é sibawa risining anyaranna karétaéro.

³⁴ Nainappa muttama Yéhu ri saorajaé sibawa manré. Namakkeda, “Iyaro makkunraié mabusungngi. Namuni makkuwaro, kuburu'i ujuna saba' ana' arungngi.”

³⁵ Iyakiya wettunna lao sining tauwé malai ujuna untu' rikuburu, banna kaddaro ulunna mennang napoléi sibawa buku-buku taiyyana sibawa ajéna.

³⁶ Rilaporo'nana iyaro gaué ri Yéhu, makkedani, “Purani naboto Puwangnge iyaé, wettunna makkeda makkuwaé naolai Elia atan-Na: ‘Ujuna Izebél nanréi matu asu ri daéra Yizreel,

³⁷ sibawa sésa-sésa ujuna tassiya-siyai matu pada-pada tai olokolo'é angkanna dé' muwi séddi tau mulléi missengngi ujuna niga iyaro.’ ”