1 SAMUEL 8 - KITTA KAREBA MADECENG

Méllaunna umma Israélié séddi arung

¹ Macowanana Samuél, naakkani ana'-ana'na mancaji haking ri Israél.

² Ana'na iya macowaé riyasengngi Yoél na iya maduwaé Abia. Mancaji hakingngi mennang ri Bérsyéba.

³ Iyakiya dé' naccowériwi mennang ampé-ampéna ambo'na, sangadinna banna lellungngi asarong aléna bawang. Tarimai mennang dowi pasoso sibawa madélékiwi ra'ya'é dé' naadélé.

⁴ Rimakkuwannanaro maddeppungenni sininna pamimping Israélié, nainappa mangolo ri Samuél ri Rama,

⁵ sibawa makkeda lao ri aléna, “Engkalingai Pa', macowani Bapa' na ana'-ana'na Bapa' dé' naccowériwi ampé-ampéna Bapa'. Jaji makessingengngi Bapa' makka séddi arung kuwammengngi tappunnai arung pada-pada bangsa-bangsa laingngé.”

⁶ Iyakiya dé' namasennang Samuél sibawa tangngana mennanro. Namassempajang lao ri Puwangnge,

⁷ namakkeda Puwangnge, “Palaloni sininna paréllaunna iyaro bangsaé lao ri iko. Saba' tenniya iko nasampéyang mennang, sangadinna Iyya. Dé'na mennang napuwélo-Ka selaku arunna mennang.

⁸ Sipongenna mennang Utiwi massu polé ri Maséré, nabbokori-Ka mennang namassompa déwata-déwata, sibawa aga iya nagaukengngékko mennang makkekkuwangngé, iyanaro napogau' mennang lao ri Iyya.

⁹ Rimakkuwannanaro tarimani paréllaunna mennang; iyakiya paréngngerangiwi mennang sibawa tonget-tongeng, sibawa paissengiwi pékkugi mennang matti rigaukeng ri arungngé.”

¹⁰ Sininna iyaro ada-adanna Puwangnge napalettu'ni Samuél lao risining tau iya méllauwé séddi arung ri aléna, adanna,

¹¹ “Mappakkuwiyé matti arummu gaukekko,” mappakkuwaniro Samuél pakatajangngi. “Napassai matu ana'-ana'mu muttama tentara; sibagiyang polé ri mennang selaku pasukang makkaréta, sibagiyang selaku pasukang makkinnyarang, na laingngé selaku pasukang mallaleng.

¹² Sibagiyang nakka mancaji parawira sisebbué tau, na sibagiyang laingngé limassebbué tau. Iyaro arungngé napassai matu ana'-ana'mu rakkalai dare'na, paddeppungengngi wassélé éngngalanna, mébbui senjata-senjatana sibawa pakkakkasa karéta musuna.

¹³ Ana'-ana'mu iya makkunraié nasuroi matu mébbu minnya wangi untu' aléna sibawa mappallaung selaku pannasunna sibawa pakkébbu rotinna.

¹⁴ Nalai matu dare'mu, palla anggoro'mu, sibawa palla zaitummu iya kaminang makessingngé nanawéréngngi sining pegawénna.

¹⁵ Dare sibawa palla anggoro'mu napakennai matu sima tawaseppulona polé ri wassélé'na, nainappa nawéréng matu sining parawirana sibawa sining pegawénna.

¹⁶ Nalai matu atammu, olokolo'mu iya kaminang makessingngé sibawa kaleddé'mu nanapakéi untu' jama-jamanna.

¹⁷ Tawaseppulona polé ri bémbé bimbala makkonrommu nalai matu. Sibawa iko paimeng mancaji matu atanna.

¹⁸ Rékko narapini matu iyaro wettué, maddarékéno matu nasaba arung iya mupiléro, iyakiya dé' namaélo Puwangnge méngkalingai addarékémmu.”

¹⁹ Iyakiya iyaro bangsaé dé' namaélo bati-batiwi ada-adanna Samuél, mala makkedai mennang, “Leppessanni! Muwi maga riyélori towi arungngé.

²⁰ Macinnaki sippada sibawa bangsa-bangsa laingngé, harusu'ki naparénta arutta sibawa pimpikki ri laleng ammusurengngé.”

²¹ Purana naéngkalinga Samuél sininna ada-adanna mennanro, napalettu'ni lao ri Puwangnge.

²² Nappébali Puwangnge, “Accowéri bawanni mennang sibawa akkarenni mennang séddi arung.” Nainapa nasuro Samuél sining tauwéro lisu ri bolana tungke'-tungke'.