1 TAWARIKH 20 - KITTA KAREBA MADECENG

Nasittainna Daud Raba

¹ Wettunna lemma paimenna, wettunna arung-ngarungngé biyasanna lao mammusu, napangarani Yoab tentarana sibawa sittaiwi wanuwa Amon. Iyaro wettué Arung Daud tette'i ri Yérusalém, sibawa dé' naccowé. Yoab sibawa tentarana keppungngi kota Raba, nainappa nagasa sibawa naancuru'i iyaro kotaé.

² Purairo poléni Daud sibawa mala maéga senna barang rampasa polé ri kotaéro. Ri yelle'na barab-barangngéro engkai passigera'na arung Among. Iyaro passigera'é tane'na kira-kira 34 kilo sibawa riparamatai séddi paramata. Nalani Daud iyaro paramataé nanapasangngi ri passigera'na.

³ Nainappa nakka Daud iyaro pabbanuwana kota Raba sibawa napassai mennang majjama sibawa paké garagaji, béngkung sibawa wasé. Iyaro gau'é napogau' towi lao ri kota-kota Amon iya laingngé. Purairo lisuni Daud sibawa sininna tentarana ri Yérusalém.

Musué méwai sining rassasa Filistingngé

⁴ Siyagangngaré wettu puranaro mammususi méwai tau Filistingngé ri Gézer. Ri laleng sala séddinna ammusurengngéro Sibkhai tau Husaé mpunoi séddi rassasa riyaseng Sipai. Nacauna tau Filistingngé.

⁵ Ri laleng ammusureng laingngé méwai tau Filistingngé, Elhanan ana' Yair mpunoi Lahmi silessurenna Goliat tau Gat. Pasorompessinna Lahmi silloppo aju paréwa tennungngé.

⁶ Ri laleng ammusureng laingngéssi ri Gat engka séddi tau rassasa iya mappunnaiyé enneng jari ri tungke' limanna sibawa tungke' ajéna. Wija-wijannai rassasaé wettu riyolo.

⁷ Naéllékéllé'i tau Israélié, narimakkuwannanaro riyunoi ri Yonatan, ana' Siméa kakana Daud.

⁸ Iya tellu tau iya naunoé Daud sibawa pasukannaro iyanaritu wija-wijanna rassasaé ri Gat.