2 ARUNG-NGARUNG 3 - KITTA KAREBA MADECENG

Mammusuna Israélié sibawa Moab

¹ Ri taung maseppuloé aruwa apparéntanna Yosafat arung Yéhuda, Yoram ana' Ahab mancaji arunna Israélié sibawa mapparéntai ri Samaria seppulo duwa taung ittana.

² Napogau'i iya majaé ri pakkitanna Puwangnge, iyakiya dé' napada-pada jana Ahab sibawa Izebél, tomatowanna. Dato-dato iya naébbué ambo'na untu' sompai Baal purani naruttung.

³ Iyakiya, pada-pada Arung Yérobéam ana' Nébat iya mapparéntaé ri yolona, alénato nassabariwi namadosa tau Israélié sibawa dé' nappésau pogau'i gau'éro.

⁴ Arung Mésa polé ri Moab mappunnaiwi appiyarang bimbala. Selaku simana lao ri arung Israélié, tungke' taung mabbéréi 100.000 ana' bimbala sibawa topa bulu-bulu bimbala polé ri 100.000 bimbala laié.

⁵ Iyakiya maténana Arung Ahab, maronta'i Mésa lao ri Israélié.

⁶ Rimakkuwannanaro masitta'ni Yoram salaiwi Samaria nalao passadiyai sininna tentarana.

⁷ Nakirinni iyaé pasengngé lao ri Arung Yosafat polé ri Yéhuda, “Maronta'ni arung Moab lao ri iyya, maéloiga Saudara duwakka mammusu méwai?” Nappébali Arung Yosafat, “Makessinni. Iyya sibawa ana' buwaku enrengngé tentara makkinnyarakku maccowéi matu silaongengngi Saudara.

⁸ Laleng kégana taola gasai matu?” Nappébali Yoram, “Laleng iya laloé ri padang kessi Edom.”

⁹ Najoppana Arung Yoram silaong arung Yéhuda sibawa arung Edom. Mallalennana pitungngesso ittana, acappurenni uwai, angkanna pasukanna enrengngé olokolo pattéké baranna dé'na naénung.

¹⁰ Nagorana Arung Yoram, “Cilakani! Purani narancana Puwangnge untu' mabbéréyakki sipattellu lao ri arung Moab!”

¹¹ Nakkutana Arung Yosafat, “Dé'ga gaga kuwaé nabi iya weddingngé makkutanangekki ri Puwangnge?” Sala séddinna parawirana Arung Yoram mappébali, “Engka Elisa ana' Safat! Pabbantunnai riyolo Elia.”

¹² Nakkéda Arung Yosafat, “Tongeng! Mémeng mabbicarai Puwangnge naolai aléna.” Nalaona iya tellu arungngéro ri Elisa.

¹³ Nakkeda Elisa lao ri arunna Israélié, “Magi muwéllau tulung ri iyya? Lao bawanni ri nabi-nabinna tomatowammu!” Nametté Yoram, “Dé'! Saba' Puwangnge ritu rancanai untu' mabbéréyang telluki lao ri arung Moab!”

¹⁴ Nappébali Elisa, “Nasabbing Puwang iya tuwoé, iya utumaningiyé, upowadai sitongenna makkedaé rékko tenniya nasaba Arung Yosafat iya upakalebbié, dé' umaélo mappunnai urusang sibawa iko.

¹⁵ Tiwii mai makkekkuwangngé séddi pakkacapi!” Wettunna iyaro tauwé makkacapi, rikuwasaini Elisa ri Rohna Puwangnge,

¹⁶ angkanna makkeda, “Iyanaé napowada Puwangnge; ‘Ebbuno sépe-sépe ri wadi.

¹⁷ Namuni dé' muwita bosi teppa iyaré'ga anging mangiri, iyakiya pennoi matu uwai iyaé salo rakkoé. Iko silaong olokolo'é enrengngé olokolo pattéké barammu lolongengngi matu uwai iya genne'é untu' riyénung gangka cau.’ ”

¹⁸ Nainappa makkeda Elisa patterui, “Iyakiya iyaro banna parakara baiccu lao ri Puwangnge. Maélo towi mpérékko apakalang lao risining tau Moab-é.

¹⁹ Sininna kotana mennang iya mabbénténgngé sibawa iya makessingngé muruttungngi matu; sininna pong buwa-buwana mutubbangngi, sininna mata uwaina muléwui sibawa sininna dare'na mennang iya macommo'é mugenrungngi matu batu angkanna masolang siseng.”

²⁰ Bajana, wettunna makkasuwiyangeng akkarobangeng élé, massolo'ni uwaié polé ri Edom angkanna pennoiwi iyaro salo rakkoé.

²¹ Wettunna naéngkalinga tau Moab-é makkedaé iya tellu arungngéro poléni maggasa, sininna tauwé – polé ri pommacowaé lettu ri pommaloloé – iya mulléngngi méssang senjata, ripangarani sibawa ritaro ri pakkaséséngngé.

²² Bajana, wettunna mennang moto ri éléé, natappani mata esso tompo'na uwaié angkanna macella pada-pada daraé.

²³ Gorani mennang, “Dara! Pasti prajuri-prajuri polé ri iya tellu pasukanna balié pura mallaga sibawa sisullé siyuno! Laono mai talao rampo'i akkémanna mennang!”

²⁴ Iyakiya wettunna iyaro sining tau Moab-é lettu ri akkémangngéro, ripasoroni mennang ri tau Israélié iya matterué maju mallellung nanauno towi mennang

²⁵ sibawa ruttungngi kota-kotana. Tungke' dare iya macommo'é iya naolaé, nagenrungiwi batu. Naléwu towi sining tau Israélié sininna mata uwaié enrengngé natubbangngi sininna pong buwa-buwaé. Iya monroé banna kota Kir-Harését, ibukotana Moab. Paccappurenna iyaro kotaé rikeppung towi sibawa rigenrung batu risining pallobangngé.

²⁶ Namaingekinna makkedaé dé'na naulléi mattahanna, natiwini arung Moab pitu ratu prajuri iya maccaé paké peddang, nainappa makkuraga bettui attahangenna arung Edom, iyakiya dé' naulléi.

²⁷ Rimakkuwannanaro nalani ana' pattolana, nainappa nakkasuwiyangeng ri tompo'na témbo'na kotaé selaku akkarobangeng untu' déwata Moab. Namétauna sining tau Israélié, angkanna napasoro mennang pasukanna polé ri kotaéro nalisu ri wanuwanna.